ەركىن ساۋدا ايماعىن قۇرۋ تۋرالى كەلىسىم جاسالۋدا

استانا. 19 مامىر. ەكونوميكا جانە بيۋدجەتتىك جوسپارلاۋ مينيسترلىگى ۆەتنام, جاڭا زەلانديا, كەدەن وداعى جانە ەۋروپالىق ەركىن ساۋدا قاۋىمداستىعى مەملەكەتتەرىمەن ەركىن ساۋدا ايماعىن قۇرۋ تۋرالى كەلىسسوزدەر جۇرگىزۋدە. بۇل تۋرالى primeminister.kz حابارلادى. ورتالىق كوممۋنيكاتسيالار قىزمەتىندە وتكەن بريفينگتە ەكونوميكا جانە بيۋدجەتتىك جوسپارلاۋ مينيسترلىگى سىرتقى ساۋدا قىزمەتىن دامىتۋ دەپارتامەنتى ديرەكتورىنىڭ مىندەتىن اتقارۋشى ءاليا الىمبەتوۆا: «ينۆەستيتسيالار مەن ساۋدا قاتىناستارىن دامىتۋ ماقساتىندا كەدەن وداعى ەلدەرىمەن  ەركىن ساۋدا ايماعىن قۇرۋ تۋرالى كەلىسىم جاساپ جاتىرمىز. بۇل ەركىن ساۋدا ايماعىن قۇرۋعا  ۆەتنام, جاڭا زەلانديا, ەۋروپالىق ەركىن ساۋدا قاۋىمداستىعى ەلدەرى:نورۆەگيا, شۆەيتساريا, ليحتەنشتەين جانە يسلانديا قاتىسادى», – دەدى. ونىڭ سوزىنە قاراعاندا, جۇرگىزىلىپ جاتقان كەلىسسوزدەر ناتيجەسىندە ينۆەستيتسيالار تارتۋعا, سىرتقى ساۋدا قىزمەتىن دامىتۋعا جانە قازاقستاندىق ونىمدەردىڭ بەلگىلەنگەن ەلدەردىڭ نارىقتارىنا شىعۋىنا قول جەتكىزىلەدى. سونداي-اق,  ەكونوميكا جانە بيۋدجەتتىك جوسپارلاۋ مينيسترلىگى ەۋروپا وداعىمەن كەڭەيتىلگەن سەرىكتەستىك جانە ىنتىماقتاستىق تۋرالى جاڭا قۇجاتقا قول قويۋ ماقساتىندا ءتيىستى جۇمىستار جۇرگىزۋدە. قازاقستان – قازىرگى كەزدە ەۋروپالىق وداقپەن تىڭ بايلانىسقا شىققان ورتالىق ازياداعى جالعىز ەل. جولدىباي بازار. دەرەككوز: primeminister.kz. فوتو: News.headline.kz.