بىرەر جىل بۇرىن تۇساۋى كەسىلگەن ۇلتتار ليگاسىنىڭ ءۇشىنشى ماۋسىمى فۋتبولدان قازاقستان ۇلتتىق قۇراماسى ءۇشىن ءساتتى باستالدى. جەرلەستەرىمىز جازدىڭ العاشقى ايىندا وتكەن ءتورت تۋردىڭ ۇشەۋىندە جەڭىسكە جەتىپ (ازەربايجان – 2:0, سلوۆاكيا – 1:0, 2:1), ءبىر كەزدەسۋدە تەڭ (بەلارۋس – 1:1) وينادى. ءسويتىپ, ماگومەد اديەۆ شاكىرتتەرى دوپ دوداسىنىڭ العاشقى ءتورت تۋرىنان كەيىن 10 ۇپاي جيناپ, «س» ديۆيزيونىنىڭ 3-توبىندا كوش باستادى. تۋرنير كەستەسىندە ەكىنشى ورىندا تۇرعان سلوۆاكيا ءبىزدىڭ قۇرامادان باقانداي ءتورت ۇپاي قالىپ كەلەدى. الدا ءالى ەكى تۋر بار. ەگەر جەرلەستەرىمىز سول ەكى ويىننىڭ بىرەۋىندە ءۇش ۇپاي ولجالايتىن بولسا, وندا ءوز توبىنداعى ءبىرىنشى ورنىن ساقتاپ قانا قويماي, اتالعان ليگادا ءبىر ساتى جوعارىلاپ, «ۆ» ديۆيزيونىنا تىكەلەي جولداما الادى. ال ەۋروپانىڭ ۇزدىك قۇرامالارى باق سىنايتىن «ۆ» ليگاسىندا كارى قۇرلىق چەمپيوناتىنىڭ جولدامالارى ساراپقا سالىناتىنىن جانكۇيەرلەر جاقسى بىلەدى.
فۋتبولدان بيىلعى الەم چەمپيوناتى ادەتتەگىدەي جازدا ەمەس, كۇز مەزگىلىندە قاتاردا وتەتىن بولعاندىقتان, فيفا مەن ۋەفا 2022 جىلعى فۋتبول كۇنتىزبەسىنە وزگەرىس ەنگىزىپ, ۇلتتار ليگاسىنىڭ ويىندارىن ماۋسىم جانە قىركۇيەك ايلارىندا وتكىزۋگە ءماجبۇر بولدى. ءداستۇر بويىنشا ويىندار قاراشاعا دەيىن سوزىلاتىن ەدى.
جەرلەستەرىمىز ۇلتتار ليگاسىنىڭ بەسىنشى تۋر ويىنىن ەرتەڭ ەلورداداعى «استانا ارەنا» ستاديونىندا فيفا رەيتينگىندە 96-ورىندا تۇرعان بەلارۋس قۇراماسىمەن وتكىزەدى. وسىدان ءۇش اي بۇرىن سىرت الاڭدا ۇيىمداستىرىلعان العاشقى ويىندا قازاقستان قۇراماسى «اقورىستارمەن» ءبىرىنشى رەت رەسمي ماتچتا تەڭ ويناپ (1:1), ءتورت ويىنعا جالعاسقان جەڭىسسىز سەرياعا نۇكتە قويدى. سەربيانىڭ نوۆي-ساد قالاسىنداعى «كارادجوردجە» ستاديونىندا (ۋەفا بەلارۋس قۇراماسىنا ءوز ەلىندە رەسمي ويىنداردى وتكىزۋگە تىيىم سالعان) وتكەن كەزدەسۋدىڭ 13-مينۋتىندا ابات ايىمبەتوۆ ەسەپ اشسا, ەكىنشى تايمنىڭ 84-مينۋتىندا ۆلاديسلاۆ مالكەۆيچ تارازى باسىن تەڭەستىرىپ, كومانداسىن جەڭىلىستەن قۇتقارىپ قالعان ەدى.
22 قىركۇيەك كۇنى ەلوردادا بەلارۋس قۇراماسىمەن وتەتىن ويىن ۇلتتىق قۇراما جىگىتتەرى ءۇشىن قاي جاعىنان الىپ قاراساق تا ماڭىزدى ماتچتىڭ ءبىرى بولىپ تۇر. ويتكەنى ەڭ ءبىرىنشى, فۋتبولشىلارىمىز ۇلتتىق قۇرامانىڭ ناۋرىز ايىندا باستالعان جەڭىستى جولىن بۇزىپ الماسا ەكەن دەيمىز. ەكىنشىدەن, جاڭا باپكەردىڭ باسشىلىعىمەن سىرت الاڭدا بەلارۋسپەن تەڭ تۇسكەن ۇلتتىق قۇراما فۋتبولشىلارى ولاردى استانادا جەڭىپ, بۇعان دەيىنگى جەڭىلىستىڭ ەسەسىن قايتارۋعا ءتيىس. ۇشىنشىدەن, ەگەر وسى ماتچتا ەش قيىندىقسىز ءۇش ۇپايعا قول جەتكىزەتىن بولساق, وندا سوڭعى تۋردىڭ ناتيجەسىنە قاراماي-اق قازاقستان ۇلتتىق قۇراماسى مەرزىمىنەن بۇرىن ۇلتتار ليگاسىنىڭ «ۆ» ديۆيزيونىنا كوتەرىلەدى.
