اتىراۋ. 19 مامىر. اتىراۋ وبلىسى سپورتىنىڭ جاس ورەنى ەۆگەني پوليۆادوۆ گرەك-ريم كۇرەسىنەن كادەتتەر اراسىندا ازيا چەمپيونى اتاندى. بۇل تۋرالى egemen.kz ءتىلشىسى حابارلادى.
وتكەن اپتادا بانگكوكتا گرەك-ريم كۇرەسىنەن كادەتتەر اراسىنداعى ازيا چەمپيوناتى اياقتالدى. وسىناۋ قۇرلىقتىق سايىستا قازاقستان قۇراماسىنىڭ بالۋاندارى ەكى التىن, ەكى كۇمىس جانە ءتورت قولا مەدال ۇتىپ الدى. قوس التىن مەدالدىڭ ءبىرىن ەنشىلەگەن اتىراۋلىق بالۋان ەۆگەني پوليۆادوۆ 69 كيلودا ءتورت قارسىلاسىنان دا باسىم ءتۇسىپ, ازيا چەمپيونى اتاندى. ءسويتىپ, بولاشاعىنان ءۇمىت كۇتتىرگەن جاس بالۋان ە.پوليۆادوۆ قىتايدا وتەتىن كادەتتەردىڭ وليمپيادالىق ويىندارىنا بەرىلەتىن جولدامانى ۇتىپ الدى. كادەتتەردىڭ وليمپيادالىق ويىندارى تامىز ايىندا وتەدى.
ەسكە سالا كەتەيىك, اتىراۋلىق بالۋان بۇعان دەيىن قازاقستان چەمپيوناتىندا جەڭىستىڭ بيىك تۇعىرىنا كوتەرىلگەن ەدى. سونىمەن قاتار, وليمپيادا ويىندارىنىڭ جۇلدەگەرى, داڭقتى بالۋان داۋلەت تۇرلىحانوۆ اتىنداعى حالىقارالىق تۋرنيردە دە جەڭىمپاز اتانىپ ۇلگەردى. ايتقانداي, ەۆگەني پوليۆادوۆتى ءوزىنىڭ اكەسى الەكساندر پوليۆادوۆ جاتتىقتىرادى. ا.پوليۆادوۆ ازيا چەمپيوناتىنىڭ جۇلدەگەرى مەيرامبەك تۇرداليەۆ, قازاقستان چەمپيوندارى نۇرلان مۇقانوۆ, تالعات قازيەۆ جانە فارحاد عيمرانوۆتاي شەبەرلەردى شىڭداعان بەلگىلى باپكەر.
جولداسبەك شوپەعۇل.
دەرەككوز: egemen.kz.
فوتو: egemen.kz.
