اسپانداعى اقشا بۇلتتار بولماسا, كۇن كوزى جارقىراپ تۇر. ءبىرى بالا-شاعاسىمەن, ەندى ءبىرى بولاشاق جارىمەن قول ۇستاسىپ قىدىرىپ جۇرگەن قالىڭ جۇرت. الىستان ءۇش جاۋىنگەردىڭ سۇلباسى كورىندى. ازاماتتىق كيىمدەگى ادامداردان بىردەن ەرەكشەلەنىپ تۇر. اسكەري كيىم كيىسى, ساپتىق ءجۇرىس-تۇرىسى كوزگە وتتاي باسىلادى. بۇل بۇگىنگى تىنىشتىعىمىزدىڭ كۇزەتشىلەرى, ۇلاندىق جاۋىنگەرلەر. قاسىمدا كەلە جاتقان 5573 اسكەري ءبولىمى 1 باتالون 1 روتا 3 ۆزۆود كومانديرى اعا لەيتەنانت ايبەرگەن يۆان مەنى كۇندىزگى قىزمەتتىڭ ەرەكشەلىگىمەن تانىستىرىپ كەلەدى.
– ءوزىڭىز كورىپ تۇرعانداي, كۇندىز جۇرتتىڭ بارلىعى كوتەرىڭكى كوڭىل كۇيمەن جۇرەدى. جازدى كۇنى قالا تۇرعىندارى مەن قوناقتارى وسى ورتالىق ساياباقتى ارالايدى. جۇرتتىڭ كوبى دەمالىس كۇندەرى وتباسىلارىمەن بىرگە دەمالادى. كۇندىزگى قىزمەتتىڭ ەرەكشەلىگى وسىندا. ادامدار ءوز دەمالىستارىن جوعارى دەڭگەيدە وتكىزۋى كەرەك. وزگە بىرەۋ ماس كۇيدە حالىقتىڭ شىرقىن بۇزىپ, توبەلەسپەۋى جانە جالپى قوعامدىق ءتارتىپتى ساقتاۋ ءۇشىن كەزەكشىلىكتە جۇرەمىز, – دەيدى جاس وفيتسەر.
سالدەن كەيىن, قاسىمىزعا ۇشتىكتەن قۇرالعان اسكەري جاساق كەلدى. بارلىعى اسكەري بولىمنەن تاعايىندالعان كەزەكشى وفيتسەردىڭ قاسىنا جاقىنداپ, اسكەري تارتىپكە ساي بايانداي باستادى. ءمان-جايدى انىقتاپ بولعان سوڭ مەن ساربازداردى دا اڭگىمەگە تارتتىم. اسكەري جاساق باستىعى, قاتارداعى جاۋىنگەر اسان جۇمابەكوۆ 8 ايدان بەرى اسكەردە ەكەن. قاسىنداعى پاترۋلشىلەر قاتارداعى يۋنۋس يۋلداشەۆ پەن قاسىمجان ءابدىماناپ جۋىردا عانا اسكەري انتتارىن قابىلداعان جاس جاۋىنگەرلەر. اسان جۇمابەكوۆ قىزمەت بويىنشا تاجىريبەلى سانالادى. جانە دە ءبىر ساتىعا جوعارى تۇرادى. جاساق باستىعى بولىپ بەكەردەن-بەكەر تاعايىندالعان جوق. ا.جۇمابەكوۆ اسكەرگە شىمكەنت شاھارىنان شاقىرىلىپتى. وسى ۋاقىت ىشىندە ەلورداداعى قوعامدىق ءتارتىپتى كۇزەتۋدە ەداۋىر تاجىريبە جيناقتاعان.
– مەن دە كەزىندە اسكەري انت قابىلداپ, العاش رەت قالاعا قىزمەتكە شىققانمىن. اسكەر, ونىڭ ىشىندە ۇلتتىق ۇلان – جاۋىنگەرلىك-اسكەري وتباسى بولىپ سانالادى. ءبىز جاڭادان اسكەر قاتارىنا شاقىرىلعان ساربازدارعا قىزمەتتىڭ قىر-سىرىن ۇيرەتەمىز. مەنى دە كەزىندە وفيتسەرلەر مەن كەلىسىمشارت نەگىزىندەگى اسكەري قىزمەتشىلەر, الدىڭعى شاقىرىلىمداعى قارۋلاستارىم ۇيرەتتى. مەن دە ۇيرەتەمىن. بۇل وتانىمىزدى قورعاۋدا قاجەت دەپ بىلەمىن, – دەيدى اسكەري جاساق باستىعى.