ءوز الاڭىمىزداعى ماتچتان كەيىن موگامەد اديەۆ شاكىرتتەرى سوڭعى تۋر ويىنى ءۇشىن ازەربايجانعا ساپار شەگەدى. ەكى ەلدىڭ قۇرامالارى اراسىنداعى العاشقى تۋر ويىنى «استانا ارەنا» ستاديونىندا ءوتىپ, جەرلەستەرىمىز 2:0 ەسەبىمەن باسىم تۇسكەن ەدى. ماتچتاعى ەكى گولدى دا «استانانىڭ» شابۋىلشىسى ابات ايىمبەتوۆ سوققان بولاتىن. ازەربايجان مەن قازاقستان قۇرامالارى اراسىنداعى قارىمتا ماتچ 25 قىركۇيەك كۇنى باكۋدەگى 31 مىڭ جانكۇيەر سىياتىن توفيك باحراموۆ اتىنداعى رەسپۋبليكالىق ستاديوندا وتەدى. ماتچ ەلوردا ۋاقىتىمەن 22:00-دە باستالادى.
وتكەن اپتادا قازاقستان ۇلتتىق قۇراماسىنىڭ باس باپكەرى ماگومەد اديەۆ وسى ەكى ويىنعا شاقىرتۋ العان فۋتبولشىلاردىڭ ءتىزىمىن جاريالادى. اديەۆ قىركۇيەكتەگى ماتچتاردا دا نەگىزىنەن ماۋسىم ايىنداعى باسەكەلەردە جاسىل الاڭعا شىققان فۋتبولشىلارعا سەنىم بىلدىرمەك. سونداي-اق ۇلتتىق قۇراماعا جاراقاتتارىنان ايىققان قورعاۋشى مارات بىستروۆ پەن باقتيەر زاينۋدتينوۆ ورالدى. ال ۆلاديسلاۆ ۆاسيلەۆ («توبىل») پەن ماكسيم سامورودوۆتىڭ («اقتوبە») ورنىنا يۋري لوگۆينەنكو («اقتوبە) مەن «قايراتتىڭ» جاس ويىنشىسى ادىلەت سادىبەكوۆ كەلدى. سونىمەن قاتار ۇلتتىق قۇراماعا ۇزاق ۋاقىت ۇزىلىستەن كەيىن «شاحتەردىڭ» شابۋىلشىسى رومان مۇرتازاەۆ قايتا ورالدى. قالعان فۋتبولشىلار قۇراماداعى ءوز ورنىن ساقتاپ قالدى. ماگومەد اديەۆ الداعى ەكى ويىندا مىنا فۋتبولشىلارعا سەنىم ارتپاق.
قاقپاشىلار: يگور شاتسكي («شاحتەر»), مۇحاممەدجان سەيسەن («تاراز»), بەكحان شايزادا («ورداباسى»);
قورعاۋشىلار: سەرگەي مالىي, الەكساندر ماروچكين, باعدات قايىروۆ (بارلىعى – «توبىل»), ەلدوس احمەتوۆ («تاراز»), ميحايل گابىشەۆ, تالعات كوسەپوۆ (ەكەۋى دە – «استانا»), مارات بىستروۆ («احمات», رەسەي), تەمىرلان ەرلانوۆ, («اقتوبە»), نۇرالى ءالىپ («زەنيت», رەسەي);
جارتىلاي قورعاۋشىلار: يۋري لوگۆينەنكو, رامازان ورازوۆ, (ەكەۋى دە – «اقتوبە»), اسحات تاعىبەرگەن, سامات جارىنبەتوۆ (ەكەۋى دە – «توبىل»), اسلان داراباەۆ, تيمۋر دوسماعامبەتوۆ, يسلامبەك قۋات (بارلىعى – «استانا»), يان ۆوروگوۆسكي («مولەنبەك», بەلگيا), باقتيەر زاينۋتدينوۆ (تسسكا, رەسەي), ەلحان استانوۆ («ورداباسى»), ادىلەت سادىبەكوۆ («قايرات»);
شابۋىلشىلار: ابات ايىمبەتوۆ («استانا»), ابىلايحان جۇمابەك («تاراز»), ارتۋر شۋشەناچەۆ («قايرات»), رومان مۇرتازاەۆ («شاحتەر»);
