استانادا ساياسي قۋعىن-سۇرگىن قۇرباندارىن ەسكە الۋ كۇنى كەڭىنەن اتالىپ وتەدى

استانا. 19 مامىر. 31 مامىردا استانادا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى قارساڭىندا ءتۇرلى شارالار ۇيىمداستىرىلادى. بۇل تۋرالى astana.kz حابارلادى. ەل تاريحىنداعى قارالى كۇندەردى, تاعدىردىڭ تالايىمەن اشارشىلىققا, ساياسي قۋعىن-سۇرگىنگە ۇشىراعان بوزداقتاردى جادىمىزدان وشىرمەۋگە ءتيىستىمىز. سوندىقتان, 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي استانادا كوپتەگەن شارالار جۇزەگە اسىرىلادى. اتالعان سايتتا حابارلانعانداي, الجير مۇراجايىنداعى «ەسكە الۋ قابىرعاسىنا» جانە 1932-33 جىلدارداعى اشارشىلىق قۇرباندارىنا ارنالعان مونۋمەنتكە گۇل قويۋ ءراسىمى جانە ميتينگ ۇيىمداستىرىلادى. بۇدان بولەك, ساكەن سەيفۋللين اتىنداعى مۇراجايدا «ارماندا كەتكەن ارىستار» تاقىرىبىندا ەكسكۋرسيالار وتەدى. ال ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا ش.ايتماتوۆتىڭ «عاسىردان دا ۇزاق كۇن» سپەكتاكلى قويىلادى. بۇعان قوسا, تاۋەلسىزدىك سارايىندا كوپشىلىككە «تەرريتوريانى جوقتاۋ» اتتى كورمە ۇسىنىلادى. بۇل كورمە تامىز ايىنىڭ ورتاسىنا دەيىن جالعاسپاق. جولدىباي بازار. دەرەككوز: astana.kz. فوتو: i-news.kz.