«قازىرگى حالىقارالىق احۋال جونىندە قىسقاشا ايتا كەتكىم كەلەدى. وزدەرىڭىز بىلەسىزدەر, الەمدەگى جاعداي ابدەن شيەلەنىسىپ كەتتى. وسىنداي كۇردەلى جاعدايدا قازاقستان حالىقارالىق ۇيىمداردا, ەڭ الدىمەن, بىرىككەن ۇلتتار ۇيىمىندا داۋىس بەرۋ كەزىندە بەيتاراپ ۇستانىمىن ساقتاپ وتىر. بۇل ءبىزدىڭ ۇلتتىق مۇددەمىزگە ساي كەلەدى. جەرىمىزدىڭ بۇتىندىگى جانە ەلىمىزدىڭ اماندىعى – ءبىز ءۇشىن بارىنەن ماڭىزدى. سوندىقتان پاراساتتىلىق پەن سابىرلىلىق تانىتىپ, ارانداتۋشىلاردىڭ جەتەگىندە كەتپەۋىمىز كەرەك», دەدى پرەزيدەنت.
قاسىم-جومارت توقاەۆتىڭ ايتۋىنشا, قازاق حالقىنىڭ ەڭ باستى كۇشى – بىرلىك, پاراساتتىلىق جانە توزىمدىلىك.
«ەگەر وسى قۇندىلىقتاردان ايىرىلىپ قالساق, ەلىمىزگە ۇلكەن قاۋىپ تونەدى. مەملەكەتتەردىڭ تەرريتوريالىق تۇتاستىعى مىندەتتى تۇردە ساقتالۋى كەرەك. بۇل – نەگىزگى قاعيدات. مەن مۇنى حالىقارالىق ارەنادا ۇنەمى اشىق جانە انىق ايتىپ ءجۇرمىن. جاقىندا بىرىككەن ۇلتتار ۇيىمىنا بارىپ, ەڭ بيىك مىنبەردەن بۇل تۋرالى تاعى دا مالىمدەدىم. بۇنىڭ ءبارى بەكەر ەمەس. اينالامىزدا اۋقىمدى سوعىس بولىپ جاتىر. ءبىز وسىنى ەسكەرە وتىرىپ, ەڭ الدىمەن, ەلىمىزدىڭ قاۋىپسىزدىگىن ويلاۋىمىز كەرەك», دەپ اتاپ ءوتتى مەملەكەت باسشىسى.
ەل پرەزيدەنتى ءوز سوزىندە قازاقستان ىرگەلەس ەلدەرمەن ءاردايىم تاتۋ بولۋى كەرەك ەكەنىن ايتتى.
«قازاقتا «كورشىمەن تاتۋدىڭ كوڭىلى توق» دەگەن ءسوز بار. ەڭ باستىسى, ىرگەلەس ەلدەرمەن تاتۋ بولۋىمىز كەرەك. بۇدان ەش ۇتىلمايمىز. سوڭعى كۇندەرى كورشى ەلدەن, ياعني رەسەيدەن كوپتەگەن ادام كەلە باستادى. كوپشىلىگى قازىرگى احۋالعا بايلانىستى امالدىڭ جوقتىعىنان كەلىپ جاتىر. ولارعا قامقورلىق كورسەتىپ, قاۋىپسىزدىگىنە ءمان بەرۋىمىز قاجەت. بۇل – ساياسي جانە گۋمانيتارلىق ماسەلە. وسى ماسەلەنى مەن ۇكىمەتكە تاپسىردىم. جالپى وسىنداي كۇردەلى جاعدايدا ءبىز ەڭ الدىمەن ادامگەرشىلىك, سابىرلىق, ۇيىمشىلدىقتى تانىتۋىمىز كەرەك. بىزدە ەشقانداي داعدارىس جوق, دۇربەلەڭ دە جوق. ۇكىمەت ءوز جۇمىسىن اتقارۋى كەرەك. سىرتتان كەلگەن ادامدارعا كومەك كورسەتىلەدى, بىراق جەڭىلدىكتەر بەرىلمەيدى. جۇمىستىڭ ءبارى زاڭ بويىنشا, كەلىسىمدەر بويىنشا جۇرگىزىلەدى», دەپ ناقتىلادى قاسىم-جومارت توقاەۆ.
مەملەكەت باسشىسى جاقىن ارادا رەسەيمەن ءتيىستى كەلىسسوزدەر جۇرگىزىلەتىنىن جەتكىزدى.
ء«بىز رەسەي تاراپىمەن كەلىسسوزدەر جۇرگىزىپ, بۇل تۇيتكىلدى ەلىمىزدىڭ مۇددەسىنە ساي شەشەمىز. تاعى دا قايتالاپ ايتامىن, وسىنداي الماعايىپ كەزەڭدە بىزگە, ەڭ الدىمەن, بەرەكە-بىرلىك قاجەت. ەلدىڭ تىنىشتىعىن ساقتاي بىلسەك, تۇراقتى دامي الامىز. بارلىق ماسەلەنى بايىپپەن تالقىلاپ, اقىلمەن شەشۋىمىز كەرەك», دەپ تۇيىندەدى پرەزيدەنت.
