حوككەي. الەم چەمپيوناتى. قازاقستان ەليتا ديۆيزيونمەن قوشتاستى

استانا. 18 مامىر. قازاقستان قۇراماسى تۇندە باستالعان مينسكىدەگى الەم چەمپيوناتىنىڭ التىنشى تۋرىندا شۆەيتساريا كومانداسىنان 2:6 بولىپ ۇتىلىپ, ەليتالى ديۆيزيونمەن قوش ايتىساتىن بولدى. بۇل تۋرالى چەمپيونات.رۋ حابارلادى. ءبىزدىڭ جىگىتتەر چەمپيوناتتاعى ەڭ سوڭعى ويىنىن قارقىنسىز باستادى. قارسىلاستار ءۇشىنشى كەزەڭنىڭ ورتاسىنا دەيىن ەسەپتى 6:0-گە جەتكىزدى. سودان كەيىن عانا قازاقستاندىقتار ەكى شايبانىڭ قارىمتاسىن قايتارا الدى. ەندى وتكەن جولعى ەسەبىمىزدەن بەرى وينالعان ويىندار ناتيجەلەرىمەن تانىس بولىڭىزدار: 16 مامىر. شۆەتسيا – سلوۆاكيا 3:1, فينليانديا – شۆەيتساريا 3:2ب. 17 مامىر. فرانتسيا – نورۆەگيا 5:4ب, لاتۆيا – رەسەي 1:4, دانيا – چەحيا 4:3ب, بەلارۋس – گەرمانيا 5:2. ال تۇندە باستالعان التىنشى تۋردىڭ ەكىنشى ويىنىندا سلوۆاكيا يتاليانى 4:1 ەتىپ ۇتتى. قازىر ا توبىندا شۆەتسيا 5 ويىننان 14 ۇپايمەن كوش باستاپ كەلە جاتسا, ۆ توبىندا رەسەي 5 ويىننان بارلىق 15 ۇپايدى الىپ, الدىنا جان سالماي تۇر. دامير قوجامقۇل. دەرەككوز: چەمپيونات.رۋ. فوتو: چەمپيونات.رۋ.