ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بيىلعى جىلدىڭ 8 ايىندا قازاقستاندىقتارعا 1,9 ترلن تەڭگەدەن استام سوماعا زەينەتاقى تولەندى.
بۇل رەتتە 2022 جىلدىڭ قىركۇيەگىندە عانا رەسپۋبليكالىق بيۋدجەتتەن زەينەتاقى تولەۋگە 244,1 ملرد تەڭگە, ونىڭ ىشىندە بازالىق زەينەتاقى تولەۋگە 74,2 ملرد تەڭگە, ىنتىماقتى زەينەتاقى تولەۋگە 169,9 ملرد تەڭگە باعىتتالدى.
2022 جىلعى 1 قىركۇيەكتە بازالىق زەينەتاقى تولەمىن ەسكەرە وتىرىپ, زەينەتاقى تولەمدەرىنىڭ ورتاشا مولشەرى 109 224 تەڭگەنى قۇرادى.
قىركۇيەك ايىنىڭ باسىندا قازاقستانداعى زەينەتكەرلەر سانى 2 ملن 253 مىڭ ادام.
«2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى ءاربىر الۋشىعا ونىڭ زەينەتاقى جۇيەسىنە قاتىسۋ ءوتىلىن ەسكەرە وتىرىپ, جەكە تاعايىندالادى. بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى, سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى. ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا, سونداي-اق ەگەر مۇلدە جوق بولسا, بازالىق زەينەتاقى ەڭ تومەنگى كۇنكورىس دەڭگەيىنىڭ 54 %-ىن قۇرايدى, سودان كەيىن 10 جىلدان اسقان ءار جىل ءۇشىن ونىڭ مولشەرى 2 %-عا ارتادى. مىسالى, ەگەر ءسىزدىڭ ءوتىلىڭىز 20 جىل بولسا, بازالىق زەينەتاقى تومەنگى كۇنكورىس دەڭگەيىنىڭ 74 %-ىن, ال 30 جىل بولسا, وندا 94 %-ىن قۇرايدى. ەڭبەك ءوتىلى 33 جىل نەمەسە ودان كوپ بولسا, كۇنكورىس دەڭگەيىنىڭ ەڭ جوعارعى مولشەرىندە بەلگىلەنەدى», دەلىنگەن مينيسترلىك حابارلاماسىندا.
ايتا كەتسەك, ەگەر ءبىر اي ىشىندە مىندەتتى زەينەتاقى جارنالارى بىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا, جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
ەڭبەك مينيسترلىگىندە اتاپ وتكەندەي, مىندەتتى زەينەتاقى جارنالارى قانشالىقتى تۇراقتى جانە تولىق كولەمدە تولەنسە, زەينەتاقى جاسىنا جەتكەن كەزدە بازالىق زەينەتاقى تولەمىنىڭ مولشەرى دە سوعۇرلىم جوعارى بولادى.
