تۋريزم • 30 قىركۇيەك، 2022

سالادا ىلگەرىلەۋ بار

39 رەت كورسەتىلدى

پاندەمياعا بايلانىستى ەكى جىلداي تۇرالاپ قالعان تۋريزم سالاسىندا قازىر قارقىندى دامۋ بايقالادى. ىشكى ءتۋريزمنىڭ نەگىزگى كورسەتكىشتەرى كەيىنگى ەكى جىلداعى ستاتيستيكامەن سالىستىرعاندا بيىل كورسەتكىش بىرنەشە ەسەگە جاقسارعان. بىلتىر قازاقستانعا كەلگەن تۋريستەردىڭ سانى رەكوردتىق كورسەتكىشكە جەتىپ، 6،9 ملن ادامنىڭ قازاق دالاسىنا تابانى تيگەن. بۇل – پاندەمياعا دەيىنگى كەزەڭنەن دە جوعارى كورسەتكىش بولىپ تۇر. بۇل تۋرالى تۋريزم يندۋسترياسى كوميتەتىنىڭ توراعاسى داستان رىسبەكوۆ ورتالىق كوممۋنيكاتسيالار قىزمەتىندە وتكەن بريفينگتە مالىمدەدى.

«2022 جىلدىڭ ءبىرىنشى جارتى­جىلدىعىندا ىشكى تۋريستەر سانى 3،6 ملن-عا جەتتى. ونىڭ ىشىندە 2،7 ملن تۋريست قوناقۇيلەرگە جاي­عاسسا، 300 مىڭ ساياحاتشى ۇلت­تىق پاركتەرگە بارعان. بۇل كور­سەت­كىش بىل­تىرعى جىلدىڭ سايكەس كەزەڭىمەن سالىس­تىر­عاندا 50% جوعارى. 2021 جىل­دىڭ ال­عاشقى جارتىجىلدىعىندا قازاق­ستانعا 2،4 ملن ادام كەلگەن بولاتىن. سون­دىقتان جىل سوڭىنا قاراي ىشكى تۋريستەر سانى 8 ملن ادامعا دەيىن وسەدى دەگەن بولجام بار.

پاندەمياعا دەيىنگى كەزەڭمەن سالىس­تىرساق، ورنالاستىرۋ ورىن­دارى كورسەتەتىن قىزمەت كولە­مى دە وسكەن. 2019 جىلدىڭ جار­تىجىلدىعى بويىنشا قىزمەت كولەمى 51 ملرد تەڭگە بولسا، بيىل بۇل كورسەتكىش 30%-عا ارتىپ، 68 ملرد تەڭگە بولدى. ورنالاستىرۋ ورىندارىنىڭ تولۋى بيىلعى جىلدىڭ 6 ايىنىڭ قورىتىندىسى بويىنشا 28،2% بولدى، بۇل – 2019 جىلدىڭ كورسەتكىشىنەن جوعارى (27%). مۇنداي قارقىنمەن جىل سوڭىنا دەيىن كور­سەتكىش 32% بولادى دەپ بولجاپ وتىر­مىز»، دەيدى د.رىسبەكوۆ.

ىندەت شەكتەۋلەرى الىنىپ تاس­­تال­عاندىقتان، شەتەلدىك قو­ناق­تاردىڭ كەلۋى دە بىرتە-بىرتە ءوسىپ كەلەدى. وسى جىلدىڭ جارتى­جىلدىعىنىڭ كور­سەتكىشى بىل­تىرعى جىلدىڭ قورى­تىندىسىمەن تەڭەسىپ، 1،3 ملن كەلۋشىگە جەتتى. جىل سوڭىنا قاراي ولاردىڭ سانى 2،5 ملن-عا جەتۋى مۇمكىن.

بيىلعى 6 ايدا قوناقۇي قىزمە­تىن پايدالانعان شەتەلدىك تۋريس­تەر سانى بىلتىردىڭ وسى كەزەڭى­مەن سالىستىرعاندا 2،5 ەسەگە ارت­قان. ماسەلەن، 2022 جىلدىڭ 1 جار­تى­جىل­دىعىندا 292 مىڭ ادام قوناق­ۇيگە جايعاسسا، 2021 جىلدىڭ 1 جارتى­جىلدىعىندا ولاردىڭ سانى 123 مىڭ ادام بولعان ەدى. بيىل ەلىمىزگە 700 مىڭ قوناق كەلەدى دەپ كۇتىلۋدە.

«eQonaq جۇيەسىنىڭ تالداۋ دەرەك­تەرىنە سۇيەنەر بولساق، اپتا سايىن قازاقستانعا كەم دەگەندە 11 مىڭ شەتەلدىك تۋريست كەلەدى. ورنا­لاسۋى بويىنشا شەتەلدىكتەردىڭ ءجيى تىركەلەتىن وڭىرلەرى: الماتى، استانا جانە ماڭعىستاۋ وبلىسى. تامىز ايىنىڭ وزىندە اقپاراتتىق جۇيەدە 52 مىڭ شەتەلدىك تۋريست تىركەلگەن. قازىرگى كۇنى eQonaq قامتۋى 10 مىڭ ورنالاستىرۋ ورنىن قۇرايدى. ەپيدەميالىق احۋا­ل مەن شەكارادان وتۋگە كاران­تيندىك شەكتەۋ شارالارى، قاڭتار وقيعاسى، سونداي-اق الەمدەگى ەكونوميكالىق جانە ساياسي جاعداي شيەلەنىسكەندىكتەن سىرتتان كەلە­تىن تۋريستەردىڭ كورسەتكىشى پان­دەمياعا دەيىنگى كورسەتكىشكە ءالى جەتكەن جوق»، دەيدى سپيكەر.