ۇلاندىقتاردىڭ ايتۋىنشا, كۇندىزگى قىزمەت تىنىش وتەدى. ويتكەنى قىلمىس اتاۋلىنىڭ كوبى تۇندە, ىمىرت جابىلعاندا جاسالادى. ەڭ نازار اۋدارۋعا ءتيىستىسى ەسىل وزەنىنىڭ جاعالاۋى. سۋ – ءتىلسىز جاۋ. ۇلكەندەر بالالارىمەن سۋعا تىم قاتتى جاقىنداسا, اسكەريلەر مىندەتتى تۇردە ەسكەرتۋ جاساپ, ولاردى ساق بولۋعا شاقىرادى.
– ءبىزدىڭ قىزمەت قىلمىستىڭ الدىن الۋدى مىندەتتەيدى. قۇجاتتاردى دا ءبىز كەز كەلگەن ازاماتتان سۇراي بەرمەيمىز. تەك كۇدىكتى نەمەسە ماس كۇيدە تۇرعان ازاماتتاردان سۇرايمىز. ويتكەنى ولار وزگەگە نەمەسە وزىنە زيان كەلتىرۋى مۇمكىن. مىسالى, جازدا سۋعا قۇلاسا, قىستا سۋىقتا قاتىپ قالۋى كادىك. ءتىپتى ۇرلىق, زورلىق-زومبىلىق تا كوبىنەسە ماس كۇيدە جاسالادى. ءبىز ولاردىڭ الدىن الۋ ارقىلى قالادا قوعامدىق ءتارتىپتى قامتاماسىز ەتەمىز. ءبىزدى وسىعان ۇيرەتەدى. ءبىز وسىعان جاۋاپتىمىز, – دەيدى اعا لەيتەنانت ايبەرگەن يۆان.
جوعالعان بالالاردى ساياباقتاردا تاۋىپ الاتىن جاعداي ءوز الدىنا ءبىر اڭگىمە. «كوبىنەسە, بىزگە اتا-انالار جولىعادى. بالالارىنان كوز جازىپ قالادى. نەمەسە باسقا ازاماتتار جاقىنداپ «انا جەردە ءبىر بالا جىلاپ تۇر. اتا-اناسىنان اداسىپ قالعان بولۋى مۇمكىن» دەيدى. ءبىز بارىپ بالانى اڭگىمەگە تارتىپ, اقىرىندا جاعدايدى سۇراپ الامىز. جاقىندارىنىڭ تەلەفون ءنومىرىن بىلسە, قوڭىراۋ سوعامىز. مەكەن-جايدى ايتسا, اپارامىز. ەشتەڭە ايتا الماسا پوليتسيا پۋنكتىنە جەتكىزەمىز. اتا-انالار ادەتتە سول جەردە بولادى», – دەپ اعىنان جارىلدى پاترۋلدىك توپ باستىعى, ەفرەيتور ايدوس سابىرجانوۆ. ول دا تاجىريبەلى كەلىسىمشارت قىزمەتىنىڭ اسكەري قىزمەتشىسى. قاسىنداعى جاۋىنگەرلەر قاتارداعى ديدار رەزەنوۆ پەن جەڭىسقالي نۇرتورەنى ەرتىپ, ءارى قاراي ەسىل بويىن جاعالاپ, قىزمەتتەرىن جالعاستىرۋعا بەتتەدى.
تىنىشتىق اتاۋلىسىنا نە جەتسىن؟! ەلوردا تورىندەگى ساياباقتا ەل مامىراجاي كۇندەردىڭ قىزىعىن تاماشالاپ ءجۇر. جاستار «تيك-توك» ءتۇسىرىپ, ۇلكەندەر نەمەرەلەرىن ەرتىپ دەمالىستارىن ويداعىداي وتكىزۋدە. تەك, ۇلتتىق ۇلان جاۋىنگەرلەرى ۇنەمى قىزمەتتە. ەسىلدىڭ بويى ەرلەردىڭ كۇزەتىندە ەكەنىن وسىنداي ازاماتتارعا قاراپ بىلەسىڭ.
دارىن سەيىتوۆ,
اسكەري جۋرناليست
