ماڭىزدى قۇجاتتا ەلىمىزدىڭ ترانزيتتىك قۋاتىن ارتتىرۋ ماسەلەسىنە جان-جاقتى توقتالعان پرەزيدەنت: «قازاقستان قازىرگى گەوساياسي جاعدايدا ازيا-ەۋروپا اراسىنداعى اسا ماڭىزدى قۇرلىق ءدالىزى بولىپ وتىر. ءبىز بۇل مۇمكىندىكتى تولىق پايدالانىپ, الەمدىك ماڭىزى بار كولىك-تاسىمال تورابىنا اينالۋىمىز كەرەك. ەلىمىز وسى سالادا ءىرى جوبالاردى جۇزەگە اسىرا باستادى. اتاپ ايتقاندا, اقتاۋدا كونتەينەر حابى قۇرىلىپ جاتىر. ترانسكاسپي ءدالىزى دامىپ كەلەدى. بۇل جۇمىستارعا الەمدەگى ۇزدىك لوگيستيكا كومپانيالارى تارتىلادى», دەگەن ەدى. وسى ماقساتتا مەملەكەت باسشىسى ۇكىمەتكە 2025 جىلعا دەيىن جەرگىلىكتى جولداردىڭ كەمىندە 95 پايىزىن جاقسارتۋ جونىندە تاپسىرما بەرىپ, بۇل ماسەلەنى تىكەلەي باقىلاۋ قاجەتتىگىن ەسكەرتكەن ەدى.
كولىك پەن لوگيستيكانى دامىتۋ ماسەلەسى Amanat پارتياسىنىڭ نازارىنان دا تىس قالعان ەمەس. كۇنى كەشە پارتيا جانىنداعى كولىك جانە لوگيستيكا كوميتەتىنىڭ وتىرىسىندا ەلىمىزدىڭ ترانزيتتىك قۋاتىن ارتتىرۋ جانە «قازاقستان تەمىر جولى» ۇلتتىق كومپانياسى» اق-نىڭ ترانزيتتىك-لوگيستيكالىق كورپوراتسيا بولىپ قايتا قۇرىلۋى ماسەلەلەرى كەڭىنەن تالقىلاندى.
وتىرىستى اشقان كوميتەت توراعاسى, ءماجىلىس دەپۋتاتى سامات اقىشەۆ پرەزيدەنت قاسىم-جومارت توقاەۆتىڭ قازاقستان حالقىنا جولداۋى رەفورمالار باعىتىنىڭ ساباقتاستىعىن ايقىندايتىنىنا نازار اۋداردى. ال ونى ىسكە اسىرۋ ەلدەگى جەكە بيزنەستىڭ دامۋىنا تىڭ سەرپىن بەرەدى.
«جولداۋدا كولىك ماسەلەسىنە قاتىستى ايتىلعان تاپسىرمالار قوعام مەن جەكە بيزنەستى تارتا وتىرىپ ورىندالۋعا ءتيىس. سول ارقىلى بيزنەس ءوز دامۋىن جوسپارلاي الادى. سالاعا ينۆەستيتسيا قۇيادى جانە ورتاق جاۋاپكەرشىلىكتى ارقالايدى. مەملەكەت باسشىسى ايتقانداي: ء«بىز بۇل مۇمكىندىكتى تولىق پايدالانىپ, الەمدىك ماڭىزى بار كولىك-تاسىمال تورابىنا اينالۋىمىز كەرەك», دەپ اتاپ ءوتتى س.اقىشەۆ.
جيىندا يندۋستريا جانە ينفراقۇرىلىمدىق دامۋ ۆيتسە-ءمينيسترى الماز ىدىرىسوۆ كوميتەت مۇشەلەرىنە قازاقستاننىڭ ترانزيتتىك قۋاتىن ارتتىرۋ بويىنشا قابىلدانىپ جاتقان شارالار تۋرالى باياندادى. ول ترانسكاسپي حالىقارالىق كولىك باعدارىن دامىتۋ ترانزيتتىك جانە ەكسپورتتىق مۇمكىندىكتەردى ارتاراپتاندىرۋعا جاعداي تۋعىزاتىنىن اتاپ ءوتتى.
