تاريحي مەكەن ماحامبەت اۋدانىنداعى سارايشىق قالاشىعىنان 25 شاقىرىم جەردە ورنالاسقان. اۋماعى – 1 گەكتار. بۇل قالاشىقتىڭ ورنىندا «سارايشىق» مەملەكەتتىك مۋزەي-قورىعىنىڭ عالىمدارى ارحەولوگيالىق قازبا جۇمىستارىن جۇرگىزىپ جاتىر. وعان رەسەيدەن كەلگەن عالىمدار دا تارتىلعان.
ارحەولوگتەر كونە قالاشىقتى زەرتتەۋ ماقساتىنداعى قازبا جۇمىسى كەزىندە مازارعا ۇقساس نىساندى تاپتى. ءبىر ەرەكشەلىگى, بۇل نىساننىڭ ىرگەتاسى, تومەنگى قاباتى وسى كەزگە دەيىن بۇزىلماي, سول كۇيىندە ساقتالىپتى.
– قالاشىق قۇندى جادىگەرلەرگە تولى ەكەن. ارحەولوگتەرىمىز قىش قۇمىرالاردىڭ سىنىعىن, ورتا عاسىرلارعا ءتان جادىگەرلەردى, ءحىV عاسىردىڭ تيىندارىن تاۋىپ وتىر. بۇل – تاۋەلسىز قازاق ەلىنىڭ شەجىرەلى تاريحىنا قوسىلاتىن قۇندى جادىگەرلەر, – دەيدى «سارايشىق» مەملەكەتتىك مۋزەي-قورىعىنىڭ ديرەكتورى ابىلسەيىت مۇحتار.
قازبا جۇمىسىنا قاتىسقان تاريح عىلىمدارىنىڭ دوكتورى, پروفەسسور ماديار ەلەۋوۆتىڭ ايتۋىنا قاراعاندا, سوڭعى ەكى جىلدا 10-عا جۋىق قالاشىق پەن ەلدى مەكەننىڭ ورنى اشىلىپتى. بۇل قالاشىقتار ارقىلى سارايشىق قالاشىعىنان ءۇش باعىتقا شىعاتىن كەرۋەن جولى انىقتالىپ وتىر.
– قازىر قاراعايلى دەگەن جەردەن شاعىن قالاشىقتىڭ ورنى تابىلدى. جەردىڭ بەتىندە جاتقان كونە زاتتاردىڭ سىنىقتارى كوپ. سوعان قاراعاندا, بۇل مەكەننىڭ تىم ارىدەن قوزعايتىن تاريحى بار. مۇنى التىن وردا داۋىرىندەگى قازاق حاندىعىنىڭ قالاشىعى دەپ توپشىلاۋىمىزعا بولادى, – دەيدى ماديار ەلەۋوۆ.
اتىراۋ وبلىسى
