«بيلىك پەن قوعام اراسىنداعى ديالوگ نىعايا ءتۇستى. «حالىق ۇنىنە قۇلاق اساتىن مەملەكەت» تۇجىرىمداماسىنا باسا ءمان بەرىلىپ وتىر. بۇل اۋقىمدى جۇمىستى بۇكىل قوعامىمىز بىرلەسە اتقاردى. دەگەنمەن, وسىمەن توقتاپ قالۋعا بولمايدى», دەدى مەملەكەت باسشىسى.
پرەزيدەنت وسى سارا جولدان تايقىماي, ىلگەرى ءجۇرۋ كەرەك ەكەنىن جەتكىزدى.
«تاعى ءبىر اسا ماڭىزدى رەفورما – پرەزيدەنتتىڭ ءبىر عانا مەرزىمگە سايلانۋى. ءبىزدىڭ ايماقتاعى قاي مەملەكەتتى الىپ قاراساڭىز دا, مۇنداي وزگەرىس مۇلدەم بولماعان. سوندىقتان بۇل رەفورما دەموكراتيا جولىنداعى باتىل قادام دەپ سەنەمىن. تاۋەكەلگە بەل بۋساق تا, وسىنداي شەشىم حالقىمىزدىڭ جارقىن بولاشاعى ءۇشىن كەرەك دەپ كامىل سەنەمىن», دەدى قاسىم-جومارت كەمەل ۇلى.
سونداي-اق ول بۇل رەفورما نە ءۇشىن جاسالماقشى دەگەن سۇراققا دا جاۋاپ بەرە كەتتى.
«ماسەلە مىنادا: پرەزيدەنتتىك لاۋازىمعا كوپ جىل بويى ءبىر عانا ادام يە بولماۋى كەرەك. الەمدە بولسىن, ءبىزدىڭ ەلىمىزدە بولسىن كوپ جىل بويى ءبىر عانا ادام ەڭ جوعارى لاۋازىمعا يە بولسا, مۇنداي جاعداي ەلگە دە, مەملەكەت باسشىسىنا دا ابىروي اكەلمەيدى. ءبىز بولاشاققا نىق سەنىممەن قاراپ, ادال, دارىندى ساياساتكەرلەرگە جول اشۋىمىز كەرەك. جالپى, جۇرت ءبىزدىڭ ساياسي جۇيەنى وزگەرتۋ تۋرالى جوسپارىمىزدىڭ ءمان-ماڭىزىن جاقسى ءتۇسىنىپ وتىر», دەدى پرەزيدەنت.
ەسكە سالايىق, كەزەكتەن تىس پرەزيدەنت سايلاۋى بيىلعى 20 قاراشاعا بەلگىلەنگەن. وسى رەتتە پرەزيدەنت بۇل ناۋقان زاڭعا سايكەس, ءادىل جانە اشىق وتەتىنىنە كەپىلدىك بەردى.
«تۇركىستاندىقتار دا سايلاۋعا بەلسەنە قاتىسىپ, ءوز تاڭداۋىن جاسايدى دەپ سەنەمىن. وتانىمىزدىڭ بولاشاعىنا ءبارىمىز بىردەي جاۋاپتىمىز. سوندىقتان بارشاڭىزدى ەل تاعدىرىنا بەي-جاي قاراماۋعا شاقىرامىن. ادىلەتتى قازاقستاندى بىرگە قۇرايىق! تۇركى الەمىنىڭ بويتۇمارى – تۇركىستان كوركەيە بەرسىن!», دەدى ءسوز سوڭىندا مەملەكەت باسشىسى.