UNWTO بولجاۋىنشا، حالىق­ارالىق تۋريزم 2024 جىلعا قاراي قال­پىنا كەلەدى. دەگەنمەن الەمدىك تۋريزم ويىنشىلارى اگرەسسيۆتى ساياسات جۇرگىزىپ، شەتەلدىك تۋريستكە دەگەن تالاس كۇشەيىپ جاتىر.

بيىل 74 ەلدىڭ ازاماتتارىنا ۆيزاسىز رەجىم قالپىنا كەلتىرىلدى. قوسىمشا ءۇندىستان، قىتاي جانە يران ازاماتتارىنا دا ۆيزاسىز رەجىم قو­سىلدى. 113 باعىت بويىن­شا 28 ەلمەن حالىقارالىق اۋە قا­تىناسى قالپىنا كەلتىرىلدى.

سونداي-اق شەتەلدىك تۋريس­تەردىڭ ءجيى كەلۋىنە سەبەپ بولاتىن قۇرالدار­دىڭ ءبىرى – حالىقارالىق اتاۋلى ءىس-شارالار ەكەنى بەلگىلى. ماسەلەن، بيىل استانادا ايگىلى IRONMAN جارىسى ۇيىم­داس­تىرىلدى. وعان الەمنىڭ 40 ەلىنەن 2 مىڭنان اسا قاتىسۋشى كەلدى. مامانداردىڭ ەسەبى بويىنشا، جارىسقا قاتىسۋشىلاردىڭ قوناق­ۇي جالداۋ، تاماقتانۋ، ويىن-ساۋىق باع­دار­لامالارى، كادەسىي جانە تاعى باسقا شىعىندارىنان ەل بيۋدجەتىنە 1 ملرد تەڭگە تۇسكەن.

«تۋريزمگە ينۆەستيتسيا تارتۋ جۇ­مىسى دا جالعاسىپ جاتىر. سونىڭ ناتيجەسىندە، جىل باسىنان بەرى 20،3 ملرد تەڭگەگە 77 جوبا جۇزەگە اسىرىلدى. 2022 جىلدىڭ سوڭىنا دەيىن قوسىمشا 107،8 ملرد تەڭگەگە 87 جوبا ىسكە قوسىلادى دەپ كۇتىلۋدە. قوناقۇي بيزنەسى تۋريستىك سالانىڭ نەگىزگى جۇيەسىن قۇرايدى. سونداي-اق تۋريزم نى­ساندارى كوپ­تەپ جۇمىس ورىندارىن اشادى. ماسەلەن، WYNDHAM GARDEN BURABAY جاڭا قوناقۇيى 120 جاڭا جۇمىس ورنىن، اباي وبلى­سىنداعى Alakol Love دەمالىس ورنى 100 ادامدى جۇمىسپەن قام­تىدى»، دەي­دى تۋريزم يندۋس­تريا­سى كوميتەتىنىڭ توراعاسى.

1 ماۋسىمدا وتكەن ۇكىمەت وتى­رىسىندا مادەنيەت جانە سپورت مينيس­ترلىگىنە Neo Nomad 2022 اۋقىمدى اكتسياسىن وتكىزۋ ۇسى­نىلعان بولاتىن. جوبانىڭ ءمانى –قازاقستان ىشىندە ىشكى جانە شەتەلدىك تۋريستەردىڭ كەلۋىنە ۇسى­نىلاتىن 20 لوكاتسيانىڭ ءتىزى­مىن قالىپتاستىرۋ بولاتىن. اك­­تسياعا قا­تى­سۋ ءۇشىن تۋريس­تەر ارنايى سۋرەتكە ءتۇسىپ، فوتو­سۋ­رەتتەرىن #neonomad2022 بەل­گىسىمەن الەۋمەتتىك جەلىلەردە ور­نا­لاس­تىرۋى كەرەك بولاتىن. ءىس-شارا اياسىندا قازاقستاننىڭ 20 وڭىرىندەگى تانىمال لوكاتسيالارعا بارعان بەلسەندى تۋريستەر ماراپاتتالادى. قازىرگى ۋا­قىتتا وڭىر­لەردىڭ تۋريستىك لوكاتسيالارىندا فوتوجاقتاۋ (فوتورامكا) ورناتۋ جۇمىستارى ءجۇرىپ جاتىر.

جيىن سوڭىندا داستان رىس­بەكوۆ بيىلدان باستاپ جۇزەگە اسىرىلعان ەل ىشىندە بالالارعا تەگىن اۋە ساپارىن سىيلايتىن Kids Go Free باعدارلاماسىنىڭ ارالىق قورىتىندىسىنا توقتالىپ ءوتتى. «كۇنى بۇگىنگە دەيىن 1 مىڭنان اسا بالا تۋريستىك پاكەت اياسىندا تەگىن ۇشىپ-قونۋ مۇمكىندىگىن پايدالاندى. جوبا اياسىندا تۋر­وپەراتورلار 320 ملن تەڭ­گەدەن اسا سوماعا تۋريستىك ءونىمدى جۇ­زەگە اسىردى. قازىرگى تاڭدا Kids Go Free باعدارلاماسى بار تۋرلارعا سۇرا­نىس ارتىپ جاتىر. جىل سوڭىنا دەيىن كەم دەگەندە 2 مىڭ بالانى قامتۋ جوس­پار­­لانىپ وتىر»، دەدى داستان رىس­بەكوۆ.

سوڭعى جاڭالىقتار

ۇقساس جاڭالىقتار