رۋحانيات • 30 قىركۇيەك، 2022

اقىن ارداقتالدى

46 رەت كورسەتىلدى

اسپانتاۋلار اياسىندا اقىن بيعايشا مەدەۋدىڭ 70 جىلدىعى كەڭىنەن اتالىپ ءوتتى. حان ءتاڭىرى ەتەگىنەن قاناتتانىپ، قازاق پوەزياسىندا وزىندىك قولتاڭباسىمەن دارالانعان قالامگەردىڭ ەلدەگى وقىرماندارى ەستە قالارلىقتاي كەشتىڭ كۋاسى بولدى.

اقىن تويىنا الماتىدان ءبىر توپ اقىن-جازۋشى كەلدى.ولاردىڭ قاتارىندا قا­زاق­ستان جازۋشىلار وداعى باسقارما تور­اعاسىنىڭ ورىنباسارى، اقىن باۋىرجان جاقىپ، جازۋشى مەرەكە قۇلكەنوۆ، اقىن قاسىمحان بەگمانوۆ، سىنشى ءاليا بوپە­جا­نوۆا بار. بەلگىلى قالامگەرلەر بيعايشا مەدەۋ شىعارماشىلىعى تۋرالى ءسوز قوزعاپ، اقىن ولەڭدەرىنىڭ نازىك يىرىمدەرىنە بويلادى. ال ەلدەگى جىر تويى ەكى كۇنگە سوزىلدى. العاشقى كۇنى اقىندار ايتىسى ءوتتى. ادەبيەتتەگى اۋەلگى قادامىن ايتىس ساحناسىندا باستاعان بيعايشا مەدەۋ بۇل جولى دا قولىنا دومبىرا الىپ، ءسوز ساپتادى. جالپى، باققوجا مۇقاي اتىنداعى مادەنيەت ۇيىنە جينالعان قاۋىم اقىندار ايتىسىنا ەرەكشە ىقىلاس تانىتتى. ويتكەنى نارىنقول وڭىرىندە كەيىنگى 10 جىلدا بىردە-ءبىر ءسوز دوداسى وتپەگەن ەكەن. مۇنان كەيىنگى ءىس-شارا اقىننىڭ تۋعان جەرى – قاراتوعان اۋىلىنداعى ن.ومىرزاقوۆ اتىنداعى ورتا مەكتەپتە جالعاستى. بۇل مەكتەپتە اقىن اتىنداعى تاريح سىنىبى سالتاناتتى تۇردە اشىلدى. جانە بيىلدان باستاپ تۇراقتى ءوتىپ تۇرۋدى داستۇرگە اينالدىرعان «بيعايشا وقۋلارىنىڭ» العاشقى جەڭىمپازدارى ماراپاتتالدى. سونداي-اق اقىننىڭ ۇل-قىزدارى تاعايىنداعان ارنايى شاكىرتاقى دا يەسىن تاپتى. وعان اتالعان مەكتەپتىڭ 8-سىنىپ وقۋشىسى الياسقار جانىبەك لايىق بولدى.

بۇدان كەيىنگى سالتاناتتى شارا باققوجا مۇقاي اتىنداعى مادەنيەت ۇيىندە اقىن بيعايشا مەدەۋدىڭ جاڭادان شىققان «كۇن­گە قول سوزعان قالالار» اتتى جىر جينا­عى­نىڭ تۇساۋكەسەرىمەن جالعاستى. ال قالام­گەر­دىڭ شىعارماشىلىعىنا ارنالعان سالتاناتتى جيىن­دا اقىن باۋىرجان جاقىپ، قا­زاقستاننىڭ ەڭبەك سىڭىرگەن قايراتكەرى، جا­زۋشى مەرەكە قۇلكەنوۆ قازاقستان جازۋشىلار وداعىنىڭ باس­قارما توراعاسى ۇلىقبەك ەسداۋلەتتىڭ قۇتتىقتاۋىن جەتكىزىپ، وداق اتىنان سىي-قۇرمەتتەرىن كورسەتتى. جيىندا اقپارات جانە قوعامدىق دامۋ ءمينيسترى دارحان قىدىرالىنىڭ قۇتتىقتاۋى وقىلدى. اقىن تويىنا استانادان ات ارىتىپ ارنايى كەلگەن اقىن، ءماجىلىس دەپۋتاتى ماقپال مىسا دا قاتىستى. سونداي-اق الماتى وبلىستىق مادەنيەت، ارحيۆتەر جانە قۇجاتتاما باسقارماسىنىڭ ءبولىم باسشىسى تولەۋجان عۇماروۆ اقىنعا مادەنيەت جانە سپورت ءمينيسترىنىڭ اتىنان «مادەنيەت سالاسىنىڭ ۇزدىگى» توسبەلگىسىن تابىس ەتتى. جىر سالتاناتىندا «مۇقاعالي» جۋرنالىنىڭ باس رەداكتورى، اقىن باتىق ءماجيت ۇلى ارناۋ ولەڭ وقىپ، «بالدىرعان» جۋرنالىنىڭ باس رەداكتورى دۇيسەن ءمۇسىرالى ۇلى حالىقارالىق مۇقاعالي قورىنىڭ اتىنان توسبەلگى تابىس ەتتى.

– ءبىز بيعايشاداي اپكەمىزدىڭ جانى­مىز­عا جىلى تيەتىن بولمىسى بولەك وتتى ولەڭدەرىنە سۋسىنداپ وستىك. ۇلتىمىزدىڭ تاريحىن جاقسى بىلەتىن بيعايشا مەدەۋ – كونە تۇركى، ساق قوعامىنىڭ قۇن­دى­لىق­تارىن ۇندەپ جۇرگەن ءتۇبىمىزدى تۇگەن­دەۋ­شى، جوعىمىزدى جوقتاۋشى، تۇمار مەن زاريناداي باتىر قىزدارىمىزدى جىرلاعان اقىن. سول ارقىلى وقىرمانىن وتانشىلدىققا ۇندەيدى. سول ارقىلى وقىرمانىن ەلىن، جەرىن سۇيۋگە، قۇرمەتتەۋگە تالپىندىرادى. اقىننىڭ تۇپ-تۇنىق ولەڭ ولكەسى ادام جانىن عاجايىپ كۇيىنە بولەپ، ىزگى دۇنيەلەرگە تالپىنتادى. ءبىر قوناق دۇنيەنىڭ ساۋلەلى شاقتارىن، جاقسىلىقتى جاقتارىن كورۋگە، سەزە بىلۋگە ۇمتىلدىرادى. انالىق مەيىر-شاپاعاتىنا تولى اقىن – جۇرەك دۇنيەنىڭ تۇتاستىعىن تىلەيدى. سول ءبىر تۇنىق نيەت پەن تىلەكتەن تۋعان جىرلار وقىرمانىن باۋراپ كەلەدى، – دەيدى كورنەكتى اقىن باۋىرجان جاقىپ قالامداسى تۋرالى.

 

الماتى وبلىسى

سوڭعى جاڭالىقتار

ۇقساس جاڭالىقتار