ەلىمىزدە كەزەكتەن تىس پرەزيدەنت سايلاۋى وتەتىن كۇن بەلگىلى بولدى. الدا ۇلكەن وزگەرىستەر كۇتىپ تۇر. پرەزيدەنت سايلاۋىنان كەيىن پارلامەنت, جەرگىلىكتى ءماسليحات سايلاۋلارى دا, ۇكىمەت قۇرامىن قايتا جاساقتاۋ سەكىلدى اۋقىمدى شارالار كۇن تارتىبىندە تۇر. مەملەكەت باسشىسى حالىققا جاساعان ۇندەۋىندە وسىنىڭ ءبارى دەموكراتيا جولىمەن, ءادىل سايلاۋ ارقىلى جۇزەگە اسىرىلاتىنىن ايتتى.
قاراپايىم حالىق ادالدىقتى, ادىلدىكتى ارمان ەتەدى. پاتشالاردىڭ قارا قىلدى قاق جارعان ادىلەتتى, تۋراشىل بولعانىن قالايدى. مەملەكەت باسشىسىن نەگە حالىق بولىپ سايلايدى؟ ويتكەنى سول حالىقتان اقىلدى, ءبىلىمدى, كوزقاراسى بەرىك, تالابى مىقتى ادامدى تاڭداپ العىسى كەلەدى. سولاي بولۋى كەرەك تە. سوندا عانا پرەزيدەنتتەر حالىقتىڭ يگىلىگىن ويلايدى.
ەل ىشىندە «ەسكى كادرلارمەن جاڭا قازاقستاندى قالاي قۇرامىز؟» دەگەن ويلار ايتىلىپ ءجۇر. ورىندى پىكىر. سويتسە دە ەسكىنىڭ ءبارىن ءبىر ساتتە سىپىرىپ تاستاپ, تۇگەل جاڭالايىن دەپ وتىرعان ەشكىم جوق. حالىق اراسىندا تاجىريبەلى, ويلى, حالىققا شىن جاناشىر, مەملەكەت مۇددەسىن ويلايتىن, ادال قىزمەت ەتەتىن, ادىلەتتى جولمەن بيلىككە كەلە الاتىن ازاماتتار بارشىلىق.
وسى جولى حالىق پرەزيدەنت سايلاۋىندا ۇلكەن بەلسەندىلىك تانىتادى دەپ سەنەمىن. جۇرتشىلىق بۇدان بىلاي پرەزيدەنتتى ەكى رەت سايلاۋعا جول بەرمەيدى. بۇل نورما كونستيتۋتسيادا انىق ايتىلعان. ەندى جاڭا ساياسي پارتيالار بەلسەندى شىعا باستايدى. بۇل دەگەنىڭىز, الداعى ۋاقىتتا ءبىر-بىرىمەن باسەكەلەسە الاتىن ساياسي ۇيىمدار ءوز كانديداتتارىنىڭ اراسىنان مىقتى تۇلعالاردى العا تارتادى دەگەن ءسوز. اتا زاڭعا سايكەس پرەزيدەنت ءبىر رەت قانا سايلاناتىن بولسا, ەسكىگە, ادىلەتسىزدىككە جول بەرىلمەيدى. دەمەك الداعى جەتى جىلدا قازاقستاندا ۇلكەن وزگەرىستەر بولادى.
پرەزيدەنت سايلاۋىنا ءوزىن-ءوزى ۇسىناتىن, ءتىپتى پارتيادا جوق ازاماتتار دا سايلاۋعا تۇسە الادى. ول مۇمكىن, دەپۋتات, مينيستر, قوعام قايراتكەرى دە, ءتىپتى قاراپايىم, ويى بار ازامات تا بولۋى مۇمكىن. مەنىڭشە, پرەزيدەنت مەملەكەتتىك ءتىلدى جەتىك مەڭگەرگەن, ەلدىڭ دامۋىنا, مەملەكەتتىڭ قاۋىپسىزدىگىنە, قازاقستان حالقىنا ءادىل دە ادال, جان-تانىمەن قىزمەت ەتۋگە دايىن ازامات بولۋعا ءتيىس.
پرەزيدەنت سايلاۋى – ەلىمىزدەگى ەڭ باستى ساياسي وقيعا. بۇل سايلاۋعا كەز كەلگەن وپپوزيتسيالىق كۇشتەر دە قاتىسادى. بۇل ناعىز دەموكراتيالىق كورىنىس. ءاربىر ساياسي پارتيا كۇرەسكە دايىن بولۋعا ءتيىس. «ەلدىڭ بۇكىل ساياسي جۇيەسىن تۇبەگەيلى وزگەرتەمىز», دەدى ق.توقاەۆ. دەمەك بۇكىل قۇرام جاڭارادى. سەنىم مانداتى حالىق سەنىمىنە جۇمىس ىستەيدى. وسىدان بارىپ حالىق سەنەتىن بيلىك, الەۋمەتتىك ادىلەتتىلىك قالىپتاسۋى كەرەك. ەكونوميكالىق ساياسات دۇرىس بولسا, ول ەلدىڭ دامۋىن جاڭا ساتىعا كوتەرەدى.
مىقتى باسەكەلەس بولا الاتىن, سايلاۋالدى باعدارلامالارى ءوتىمدى, سەنىمدى ۇمىتكەر عانا حالىقتان قولداۋ تابادى. حالىق ءادىل سايلاۋدى كۇتەدى.
ساياسات بەيىسباي,
فيلوسوفيا, ساياساتتانۋ جانە ءدىنتانۋ ينستيتۋتىنىڭ باس ساراپشىسى