«الدىمىزدا وسى باعىتتىڭ وتكىزۋ قابىلەتىن 2025 جىلعا قاراي 6 ميلليوننان 10 ميلليون تونناعا دەيىن ارتتىرۋ مىندەتى تۇر. اتاپ ايتقاندا, اقتاۋ پورتىندا الەمدىك لوگيستيكالىق كومپانيالاردى تارتا وتىرىپ, «كونتەينەرلىك حاب» سالۋ جوسپارلانۋدا. سونداي-اق كاسپي تەڭىزىندەگى پاروم فلوتىنىڭ تاپشىلىعىنا بايلانىستى, 10 بىرلىك ءوز پارومىمىزدىڭ قۇرىلىسىن باستاۋ جوسپارلانۋدا. بۇعان قوسا جىلجىمالى تەمىر جول سوستاۆىن جاڭارتۋ ماقساتىندا 2025 جىلعا دەيىن 1500 جارتىلاي ۆاگون, 3500 ۆاگون پلاتفورما جانە 310 لوكوموتيۆ ساتىپ الۋ جوسپارلانىپ وتىر», – دەدى ۆيتسە-مينيستر.
ءوز كەزەگىندە, «قازاقستان تەمىر جولى» ۇك» اق باسقارما توراعاسىنىڭ ورىنباسارى ءانۋار احمەتجانوۆ ەۋروپا مەن ازيا ەلدەرىنىڭ تۇراقتى ساۋدا كولەمى, تەڭىز تاسىمالىنىڭ تۇراقسىزدىعى مەن جوعارى قۇنى قازاقستاننىڭ كولىك دالىزدەرىنىڭ قۋاتىن ەداۋىر ارتتىراتىنىن اتاپ ءوتتى.
«كەيىنگى 5 جىلدا ءترانزيتتىڭ جىل سايىنعى ءوسىمى ورتا ەسەپپەن 31 پايىزدى قۇرادى. بىلتىر رەكورد ورنادى. ياعني ترانزيت 1 ملن جفە-دەن (كونتەينەرلەردەن) استى. بۇل ناتيجەگە ۇكىمەت پەن قتج-نىڭ جوسپارلى جۇمىسى ارقىلى قول جەتكىزىلدى. ترانزيتتىك تاسىمالداردان تۇسەتىن كىرىس رەتتەلەتىن قاتىناستارداعى شىعىنداردى جابۋدى, جولاۋشىلار تاسىمالىن سۋبسيديالاۋدى, تاريفتەردىڭ ءوسۋىن تەجەۋدى قامتاماسىز ەتەدى», دەدى ول.
بۇل رەتتە سامات اقىشەۆ, تەمىر جول تاسىمالدارى نارىعىنداعى نەگىزگى ويىنشى مارتەبەسىنە قاراماستان, سالانىڭ باسەكەگە قابىلەتىن ارتتىرۋ ءۇشىن «قازاقستان تەمىر جولى» كولىك جانە لوگيستيكالىق قىزمەتتەر سالاسىنا جەكە كومپانيالاردى كەڭىنەن تارتۋعا ىقپال ەتۋگە ءتيىس دەپ ەسەپتەيدى.
«قتج ءبىر ىڭعايلى مەحانيزمدى پىسىقتاۋى قاجەت. بۇل مەحانيزم قتج-عا اۋىرتپاشىلىق تۇسىرەتىن مىندەتتەردى ورىنداۋعا بيزنەستى ىنتالاندىرۋعا ءتيىس. اشىق جانە ءادىل ويىن ەرەجەلەرىن قالىپتاستىرۋ كەرەك. تۇپتەپ كەلگەندە, جۇك تاسىمالى ءتاريفىنىڭ ءار ادامعا قاتىسى بار», دەدى كوميتەت توراعاسى.
وتىرىس قورىتىندىسى بويىنشا, كەڭەس بەيىندى ورتالىق اتقارۋشى ورگان مەن «قازاقستان تەمىر جولى» ۇلتتىق كومپانيا» اق-عا بىرقاتار ناقتى ۇسىنىم قابىلدادى. اتاپ ايتقاندا, يندۋستريا جانە ينفراقۇرىلىمدىق دامۋ مينيسترلىگى باسەكەلەستىكتى قورعاۋ جانە دامىتۋ اگەنتتىگىمەن جانە باس كولىك پروكۋراتۋراسىمەن بىرلەسىپ, بيزنەستى قورعاۋ جانە جەكە سەكتوردى قولداۋ جونىندە ءتيىمدى شارالار قابىلداۋ قاجەتتىگىنە نازار اۋداردى.
