اتالعان جوباعا ءوز الەۋەتىن, كوشباسشىلىق قاسيەتىن دامىتۋعا قۇشتار, باستاماشىل يدەيالار مەن جوبالاردى ىسكە اسىرۋعا مۇددەلى 18-28 جاس ارالىعىنداعى تالاپكەرلەر قاتىستى. مۇندا ەرەكشە باسىمدىلىق الەۋمەتتىك وسال ساناتتاعى جاستارعا بەرىلدى. نيەت بىلدىرۋشىلەردىڭ وتىنىمدەرى سايت ارقىلى ونلاين قابىلداندى.
جەتىسۋ وبلىسى اكىمىنىڭ ورىنباسارى رۋستام اليەۆ اتالعان جوبا ءوڭىر جاستارىنا ۇلكەن قولداۋ بولاتىنىن ايتادى.
«قازىرگى ۋاقىتتا جاستار اراسىندا ءبىلىم دەڭگەيىنىڭ تومەندىگى, وزىنە جانە بولاشاعىنا سەنىمسىزدىك, ماسىلدىق كوڭىل كۇي, وتباسىلىق ماسەلەلەر, جۇمىسسىزدىق سياقتى پروبلەمالار وزەكتى. سوندىقتان اتالعان جوبانى ىسكە اسىرۋ ەڭ الدىمەن, جاستاردى قولداپ, ولاردى قوعامدىق پايدالى قىزمەتكە تارتۋ. جاستار ءوز ومىرلەرىن وزگەرتۋگە, وزدەرىنە سەنۋگە مۇمكىندىك الادى», دەيدى ر.اليەۆ.
ال اقپارات جانە قوعامدىق دامۋ مينيسترلىگى جاستار جانە وتباسى ىستەرى كوميتەتىنىڭ باسقارما باسشىسى الماگۇل قۇتانوۆا مينيسترلىك قازىر جاستار جۇمىسىنا قاتىستى بىرقاتار ءتاسىلدى قايتا قاراستىرىپ جاتقانىنا جانە Zhasproject سياقتى اتاۋلى جانە ناقتى جوبالار بولاشاقتا ءوز جەمىسىن بەرەتىنىنە سەنىم ءبىلدىردى.
بايقاۋ كەزەڭىندە جاستاردان 682 ءوتىنىم تۇسكەن. تەحنيكالىق ىرىكتەۋ كەزەڭىندە قاجەتتى قۇجاتتاردىڭ كونكۋرس تالاپتارىنا سايكەس كەلمەۋىنە بايلانىستى 321 ءوتىنىم قابىلدانبادى. ارنايى بايقاۋ كوميسسياسى شاعىن گرانتتار بايقاۋىنىڭ 63 جەڭىمپازىن انىقتادى. ونىڭ ىشىندە الەۋمەتتىك وسال ساناتتاعى 48 جاس بار. ولاردىڭ دەنى جۇمىسسىزدار, مۇمكىندىگى شەكتەۋلى جاندار, مۇگەدەكتىگى بار بالا تاربيەلەپ وتىرعان جاس انالار, كوپبالالى جاس انالار.
ەندى جۇمىسسىز جاستار وقىپ, ءوز جوبالارىن جۇزەگە اسىرا الادى. ماسەلەن, ولار ناۋبايحانا, بالالاردى دامىتۋ ورتالىعى, ماسساج كابينەتى, ۆەب-ديزاين كۋرستارى, روبوتتەحنيكا, كوپيرايتينگ, پلاستماسسا, ءجۇن, توقىما وڭدەۋمەن اينالىسا الادى.
اقشالاي قولداۋدان بولەك جوبا قاتىسۋشىلارىنا ومىرلىك ماڭىزدى داعدىلار مەن جوبالاردى باسقارۋ بويىنشا قىسقاشا وقىتۋ ۇسىنىلادى. سەبەبى ەل ىشىندە الەۋمەتتىك كاسىپكەرلىك ەندى عانا دامي باستادى. سوندىقتان قوعامعا پايدا اكەلەتىن جاڭا جوبالاردى قۇرۋعا دەگەن ۇمتىلىسى بار جاستاردى جان-جاقتى قولداۋ بارىنشا ءتيىمدى.
جاستاردى الەۋمەتتىك كاسىپكەرلىكتى جۇرگىزۋ نەگىزدەرىنە ۇيرەتۋ ءۇشىن Zhasرroject سەكىلدى باستاپقى كەزەڭدە گرانتتىق قولداۋ كورسەتۋ قاجەت. جاسىراتىنى جوق, الەۋمەتتىك وسال ساناتتاعى توپتار قاجەتتى بىلىمگە يە ەمەس. مىسالى, ولار كەلىسىمشارتتىڭ قالاي جاسالاتىنىن بىلمەيدى, ەشقاشان شوت-فاكتۋرانى الماعان, قاجەتتى زاڭداردى وقىماعان. وسىنداي جاستاردىڭ قارجىلىق جانە قۇقىقتىق ساۋاتىن ارتتىرۋ ءۇشىن مەنتورلار پۋلى جۇمىس ىستەيدى.
Zhasproject جوباسىن جۇزەگە اسىرۋعا الماتى جانە جەتىسۋ وبلىستارىنداعى اۋداندىق جانە قالالىق جاستار رەسۋرستىق ورتالىقتارى, سونداي-اق اۋىلدىق وكرۋگتەردەگى جاستارمەن جۇمىس جونىندەگى ادىسكەرلەر بەلسەندى تۇردە تارتىلعان. جەرگىلىكتى جەرلەردە جۇمىسپەن قامتۋ ورتالىقتارىمەن, اۋىلدىق اكىمدىكتەرمەن بىرلەسىپ بەلسەندى ءتۇسىندىرۋ جۇمىستارى جۇرگىزىلگەن.
«ومىردە قيىن جاعدايعا تاپ بولعان كەز كەلگەن كوپبالالى جاس وتباسى, مۇمكىندىگى شەكتەۋلى جاندار, شالعايداعى اۋىلداردان كەلگەن اۋىل جاستارى جوباعا قاتىسا الادى. مۇندا ولار ءوز كۇشىنە سەنۋگە, تۋعان اۋىلىنا پايدا اكەلۋگە جانە ءوز ءىسىن تابۋعا مۇمكىندىك الادى», دەيدى الماتى جانە جەتىسۋ وبلىستارىنداعى Zhasproject جوباسىنىڭ جەتەكشىسى ءاليا قۇدايبەرگەنقىزى.
جەتىسۋ وبلىسى
