كوشپەلى حالىقتاردىڭ مادەنيەتى مەن سپورتىن جانداندىرۋعا باعىتتالعان سپورتتىق ءىس-شارالار «بولاشاققا جىبەرىلگەن ءداستۇرلى قولتاڭبا» ۇرانىمەن وتەدى. سونداي-اق جارىستار قاتىسۋشى ەلدەر اراسىنداعى مادەني بايلانىستاردى نىعايتۋ جولىمەن الەمنىڭ كوشپەلى حالىقتارىنىڭ مادەنيەتىن ساقتاۋ جانە جاڭعىرتۋ ماقساتىن كوزدەيدى.
الدىڭعى ءۇش ويىندا قازاقستان قۇراماسى بەلسەندى قاتىسىپ, جالپى كوماندالىق ەسەپتە جۇلدەلى ورىندارعا يە بولعان. وتانداستارىمىز 2014 جىلى وتكەن العاشقى ويىنداردا 2-ءشى ورىنعا, ەكى جىلدان كەيىن 3-ءشى ورىنعا, ال 2018 جىلى 2-ءشى ورىنعا تۇراقتادى.
كوشپەندىلەر ويىندارى قارساڭىندا قازاقستان قۇراماسى ەل ىشىندە دە, شەتەلدە دە ارنايى وقۋ-جاتتىعۋ جيىندارىنان ءوتتى.
ۇلتتىق سپورت تۇرلەرى بويىنشا وليمپياداعا الەمنىڭ 100 ەلىنەن 23 سپورت ءتۇرى بويىنشا سپورتشىلار قاتىسادى. كوكپاردان قازاقستاندىق كوماندا قۇرامىنا الەم چەمپيوندارى ۇلان بايتورەەۆ (كوماندا كاپيتانى), ابىلايحان نىشانبەكوۆ جانە «عاسىر ويىنشىسى» اتانعان قۇرمانبەك تۇرعانبەك كىردى.
پالۋانداردىڭ كوشىن قازاق كۇرەسىنەن رەسپۋبليكالىق «قازاقستان بارىسى» ءتۋرنيرىنىڭ جەڭىمپازى – ماقسات يساعابىلوۆ باستايدى.
تۇركيادا جامبى اتۋدان ۇلتتىق قۇراما مۇشەلەرى, ءبىرىنشى الەم چەمپيونى - ەرالحان ايقوز, الەم چەمپيونى – ابزال تۋلىبەكوۆ, ازيا چەمپيونى – باقداۋلەت باباجان ونەر كورسەتەدى.
ءداستۇرلى ساداق اتۋدان دياس احمەتوۆ (قازاقستان كۋبوگىنىڭ جەڭىمپازى), ەربول تاپەنوۆ (الەم كۋبوگىنىڭ كۇمىس جۇلدەگەرى) جانە انگەلا تارىتسا (الەم كۋبوگىنىڭ جەڭىمپازى) ءوز شەبەرلىكتەرىن كورسەتەدى. سونداي-اق تەڭگە ءىلۋ جانە اۋدارىسپاق بويىنشا تاعى ءتورت سپورتشى قاتىسادى.
