جاۋىنگەرلىك دايارلىق بويىنشا ەكسپرەسس-تەستىلەۋ

«وتار» 40-شى اسكەري بازاسىندا قۇرلىق اسكەرلەرى بولىم­شەلەرىنىڭ اراسىندا جاۋىنگەرلىك دايارلىقتى ۇيىم­داستىرۋدى جەتىلدىرۋگە باعىتتالعان جارىس ءوتىپ جاتىر. كەشە باستالىپ, 22 مامىرعا دەيىن جالعاساتىن جاۋىنگەرلىك جارىسقا 25 كوماندا قاتىسۋدا. بۇل اەروۇتقىر اسكەرلەرى جانە «وڭتۇستىك», «شىعىس», «باتىس» وڭىرلىك قولباسشىلىقتارى اسكەرلەرى اتىنان سىنعا تۇستەتىن 600-دەن استام ادام. جىل سايىن وتكىزىلىپ تۇراتىن شارا بارىسىندا وعان قاتىسۋشى اسكەري قىزمەتشىلەرگە اتىس قارۋىنىڭ ءار تۇرىنەن, جاياۋ اسكەر جاۋىنگەرلىك ماشيناسىنىڭ قارۋى­نان, تانك جانە ارتيللەريا قارۋ-جاراعىنان باقىلاۋ اتۋ جات­تىعۋلارى بويىنشا تاپسىرمالاردى ورىنداۋعا تۋرا كەلەدى. الىس قاشىقتىققا اتۋ جارىسى بويىنشا اسكەري قىزمەتشىلەر وزدە­رىنىڭ اتۋ قارۋىن مەڭگەرۋدەگى كاسىبي بىلىكتىلىكتەرىن دالەلدەۋى كەرەك. جاۋىنگەرلىك جارىستىڭ ەكس­پرەسس-تەستىلەۋ قورىتىندىسى بويىنشا وعان قاتىسۋشىلاردىڭ كۇشتىك جانە توزىمدىلىك جاتتى­عۋ­لارىن ورىنداۋ بويىنشا دەنە دايىن­دىق دەڭگەيلەرى باعالاناتىن بولادى. جارىستىڭ ناتيجەسىن قۇرلىق اسكەرلەرى باس قولباسشىسىنىڭ جا­ۋىنگەرلىك دايارلىق جونىندەگى ورىنباسارى گەنەرال-مايور ءا.حا­لىقوۆ باستاعان قازىلار القاسى باعالايدى. «ەگەمەن-اقپارات».