فۋتبول • 23 قىركۇيەك، 2022

توپ باستادى جىگىتتەر «توماعاسىن» سىپىرىپ

117 رەت كورسەتىلدى

قانشاما ساتسىزدىك، قان­شاما سۇرەڭسىز ويىن، ۋىس­تا تۇرىپ سوڭعى سەكۋندتاردا سۋسىپ كەتكەن جەڭىستەر، جان­كۇيەرلەردىڭ كۇيىنىشى... ەل فۋت­بولىنداعى وسىنشا سۇرعىلت كۇندەردى سىپىرىپ تاستاپ، ءبىزدىڭ جىگىتتەر جەڭىسكە جەتتى! ۇلتتار ليگاسىنىڭ «س» توبىن­دا ۇتىمدى ۇپاي جينا­عان قۇرامامىز توپ باستادى!

اتالعان ءتۋرنيردىڭ بەسىنشى تۋرىندا ەلوردادا بەلا­رۋس قۇراماسىن قابىلداعان جەرلەستەرىمىز اسا تار­تىستى وتكەن ماتچتا قارسىلاستارىن 2:1 ەسەبى­مەن ۇتتى. ءبىز بۇل جەڭىستى بەكەرگە تاريحي جە­ڭىس دەپ اتاپ وتىرعان جوقپىز. مۇنىڭ ەكى سەبەبى بار.

ءبىرىنشىسى، قازاقستان مەن بەلارۋس فۋتبولشىلارى بۇگىنگە دەيىن بەس مارتە رەسمي ماتچ وتكىزىپ، سونىڭ تورتەۋىندە قوناقتاردىڭ مەرەيى ۇستەم بولعان ەدى. تەك ءبىر كەزدەسۋدە عانا ەكى ەلدىڭ قۇراماسى تەڭ تارقاسقان. 2009 جىلدان بەرى قازاقستان قۇراماسىنا «برەست قامالىنا» اينالعان بەلارۋس قورعانىسى سىر بەردى. ەكىنشىسى، وسى ءبىر تاماشا جەڭىستەن كەيىن ماگومەد اديەۆ باسشىلىعىنداعى ءبىزدىڭ قۇراما 13 ۇپاي جيناپ، «س» ديۆيزيونىنىڭ ءۇشىنشى توبىندا جەكە-دارا كوش باستادى. بۇعان دەيىن قازاقستاندىق فۋتبولشىلار ۋەفا جانە فيفا اياسىندا وتكەن بىردە-ءبىر تۋرنيردە ءوز توبىندا توپ باستاپ كورمەگەن ەدى.

اتالعان جەڭىس قازاقستان قۇراماسىنا توپتاعى ازەربايجانمەن وتەتىن سوڭعى ويىننىڭ ناتيجەسىنە قاراماي-اق، كەلەسى جىلدان باستاپ «ۆ» ديۆيزيونىندا ويناۋ مۇمكىندىگىن سىيلادى. بۇل دەگەنىمىز، 2024 جىلى وتەتىن ەۋروپا چەمپيوناتىنا قاتىسۋ مۇمكىندىگىمىز جوعارىلايدى دەگەن ءسوز. تارقاتىپ ايتار بولساق، «ۆ» ديۆيزيونىندا ەۋروپا قۇرلىعىنىڭ ورتا دەڭگەيلى 16 قۇراماسى 4 توپقا ءبولىنىپ وينايدى. ءار توپتىڭ جەڭىمپازى كەلەسى جىلى ءوزارا پلەي-وفف باسەكەسىن وتكىزەدى. ءسويتىپ، ءتورت مىقتىنىڭ اراسىنان قارا ءۇزىپ شىققان ەكى قۇراما 2024 جىلعى كارى قۇرلىق بىرىنشىلىگىنىڭ فينالدىق كەزەڭىنە جولداما الادى.

30 مىڭعا جۋىق جانكۇيەر تاماشالاعان ەلورداداعى ماتچقا توقتالار بولساق، قازاق­ستان ۇلتتىق قۇراماسىنىڭ باس باپ­كەرى ماگومەد اديەۆ ماۋسىم ايىنداعى ويىنداردا الاڭعا شىققان نەگىزگى قۇرام­مەن سالىستىرساق، اسا كوپ وزگەرىس جاساي قويعان جوق. قاقپانى ادەتتەگىدەي يگور شاتسكي قورعاسا، قورعانىستا ءالىپ، مالىي، ماروچكين، گابىشەۆ، ۆوروگوۆسكي بەستىگى وينادى. جارتىلاي قورعانىستا تا­عىبەرگەن، داراباەۆ، زاينۋتدينوۆ پەن ورازوۆ ونەر كورسەتسە، شابۋىلدا بەلارۋس قاقپاسىنا گول سوعۋدىڭ شەبەرى ابات ايىمبەتوۆ وينادى.

