جاڭا ۋاقىت جەدەل شارالار قابىلداۋدى تالاپ ەتەدى. كۇن تارتىبىندە ءتۇرلى شارا بار, ولاردىڭ ميسسياسىن ءبىلۋ ءۇشىن بيىلعى جازدا كونستيتۋتسيالىق تۇزەتۋلەر توپتاماسىن قابىلداۋ بويىنشا رەفەرەندۋم وتكىزۋمەن بىرگە ءبىزدىڭ ەلىمىز كىرگەن قوعامدىق-ساياسي جانە الەۋمەتتىك-ەكونوميكالىق شىندىقتى ماقساتتى تۇردە نەگىزگە الۋ جەتكىلىكتى. بۇل – جۇرگىزىلىپ جاتقان رەفورمالاردىڭ, اتاپ ايتقاندا, كەزەكتەن تىس پرەزيدەنتتىك سايلاۋدىڭ ءمانى.
سونىمەن بىرگە سايلاۋ كۇنىن بەلگىلەۋمەن جىل باسىندا ساراپشىلار قاۋىمداستىعىنىڭ وكىلدەرى بولجاعان وزگەرىستەردى كۇتۋ ارتىپ كەلەدى. بيىلعى پرەزيدەنتتىك سايلاۋدىڭ ىقتيمالدىلىعى, كەلەسى جىلى پارلامەنتتىك سايلاۋدىڭ وتكىزىلۋى تالقىلانعان. تۇتاستاي العاندا, ساياسي رەفورمالاردىڭ ۇلكەن پاكەتىن ودان ءارى ىسكە اسىرۋعا باعىتتالعان ساياسي پروتسەستەردى كۇشەيتۋ ستسەناريى جوسپارلانعان.
بۇل رەتتە قازىرگى ساياسي ماۋسىم قازاقستاننىڭ تۇراقتىلىعى مەن ورنىقتىلىعىن قامتاماسىز ەتۋ ءۇشىن ايقىن پايىمى مەن نەعۇرلىم ورنىقتى ساياسي مودەل قالىپتاستىرۋ نيەتى بار, ساياساتتا ساحنادان تىس ويىنسىز, ەلدە جاڭا ساياسي ءداستۇردى كەڭىنەن تاراتۋدان باستالدى.
مەملەكەت باسشىسى قاسىم-جومارت توقاەۆ ايتقانداي, ادىلەتتى قازاقستاندى قۇرۋ جولىنداعى كەشەندى رەفورمالاردى تابىستى جۇزەگە اسىرۋ ءۇشىن حالىقتىڭ جاڭا سەنىم مانداتى قاجەت. بۇل – الداعى پرەزيدەنت سايلاۋىنىڭ كۆينتەسسەنتسياسى. ولار ساياسي ۇدەرىسكە سەرپىن بەرىپ قانا قويماي, ناتيجەلەرى كەلەسى جىلى ايقىن بولاتىن قازىرگى بيلىك ءۇشىن دە سىن-قاتەر بولماق. ازىرشە قازاقستانعا قوعامنىڭ ساياسي كۇشتەرىن توپتاستىرۋ, بىرلىك پەن ءوزارا تۇسىنىستىك جانە ازاماتتىق قوعام مەن بيلىكتىڭ جاڭا دەڭگەيگە شىعۋى قاجەت.
مەملەكەتىمىزدى ساقتاۋ, تاۋەلسىزدىگىمىزدى باياندى ەتۋ ادىلەتتى قازاقستان قۇرۋدى تالاپ ەتىپ وتىر. تەك ادىلەتتى قوعامدا حالىق بيلىك ورگاندارىنا سەنەدى. ادىلەتتىلىك دەگەنىمىز – بىلاي قاراعاندا كۇردەلى ۇعىم بولىپ كورىنگەنىمەن, شىن مانىندە زاڭ الدىندا بارشانىڭ تەڭدىگى, السىزدەرگە قامقورلىق. قوعام ءومىرىنىڭ بارلىق سالاسى زاڭمەن, قۇقىقتىق نورمالارمەن رەتتەلەتىن مەملەكەت – ادىلەتتى مەملەكەت.
باي مەن كەدەي اراجىگىنىڭ شەكتەن تىس الشاقتاۋى, الەۋمەتتىك ادىلەتسىزدىك, زاڭسىزدىقتىڭ ەتەك الۋى, جوعارىداعىلاردىڭ تومەندەگىلەردى ەستىمەۋى, قوعام يگىلىگىنە, ەل بولاشاعىنا قىزمەت ەتەتىن باستامالاردىڭ اياقاستى بولۋى, ۇلتتىق ماسەلەلەردىڭ تاسادا قالۋى سەكىلدى كەلەڭسىزدىكتەر قاراپايىم ازاماتتاردىڭ بيلىك ورگاندارىنا دەگەن سەنىمىنە سەلكەۋ ءتۇسىردى. راس, قازاقستاندا جاقسى زاڭدار, كەرەمەت باعدارلامالار بۇعان دەيىن دە بولدى. بىراق تولىققاندى ىسكە اسىرىلماعانى بەلگىلى. ويتكەنى شەشىم قابىلدايتىن ورىنداردا وتىرعان كەيبىر تۇلعالار ادىلەتتىلىك پەن ادالدىق قاعيداتىن باسشىلىققا الۋدى ۇمىتتى.
پرەزيدەنتتىك سايلاۋعا ەكى اي قالدى, مىندەتتەر اۋقىمى انىقتالدى, سايلاۋ ناۋقانى باستالدى. ىسكە ءسات!
مۇحيت اسانباەۆ,
قازاقستان رەسپۋبليكاسى پرەزيدەنتى جانىنداعى قسزي-ءدىڭ جەتەكشى عىلىمي قىزمەتكەرى
