فۋتبول • 26 قىركۇيەك، 2022

ءالىپ ازەربايجاننىڭ جەڭىسىنە «كومەكتەستى»

51 رەت كورسەتىلدى

فۋتبولدان ۇلتتار ليگاسىنىڭ ءۇشىنشى ماۋسىمى قازاقستان قۇراماسى ءۇشىن ءساتتى اياقتالدى. ايتۋلى ءتۋرنيردىڭ الدىڭعى ەكى ماۋسىمىندا ءىلىنىپ-سالىنىپ ونەر كورسەتكەن جەرلەستەرىمىز بيىل ەر كەزەگى ۇشكە دەيىن دەگەن ۇستانىمدى باسشىلىققا الىپ، ۇلتتار ليگاسىنداعى باستى ماقساتىنا قول جەتكىزدى. ءوز توبىندا ءبىرىنشى ورىن الىپ، «ۆ» ليگاسىنا تىكەلەي جولداماعا يە بولدى. جىل باسىندا عانا «D» ديۆيزيونىنا ءتۇسىپ قالۋدىڭ از-اق الدىندا تۇرعان ۇلتتىق قۇراما ۇلاندارى ارادا التى اي وتكەندە جانكۇيەرلەرگە زور قۋانىش سىيلادى.

«س» ديۆيزيونىنىڭ ءۇشىنشى توبىندا بەلارۋس، سلوۆاكيا جانە ازەربايجانمەن بىرگە ونەر كور­سەتكەن قازاقستان ۇلتتىق قۇ­راماسى سوڭعى تۋرعا دەيىن ءتورت ويىندا جەڭىسكە جەتىپ، ءبىر ماتچتا تەڭ ناتيجەگە قول جەتكىزدى. وسى­لايشا، مەرزىمىنەن بۇرىن ماقساتى ورىندالعان جەرلەستەرىمىز جە­ڭىسپەن باستالعان ءتۋرنيردى جە­ڭىسپەن اياقتاۋعا ۇمتىلعان ەدى. بىراق بەسىنشى تۋرداعى جەڭىستىڭ ەي­فورياسى سوڭعى تۋردىڭ ماتچىنا كەرى اسەرىن تيگىزىپ، ۇلتتار ليگاسىن بىلاي قويعاندا، بيىلدىققا ءبىرىنشى رەت جەڭىلىستىڭ كەرمەكۋ ءدامىن تاتتى. ازەربايجانعا ساپار شەككەن ۇلتتىق قۇراما وكىلدەرى باكۋدەگى باسەكەدە الاڭ يەلەرىنەن 0:3 ەسەبىمەن جەڭىلىپ قالدى.

نەگىزى ءبىزدىڭ جىگىتتەردىڭ ازەر­بايجانمەن ەڭ قۇرىعاندا تەڭ ويناۋعا تولىق مۇمكىندىگى بار ەدى. الايدا قورعاۋشى ءنۇرالى ءالىپتىڭ بولمايتىن جەردە قىزبالىققا سالىنىپ، ويىن ەرەجەسىن ورەسكەل بۇزۋى ۇلتتىق قۇرامانىڭ ءىرى جە­ڭىلىسىنە الىپ كەلدى. ماتچتىڭ 30-مي­نۋتىندا-اق «زەنيتتىڭ» قور­­عاۋشىسى تورەشى تاراپىنان «قى­زىل قاعازبەن» جازالانىپ، ءبىرىنشى تايمدا ارىپتەستەرىن قيىن جاعدايعا قالدىردى. «استانا ارەنادا» بەلارۋس قۇراماسىمەن وتكەن تاريحي ماتچتان كەيىنگى ءباسپاسوز ءماسليحاتىندا جۋرناليس­تەر مي­حايل گابىشەۆتەن: «ما­گومەد اديەۆ تاكتيك باپكەر مە، الدە موتي­ۆاتور ما؟» دەگەن سۇراق قويدى. سوندا گابىشەۆ: «ول كوبىنە بىزگە قاجەتتى سوزدەردى تاۋى­پ ايتادى. سوعان قاراعاندا، موتيۆاتور باپكەر سياقتى»، دەپ جاۋاپ بەرگەن ەدى. ءيا، اديەۆ جىگىتتەردىڭ ويىنىنا وزگەرىس اكەلگەن مىقتى موتيۆاتور باپكەر شىعار، بىراق ەندى وعان قوسىمشا پسيحولوگ ما­ماندىعىن دا مەڭگەرۋگە تۋرا كەلىپ تۇر. ويتكەنى ءدال قازىرگى ۋا­­قىتتا ءبىزدىڭ جىگىتتەرگە ەۋرو­پا­لىق مىنەز، جەڭىمپازدىق رۋح جە­تىس­پەيدى. ايتپەسە، كەشەگى ويىن­دا ۇلتتىق قۇراما تەڭ ناتي­جە كورسەتىپ، ۇلتتار ليگاسىن جو­عا­رى نوتادا اياقتاۋعا ءتيىس ەدى. ءبىر قا­­تەلىكتىڭ سالدارى ءبىر ويىنعا عانا كەرى اسەرىن تيگىزسە مەيلى عوي، ەندى ن.ءالىپ كەلەسى جىلى ەۋروپا چەم­پيوناتىنا جولداما بەرەتىن پلەي-وفف ماتچىنىڭ العاشقىسىنا قاتىسا المايدى.

