استانا قالاسىنىڭ حالىقتى جۇمىسپەن قامتۋ ورتالىعى بوس ۆاكتسانسيالار جارمەڭكەسىن وتكىزدى, وندا 50 كومپانيا قالا تۇرعىندارىنا 1820-دان استام بوس جۇمىس ورنىن ۇسىندى.
ء«بىزدىڭ كومپانيا بوس جۇمىس ورىندارى جارمەڭكەسىنە ەكىنشى رەت قاتىسىپ وتىر. جاقسى ناتيجە بار. باعىمىز جانىپ, جاقسى مامانداردى تابامىز دەپ ۇمىتتەنەمىز. وتكەن جولى ەكسپەديتورلار جالدادىق, ال قازىر مەرچەندايزەرلەردى ىزدەپ وتىرمىز», دەدى «رادۋگا» جشس وكىلى راۋانا بازىلوۆا.
ەلوردانىڭ حالىقتى جۇمىسپەن قامتۋ ورتالىعىنىڭ ءبولىم باسشىسى باقىت راقىشەۆانىڭ ايتۋىنشا, ءىس-شارانىڭ ماقساتى – جۇمىس بەرۋشىلەر مەن جۇمىس ىزدەۋشىلەر اراسىندا تىكەلەي بايلانىس ورناتۋ, جۇمىسسىز ازاماتتاردى جۇمىسقا ورنالاستىرۋعا جاردەمدەسۋ.
جۇمىس ىزدەۋشىلەردىڭ ايتۋىنشا, جارمەڭكەگە قاتىسۋ ۋاقىتتى ۇنەمدەيدى جانە بىردەن بىرنەشە جۇمىس بەرۋشىمەن سۇحباتتاسۋعا مۇمكىندىك بەرەدى.
«مەن جۇمىستى Headhanter جانە وزگە دە ءتۇرلى سايتتار ارقىلى ىزدەيمىن, بىراق جۇمىس بەرۋشىلەردىڭ باسى قوسىلىپ, تاڭداۋ ەركى كوبىرەك بولعان جاقسىراق. ۋاقىتتى ۇنەمدەگەنگە ىڭعايلى», دەدى جوو تۇلەگى ايگۇل وماروۆا.
ايتا كەتسەك, جۇمىس بەرۋشى كومپانيالار مەملەكەتتىك سۋبسيديالاۋ باعدارلامالارىنا بەلسەندى قاتىسادى. وسىنداي باعدارلامالار اياسىندا مەملەكەت جۇمىسپەن قامتۋ ورتالىعى ارقىلى العاشقى ايلارىندا 30-دان 100%-عا دەيىن جالاقى تولەيدى.
جۇمىس بەرۋشىلەردىڭ پىكىرىنشە, مۇنداي باعدارلامالار جۇمىس ىزدەۋشىلەرگە تاجىريبە جيناۋعا, ال كومپانيالارعا جاڭا قىزمەتكەردىڭ جۇمىسىن باعالاۋعا مۇمكىندىك بەرەدى.
جىل باسىنان بەرى حالىقتى جۇمىسپەن قامتۋ ورتالىعى ەلوردالىق 296 جۇمىس بەرۋشىنىڭ قاتىسۋىمەن بەس جالپىقالالىق بوس ورىندار جارمەڭكەسىن وتكىزدى. وندا قۇرىلىس, ءوندىرىس, ساۋدا, تۇرۋ, تاماقتانۋ, قارجى جانە ساقتاندىرۋ قىزمەتى, كولىك جانە قويمالاۋ جانە ت.ب. سياقتى ءتۇرلى قىزمەت سالالارى بويىنشا بوس 8 123 ورىن ۇسىنىلعان.
جۇمىس بەرۋشىلەر ۇسىنعان سۇرانىسقا يە ماماندىقتار: جابدىق ينجەنەرى, سلەسار, ءار ءتۇرلى باعىتتاعى بۋحگالتەر, ساۋلەتشى, ينجەنەر-جوبالاۋشى, ءار ءتۇرلى ساناتتاعى جۇرگىزۋشى, زاڭگەر, ساتۋ جونىندەگى مەنەدجەر, قارجى كەڭەسشىسى, نەسيە مەنەدجەرى جانە ت.ب.
كادرلارداعى ەڭ ۇلكەن تاپشىلىق دەنساۋلىق ساقتاۋ, ساۋدا, قۇرىلىس جانە ءوندىرىس سالالارىندا دا بايقالادى.
بوس ورىندار جارمەڭكەسىنە بارلىعى ەكى مىڭنان استام جۇمىسسىز ازاماتتار قاتىستى. جارمەڭكەلەردى وتكىزۋ بارىسىندا اڭگىمەلەسۋگە 500 ادام شاقىرىلدى, ونىڭ ىشىندە 240 ىزدەنۋشى تۇراقتى جۇمىس ورىندارىنا جۇمىسقا ورنالاستىرىلدى.
