قوعام • 28 قىركۇيەك، 2022

تارازدا شەرحان مۇرتازاعا ەسكەرتكىش ورناتىلادى

87 رەت كورسەتىلدى

تارازدا قازاق ادەبيەتى مەن جۋرناليستيكا سالاسىندا وشپەس ءىز قالدىرعان بەلگىلى قالامگەر شەرحان مۇرتازاعا ەسكەرتكىش ورناتىلادى، دەپ حابارلايدى Egemen.kz.

شەرحان مۇرتازا ۇلى مۇرتازا جامبىل وبلىسى، جۋالى اۋدانى، تالاپتى اۋىلىندا دۇنيەگە كەلگەن. قازاقستاننىڭ حالىق جازۋشىسى، قوعام قايراتكەرى، قازاقستان رەسپۋبليكاسىنىڭ ەڭبەك سىڭىرگەن مادەنيەت قىزمەتكەرى. بۇگىن حالىق جازۋشىسىنا 90 جىل تولدى. 

وسى جىلدىڭ ءساۋىر ايىندا تاراز قالاسىنداعى شەرحان مۇرتازا اتىنداعى «رۋحانيات جانە تاريحتانۋ» ورتالىعىندا وتكەن جيىندا جامبىلدىق اقساقالدار قالامگەرگە ەسكەرتكىش ورناتۋ تۋرالى قالا تۇرعىندارىنىڭ ويىن ايتقان بولاتىن. بۇل باستاماعا «كونە تاراز» قوعامدىق قورى قارجىلاي قولداۋ كورسەتتى. مامىر ايىندا جامبىل وبلىسىنىڭ اكىمى نۇرجان نۇرجىگىتوۆتىڭ تاپسىرماسىمەن جازۋشىنىڭ ەڭ ۇزدىك مۇسىندىك بەينەسىنە بايقاۋ جاريالانعان بولاتىن.

«كونە تاراز» قورىنىڭ توراعاسى مۇراتبەك ءازىموۆتىڭ ايتۋىنشا، ەسكەرتكىش جوباسىن ىرىكتەۋ جانە بەكىتۋ جونىندەگى كوميسسيانىڭ قۇرامىنا ءبىر كەزدەرى شەراعامەن جەكە تانىس بولعان قازاقستاندىق مادەنيەت قايراتكەرلەرى، ارداگەرلەر، شىعارماشىلىق زيالى قاۋىم وكىلدەرىنەن تۇراتىن 20 ادام كىرگەن.

«بايقاۋعا 17 ۇمىتكەردىڭ جوباسى ۇسىنىلدى، كەيبىر مۇسىنشىلەر ەسكەرتكىشتىڭ بىرنەشە نۇسقاسىن ۇسىندى. كوميسسيا مۇشەلەرى 34 جاستاعى الماتىلىق ءمۇسىنشى ايدوس بۇركىتباەۆتىڭ، ءال-فارابي، ءشامشى قالداياقوۆ، دينا نۇرپەيىسوۆا ەسكەرتكىشتەرىنىڭ اۆتورى جۇمىسىنا ءبىراۋىزدان دەرلىك داۋىس بەردى. ۇزدىك دەپ تانىلعان جوبا قازاقستان رەسپۋبليكاسىندا سالىنىپ جاتقان ەسكەرتكىشتەر  جونىندەگى مەملەكەتتىك كوميسسيانىڭ قاراۋىنا جىبەرىلدى»، دەدى «كونە تاراز» قوعامدىق قورىنىڭ باسشىسى.

ش.مۇرتازانىڭ مۇسىندىك بەينەسىن جاساۋ ءۇشىن ا.بۇركىتباەۆ ونىڭ شىعارمالارىن، ءومىربايانىن، ول تۋرالى ەستەلىكتەرىن قايتا وقىپ شىقتى، ونىڭ پورترەتتىك بەينەلەرى مەن ءوزى بەينەلەنگەن فوتوسۋرەتتەرىن زەرتتەدى.

ەسكەرتكىش ورناتۋ ءۇشىن ورىندى تاڭداۋ قيىن بولدى. قالا تۇرعىندارىنىڭ الەۋمەتتىك جەلىدە ايتقان قوعامدىق پىكىرى دە، مامانداردىڭ پىكىرى دە نازارعا الىندى. ول ءۇشىن ارنايى كوميسسيا قۇرىلىپ، شەرحان مۇرتازا ەسكەرتكىشى ورناتىلاتىن جەر تاڭدالدى.

ساۋالناما بارىسىندا تارازدىقتار جازۋشىنىڭ ەسكەرتكىشىن ورناتۋدىڭ 14 نۇسقاسىن اتادى. ماۋسىم ايىندا ارنايى كوميسسيا مەن ساۋلەتشىلەردىڭ بىرلەسكەن وتىرىسىندا بۇل ۇسىنىستار قارالدى.

«تالقىلاۋ قورىتىندىسى بويىنشا ءۇش ورىن بەلگىلەند. بۇل جەر «كونە تاراز» تاريحي-مادەني كەشەنىنىڭ اۋماعىندا، شەرحان مۇرتازا اتىنداعى «رۋحانيات» ورتالىعى عيماراتىنىڭ ءدال الدىنداعى جەر. ەكىنشى نۇسقا – جاستار اللەياسىندا جانە ءۇشىنشى نۇسقا – جامبىل داڭعىلى بويىنداعى حالىقارالىق تاراز يننوۆاتسيالىق ينستيتۋتى عيماراتىنىڭ الدىندا. قورىتىندى شەشىم بويىنشا، ەسكەرتكىش حالىقارالىق تاراز يننوۆاتسيالىق ينستيتۋتىنىڭ الدىنا ورناتۋ تاڭدالدى»، دەدى سپيكەر.

 

سوڭعى جاڭالىقتار

بۇگىنگى ۆاليۋتا باعامى

قارجى • بۇگىن، 09:55

ۇقساس جاڭالىقتار