قازاقستان فۋتبول فەدەراتسياسىنىڭ ءباسپاسوز قىزمەتى تاراتقان مالىمەت بويىنشا, كونفەرەنتسيا دەلەگاتتارى جيىن بارىسىندا 2034 جىلعا دەيىنگى قازاقستان فۋتبولىن دامىتۋ ستراتەگياسىن بەكىتتى.
«بۇگىندە قازاق فۋتبولى جۇيەلى رەفورماعا مۇقتاج ەكەنى بەلگىلى. الداعى ءۇش جىلدا نەگىزگى كۇشتى كەلەسى مىندەتتەردى شەشۋگە باعىتتايمىز. ولار: بالالار-جاسوسپىرىمدەر جانە بۇقارالىق فۋتبولدى دامىتۋ, فۋتبول ماماندارىن دايىنداۋ سالاسىن جانداندىرۋ, بۇقارالىق فۋتبولعا ارنالعان فۋتبول ينفراقۇرىلىمىن جاڭعىرتۋ. ماقساتىمىز – جاستار اراسىندا فۋتبولدى دارىپتەۋ, جارىستى ۇيىمداستىرۋ جۇيەسىن جاقسارتۋ جانە فۋتبول ينفراقۇرىلىمىنىڭ جىل ون ەكى اي قولجەتىمدى بولۋىن قامتاماسىز ەتۋ», دەپ اتاپ ءوتتى قفف پرەزيدەنتى ادىلەت بارمەنقۇلوۆ.
Amanat پارتياسىمەن جاسالعان مەموراندۋم اياسىندا ەلىمىزدىڭ بارلىق ايماعىندا بۇقارالىق فۋتبول مەن ۆولونتەرلىك قوزعالىستى دامىتۋعا باعىتتالعان 20 جاستار قورى قۇرىلماق.
«Amanat پارتياسى فۋتبولدى دامىتۋ ارقىلى مەملەكەت الدىنداعى الەۋمەتتىك جانە ەكونوميكالىق مىندەتتەردى شەشۋدى كوزدەيدى. فۋتبول – مەملەكەتتىڭ سالاماتتى ءومىر سالتىن قالىپتاستىرۋ بويىنشا مىندەتتەرىن جۇزەگە اسىرا الاتىن قۇرال», دەپ اتاپ ءوتتى ەلدار جۇماعازيەۆ.
سونداي-اق جيىنعا قاتىسقان ۋەفا ۇلتتىق قاۋىمداستىقتارى بويىنشا كەڭەسشىسى يوزەف كليمەنت ۋەفا مەن قفف قارىم-قاتىناستىڭ اياسى جىلدان-جىلعا ۇلعايا باستاعانىن, قازاقستاندىق دەلەگاتسيانىڭ ۋەفا-عا ساپارىنىڭ جوعارى ماڭىزعا يە ەكەنىن اتاپ ءوتتى. سونىمەن قاتار ول جىلدىڭ سوڭىنا دەيىن قازاقستان فۋتبول فەدەراتسياسى قىزمەتكەرلەرىنىڭ بىلىكتىلىگىن ارتتىراتىن سەمينار ۇيىمداستىرۋدى جوسپارلاپ وتىرعانىن مالىمدەدى.
كونفەرەنتسيا قورىتىندىسىندا قازاقستان فۋتبول فەدەراتسياسىنىڭ اتقارۋشى كوميتەتىنىڭ جاڭا قۇرامى سايلاندى. وعان پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ, مادەنيەت جانە سپورت ءمينيسترى داۋرەن اباەۆ, ارداگەرلەر فۋتبول وداعىنىڭ توراعاسى سەيىلدا بايشاقوۆ, فۋتبولدان قازاقستان ايەلدەر قۇراماسىنىڭ باس باپكەرىنىڭ كومەكشىسى, «وقجەتپەس» فۋتبول كلۋبىنىڭ باس باپكەرى بەگايىم قىرعىزباەۆا, «قايرات» فۋتزال كلۋبىنىڭ پرەزيدەنتى قايرات ورازبەكوۆ, «فريدوم فينانس» اق ديرەكتورلار كەڭەسىنىڭ توراعاسى تيمۋر تۋرلوۆ جانە قازاقستاننىڭ كاسىپقوي فۋتبول ليگاسىنىڭ ءۇش مۇشەسى ليگانىڭ قۇقىق بەلگىلەۋشى قۇجاتتارىنا سايكەس قۇرامعا ەندى.
