دىچكو – جەڭىمپاز

قازاقستاندىق بىلعارى قولعاپ شەبەرى يۆان دىچكو الەم چەمپيوناتىنان كەيىن رينگكە قايتا ورالىپ, وزبەكستاننىڭ تاشكەنت قالاسىندا وتكەن سيدنەي دجاكسوندى ەسكە الۋعا ارنالعان حالىقارالىق ءتۋرنيردىڭ جەڭىمپازى اتاندى. ول فينالدا وزبەكستان كومان­داسىنىڭ ءنومىرى ءبىرىنشى بوكسشىسى, بىرقاتار حالىقارالىق تۋرنيرلەردىڭ جەڭىمپازى ميرزوحيدجون ابدۋل­لاەۆپەن قولعاپ ءتۇيىستىرىپ, 2:1 ەسەبىمەن جەڭىسكە جەتتى. وسى تۋرنيردە قازاقستان ۇلتتىق قۇراماسى اعا جاتتىقتىرۋشى نۇرلان ءسافيۋلليننىڭ جەتەكشىلىگىمەن بەس سالماقتا كۇش سىناستى. وعان دىچ­كودان باسقا زاكير سافيۋللين (60 كگ), الماسبەك ورىنعاليەۆ (69 كگ), ساپارباي ايداروۆ (75 كگ) پەن نۇر­داۋلەت جارمانوۆ (81 كگ) قاتىس­تى. جالپى, تۋرنيرگە قازاقستان, وزبەك­ستان, ازەر­بايجان, رەسەي, يران, تۇركيا, قىرعىزستان, قىتاي مەن تۇرىكمەنستاننان بارلىعى 150-دەن استام بوكسشى قاتىسىپ, سىنعا ءتۇستى. بوكستان قازاقستان كومانداسىنىڭ تاعى ءبىر قۇرامى دا ەلگە جەڭىسپەن ورالدى. جاقىندا البا­نيا­نىڭ شكودەر قالاسىندا وتكەن ۆلازنيانى ەسكە الۋعا ارنالعان ءحى حالىقارالىق تۋرنيردە ءبىزدىڭ بوكس­شىلار ءۇش التىن جانە ءبىر كۇمىس مەدالدى جەڭىپ الدى. وندا ءبىرجان جاقىپ (49 كگ), جانبولات تىلەگەن ۇلى (56 كگ) مەن الەكسەي سەۆوستيانوۆ (91 كگ) جەڭىمپاز بولسا, ەرلان تامەموۆ كۇمىس جۇلدەنى قاناعات تۇتتى. ول فينالدا ءبىرجان جاقىپتان ەسە جىبەردى. وسى تۋرنيردە 64 كگ دەيىنگى سالماقتا الماسبەك شىمبەرگەنوۆ قولعاپ ءتۇيىستىردى. جالپى, جارىسقا جەتى ەلدەن 28 بوكسشى قاتىستى. تۋرنيرگە قازاقستان قۇراماسىن جاتتىقتىرۋشى الەكساندر سترەلنيكوۆ باستاپ باردى. ەندى قۇراما كوماندا بيىلعى جىلدىڭ باستى بوكس باسەكەسى سانالاتىن جازعى ازيا ويىندارىنا دايىندالۋ ءۇشىن 26 مامىر مەن 1 ماۋ­سىم كۇندەرى گەرمانيانىڭ گاللە قالاسىندا وتەتىن حالىقارالىق تۋرنيرگە قاتىسادى. جۋىردا وسى ەكى تۋرنيردەن باسقا رەسەيدىڭ حاباروۆسك قالاسىندا دا كەڭەس وداعىنىڭ باتىرى كونستانتين كوروتكوۆتى ەسكە الۋعا ارنالعان تاعى ءبىر ۇلكەن حالىقارالىق جارىس وتكەن بولاتىن. وسى سىندا ءبىزدىڭ قۇراما ەكى التىن, ءتورت كۇمىس جانە ءۇش قولا جۇلدەنى جەڭىپ الدى. تۋرنيردە جانىبەك ءالىمحان ۇلى (75 كگ) مەن 91 كگ-دان اسا سالماقتاعى نۇرجان بەكزاتوۆ جەڭىمپاز اتانسا, جومارت ەرجان (49 كگ), ادىلەت قۇرمەتوۆ (52 كگ), ايدار امىرزاقوۆ (64 كگ) پەن داۋرەن ەلەۋسىنوۆ (81 كگ) كۇمىس مەدالدى, ەرجان ورداباەۆ (56 كگ), ساعادات راحمانقۇلوۆ (69 كگ), انتون پينچۋك (91 كگ) قولا جۇلدەنى قاناعات تۇتتى. وسى جارىستا قازاقستان قۇراماسى جالپى­كوماندالىق ەسەپتە ەكىنشى ورىندى يەلەندى. ءبىرىنشى ورىندى رەسەي, ءۇشىنشى ورىندى ازەربايجان الدى. تۋرنيرگە 17 ەلدەن 71 بوكسشى قاتىستى. داستان كەنجالين, «ەگەمەن قازاقستان».