استانا. 19 مامىر. تۇركيا پوليتسياسى 13 مامىردا سوما قالاسى ماڭىنداعى كومىر شاحتاسىندا ورىن العان اپاتقا بايلانىستى 18 ادامدى تۇتقىنعا الدى. بۇل تۋرالى Lenta.ru حابارلادى.
قاماۋعا العانداردىڭ اراسىندا شاحتانىڭ قوجايىندارى دا بار كورىنەدى. ۇستالعانداردىڭ بارلىعىنا قىزمەتىنە سالعىرت قاراعان دەگەن ايىپ تاعىلۋدا. ەستەرىڭىزگە سالا كەتەيىك, 13 مامىردا تۇركيانىڭ سوما قالاسى ماڭىنداعى كومىر شاحتاسىندا جارىلىس بولعان. رەسمي دەرەكتەرگە قاراعاندا, ىزدەۋ جۇمىستارى ناتيجەسىندە 485 جۇمىسشى قۇتقارىلعان. ال اپات سالدارىنان 301 ادام قازا بولعان. بۇل اپاتتان كەيىن تۇركيانىڭ كوپتەگەن قالالارىندا قارسىلىق اكتسياسى ءوتتى. وعان قاتىسۋشىلار ەل ۇكىمەتىن كەنشىلەردىڭ قاۋىپسىزدىگىن ءتيىستى دەڭگەيدە قامتاماسىز ەتە الماۋدا دەپ ايىپتادى. ايدار ورىسباەۆ. دەرەككوز: Lenta.ru. فوتو: Polit.ru.