الايدا ءار نارسەنىڭ ءوز قايىرى بار ەمەس پە؟! وسى جەڭىلىستىڭ ءوزى باس باپكەرگە قاي باعىتتا جۇمىس ىس­تەۋ كەرەك ەكەنىن ايقىنداپ بەردى. ونى ماگومەد اديەۆتىڭ ءوزى دە مو­يىن­داپ وتىر.

– بۇگىنگى جەڭىلىس ماعان اۋىر ءتيدى. ءبىر جاعىنان وسىلاي بول­عا­نىنا دا قۋانىشتىمىن. ءارى قاراي دامۋ ءۇشىن ويلاناتىن جانە تالداۋ جاسايتىن دۇنيەلەردىڭ بار ەكەنىنە كوز جەتكىزدىك. جالپى العاندا، تۋرنير كەستەسىندەگى پوزيتسيامىز بەن جەتكەن جەتىستىگىمىزگە كوڭىلىم تولادى. ءبىز ءۇشىن بۇل – ۇلكەن قادام. بۇگىنگى جەڭىلىس وسال تۇستارىمىزدىڭ بار ەكە­نىن كورسەتتى، – دەدى باس باپ­كەر ماتچ­­تان كەيىنگى ءباسپاسوز ءماس­ليحا­تىندا.

ءبىزدىڭ توپتاعى ەكىنشى ويىندا سلوۆاكيا ءوز الاڭىندا بەلا­رۋس قۇراماسىن قابىلداپ، 1:1 ەسە­بىمەن تەڭ ءتۇستى. ويىنداعى ەسەپتى ءبىرىنشى بولىپ قوناقتار اش­قانىمەن، ەكىن­شى تايمدا الاڭ يە­لەرى تارازى باسىن تەڭەستىرىپ ۇل­گەردى.

وسىلايشا، «س» ديۆيزيونىنىڭ ءۇشىنشى توبىندا قازاقستان قۇرا­ماسى التى ويىندا 13 ۇپاي جي­ناپ، ءبىرىنشى ورىنعا تابان تىرەدى. ەكىنشى ورىندى 10 ۇپايى بار ازەربايجان قۇراماسى يەلەنسە، فيفا رەيتينگىندە توپ-50 قۇرا­مانىڭ قاتارىندا جۇرگەن سلو­ۆاكيا ءۇشىنشى ورىنعا ءتۇسىپ قالدى. ەنشىسىندە 7 ۇپاي بار. ال بەلارۋس ءۇش ۇپايمەن سوڭعى ورىنعا جايعاستى. ەندى ولار «س» دي­ۆيزيونىنداعى ورنىن ساقتاپ قالۋ ءۇشىن ەلەكتى ماتچ وتكىزەدى.

سوڭعى جاڭالىقتار

پرەزيدەنت جامبىل وبلىسىنا باردى

قازاقستان • بۇگىن، 11:43

ۇقساس جاڭالىقتار