استانانىڭ سانكت-پەتەربۋرگتەگى مادەنيەت كۇندەرى اياقتالدى

استانا. 19 مامىر. سانكت-پەتەربۋرگتەگى استانا كۇندەرى جوعارى دەڭگەيدە ءوتتى. بۇل تۋرالى astana.kz حابارلادى. استانا قالاسىنىڭ اكىمى يمانعالي تاسماعامبەتوۆ: «سانكت-پەتەربۋرگتىڭ استانا قالاسىنداعى كۇندەرى جانە استانانىڭ سانكت-پەتەربۋرگتەگى كۇندەرى  اسا ماڭىزدى شارالار. ولار حالىقتاردىڭ رۋحاني الەمىمەن تەرەڭ تانىسۋعا مۇمكىندىك بەرەدى», – دەدى. ايتۋلى شارا كەزىندە پيتەرلىكتەر ەلىمىزدىڭ مادەنيەتىمەن تەرەڭ تانىستى. ارنايى قۇرىلعان ەتنواۋىلدا  كەلۋشىلەرگە ۇلتتىق تاعامدارىمىز ۇسىنىلدى. سونداي-اق, جەرگىلىكتى تۇرعىندارى جىر ءدۇلدىلى جامبىل جاباەۆتىڭ ەسكەرتكىشىنە گۇل قويۋ راسىمىنە قاتىستى. بۇدان بولەك, «استانا» ساۋدا-ىسكەرلىك كەشەنىنىڭ قۇرىلىسى جۇرگىزىلەتىن ورىنعا كاپسۋلا سالىندى. بۇل كەشەن ەكى جاقتىڭ سەرىكتەستىك قارىم-قاتىناسىن ودان ءارى نىعايتىپ, ءوزارا قۇرمەتتى ۇرپاقتان-ۇرپاققا جەتكىزۋگە سەپتىگىن تيگىزەدى دەپ ەسەپتەلىنۋدە. تاعى ءبىر ايتا كەتەرلىك ءجايت, اتالعان مادەني كۇندەر شەڭبەرىندە سانكت- پەتەربۋرگ تۇرعىندارى «جۋسان ءيىسى» اتتى بەينەلەۋ ونەرى كورمەسىن تاماشالادى. مۇندا جۇرتشىلىق ۇلتتىق رۋحىمىز بەن ونىڭ ەرەكشەلىكتەرىنە نازار اۋداردى. كوپشىلىك نازارىنا قازىرگى زامانعى قازاقستاندىق سۋرەتشىلەردىڭ ەڭبەكتەرى ۇسىنىلدى. ال «اstana Ballet» كەشىندە قازاقستاننىڭ ۇلتتىق حورەوگرافياسى كورسەتىلدى. كونتسەرتتە «قارلىعاش», «اققۋ», «قىز جىبەك», «شاتتىق», «قازاق ۆالسى» جانە تاعى باسقا دا بيلەر ورىندالدى. سونىمەن قاتار, استانانىڭ سانكت- پەتەربۋرگتەگى كۇندەرى اياسىندا «Smart Astana» جوباسىن ينۆەستيتسيالاۋ پەرسپەكتيۆالارى» تاقىرىبىندا دوڭگەلەك ۇستەل وتىرىسى وتكىزىلدى. سونداي-اق, استانالىقتار «سلاۆيان جارمەڭكەسى» فەستيۆالى مەن «پەتەرگوف» مەملەكەتتىك مۇراجايىمەن تانىستى. شارا بارىسىندا ەكى قالا باسشىلىعى ەكى جىلعا ارنالعان ىنتىماقتاستىق تۋرالى كەلىسىمگە قول قويدى. جولدىباي بازار. دەرەككوز: astana.kz. فوتو: astana.kz.