«جاقىندا استانادان باستاۋ العان « ۇلى دالا جورىعى» ساناۋلى كۇننەن سوڭ تۇركىستاندا ءوز مارەسىنە جەتەدى. مۇنىڭ زور سيمۆولدىق ءمانى بار. وسى وڭىردە حالقىمىزدىڭ سالت-ءداستۇرى, ادەت-عۇرپى بارىنشا ساقتالعان. ءبىر سوزبەن ايتقاندا, تۇركىستان – حالقىمىزدىڭ قايماعى بۇزىلماعان قاسيەتتى مەكەنى», دەدى قاسىم-جومارت توقاەۆ.
بۇدان سوڭ, پرەزيدەنت كيەلى وڭىردە ۇرپاققا جول كورسەتىپ, تاعىلىمدى تاربيە بەرەتىن داناگوي اقساقالداردىڭ ورنى بولەك ەكەنىن ايتتى.
«قازاق «قارياسى بار ەلدىڭ قازىناسى بار» دەيدى. تۇركىستاندا ۇرپاققا جول كورسەتىپ, تاعىلىمدى تاربيە بەرەتىن داناگوي اقساقالدارىمىز از ەمەس. ولار ءتۇرلى جاعداي كەزىندە جۇرتتى سابىرعا شاقىرادى. جاستارعا باسۋ ايتىپ, كيكىلجىڭگە جول بەرمەيدى. وسىنداي اۋزى دۋالى ەل اعالارىنا زور العىس ايتامىن», دەپ اتاپ ءوتتى مەملەكەت باسشىسى.
جيىن بارىسىندا قاسىم-جومارت توقاەۆ تۇركىستانعا دەگەن ەرەكشە ىقىلاسىن ءبىلدىردى.
«مەنىڭ قاسيەتتى تۇركىستانعا ىقىلاسىم ەرەكشە ەكەنىن بىلەسىزدەر. مەملەكەت باسشىسى رەتىندە العاشقى ساپارىمدى ءدال وسى جەردەن باستاعان ەدىم. سودان بەرى مۇندا كوپتەگەن وڭ وزگەرىس بولدى. سوڭعى جىلدارى تۇركىستانعا تارتىلعان ينۆەستيتسيا كولەمى 8 ەسە ارتتى. قالانىڭ ينفراقۇرىلىمى جاڭعىرىپ, جاڭا نىساندار بوي كوتەرىپ جاتىر. اتاپ ايتقاندا, 77 مىڭ ادامعا ارنالعان كوپ قاباتتى ۇيلەر سالىندى. شاھار جاسىل جەلەككە ورانىپ, ەكولوگيالىق احۋالى جاقساردى. تۇرعىنداردى اۋىزسۋمەن جانە تابيعي گازبەن قامتاماسىز ەتۋ ماسەلەسى شەشىلدى دەپ ايتۋعا بولادى», دەدى قازاقستان پرەزيدەنتى.