كەزدەسۋدىڭ العاشقى تايمى قازاقستان قۇراماسىنىڭ باسىمدىعىمەن وتكەنىمەن، كوماندالار ۇزىلىسكە تەڭ ناتيجەمەن شىقتى. 24-مينۋتتا اسلان داراباەۆتىڭ ەسەپتى اشاتىن تاماشا مۇمكىندىگى بولعان ەدى. الايدا بەلارۋس قاقپاشىسى قىراعىلىق تانىتىپ، قاقپاسىن گولدان امان ساقتاپ قالدى. بىراق ارادا بەس مينۋت وتكەندە قورعاۋشى ميحايل گا­بىشەۆ ءبارىبىر قارسىلاس كوماندانىڭ قاق­پاسىنان ساڭىلاۋ تاۋىپ، ۇلتتىق قۇرا­مانى ەسەپتە العا شىعاردى – 1:0. وكى­نىشكە قاراي، جىگىتتەر ءبىرىنشى تايمدا ەسەپتەگى باسىمدىقتى ساقتاپ قالا المادى. ءبىرىنشى تايمعا قوسىلعان قوسىمشا مينۋتتا بەلارۋس قۇراماسى ايىپ دوبىنان گول سوعىپ كەتتى. ءسويتىپ، ءبىرىنشى تايم 1:1 ەسەبىمەن تەڭ اياقتالدى.

ۇزىلىستەن كەيىن دە قازاقستاندىق فۋتبولشىلار شابۋىلدارىن ءبىر ساتكە دە توقتاتقان جوق. 60-مينۋتتا العاشقى گولدىڭ اۆتورى ميحايل گابىشەۆ ءدۋبلدىڭ اۆتورى اتانۋ مۇمكىندىگىن ءمۇلت جىبەرىپ الدى. قورعاۋشى مەن قاقپاشىنى الداپ وتكەنىمەن، سوڭعى ساتتە دوپتى ەركىنە باعىندىرا المادى. كەيىننەن رامازان ورازوۆ پەن ابات ايىمبەتوۆتە دە ەسەپتى ەسەلەيتىن ءبىر-ەكى مۇمكىندىك بولعان ەدى. ولار دا سوڭعى ساتتە دالدىك تانىتا المادى. ەكىنشى تايمنىڭ بەلورتاسىنا جەتكەندە ماتچ كىشكەنە سايابىرسىعانداي بولدى. ءسويتىپ، ويىندى كۇشەيتۋ ماقساتىندا ماگومەد اديەۆ الاڭعا تىڭ ويىنشىلاردى شىعارا باستادى. ماسەلەن، ءبىرىنشى گولدىڭ اۆتورى م.گابىشەۆتىڭ ورنىنا باعدات قايىروۆ شىقسا، رامازان ورازوۆتىڭ ورنىن ەلحان استانوۆ باستى. ارادا كوپ ۋاقىت وتپەي بۇل وزگەرىس ءوز ناتيجەسىن بەردى. بەلارۋس قاقپاسىنىڭ ماڭىنداعى كەلەسى ءبىر قاربالاس ساتتە باقتيەر زاينۋتدينوۆ جەكە شەبەرلىگىنىڭ ارقاسىندا بەلارۋس قاقپاسىنا ەكىنشى گولدى سوعىپ كەتتى. بۇل – جارتىلاي قورعاۋشىمىزدىڭ ۇلتتىق قۇراما جەيدەسىندەگى 22-ويىنىنداعى مەرەيلى ونىنشى گولى بولدى.

ماتچ سوڭىنا قاراي بەلارۋس فۋتبولشىلارى ەسەپكە وزگەرىس ەنگىزەتىن بىرنەشە قاۋىپتى شابۋىل ۇيىمداستىردى. قاقپاشى يگور شاتسكيدىڭ شەبەرلىگى بولماعاندا ويىن تەڭ ەسەپپەن اياقتالۋى ابدەن مۇمكىن ەدى. ابىروي بولعاندا قوناقتار قاقپامىزعا ءبىر گولدان ارتىق دوپ سوعا المادى. ءسويتىپ، ەكى قۇرامانىڭ استانادا وتكەن ەكىنشى كەزدەسۋى قازاقستان قۇراماسىنىڭ تاريحي جەڭىسىمەن اياقتالدى.

ەندى قازاقستان قۇراماسى توپتاعى سوڭعى ويىندى 25 قىركۇيەك كۇنى سىرت الاڭدا ازەربايجان فۋتبولشىلارىمەن وتكىزەدى. ەكى قۇراما اراسىنداعى العاشقى ماتچ ەلوردادا ءوتىپ، وندا جەرلەستەرىمىز 2:0 ەسەبىمەن باسىم تۇسكەن ەدى. ماتچتاعى ەكى گولدى دا «استانانىڭ» شابۋىلشىسى ابات ايىمبەتوۆ سوققان بولاتىن. ازەربايجان مەن قازاقستان قۇرامالارى اراسىنداعى قارىمتا كەزدەسۋ باكۋدەگى 31 مىڭ جانكۇيەر سىياتىن توفيك باحراموۆ اتىنداعى رەسپۋبليكالىق ستاديوندا وتەدى. ماتچ ەلوردا ۋاقىتىمەن 22:00-دە باستالادى.

سوڭعى جاڭالىقتار

ءرۋبلدى ساتىپ الۋ 31%-عا ءوستى

ەكونوميكا • بۇگىن، 15:23

ۇقساس جاڭالىقتار