باتىس قازاقستان وبلىسىندا ەدىلباي تۇقىمداس ساۋلىق ءتورت قوزى تۋدى

ورال. 16 مامىر. باتىس قازاقستان وبلىسى, جاڭاقالا اۋدانىندا ەدىلباي قويى تورتەم تۋدى. بۇل تۋرالى egemen.kz ءتىلشىسى حابارلادى. جاراتىلىس بەرەيىن دەسە شەكتەن تىس مىرزالىق تانىتاتىنى بۇل جولى تاعى دا دالەلدەندى. شالعايداعى جاڭاقالا اۋدانىنىڭ تۇرعىندارى ەرلى-زايىپتى  بەكتەمىر مەن سۆەتا بەكقاليەۆتەردىڭ جەكە يەلىگىندەگى ساۋلىقتىڭ ءبىرى بىردەن ءتورت قوزى تاپتى. اسىل تۇقىمدى ەدىلباي قويى نەگىزىنەن ءبىر قوزى تۋاتىنى سەلەكتسيالىق تاجىريبەدەن جاقسى بەلگىلى. وسىعان قاراماستان بيىل ءتورت قوزى تۋعان ساۋلىق سوڭعى ەكى جىل قاتارىنان ۇشەۋدەن تولدەپتى. الايدا, قاقاعان قىستا تولدەگەندىكتەن, نازىك, قىزىلشاقا قوزىلار ءولىپ قالا بەرەدى ەكەن. ال بيىلعى ءتورت قوزى ويناقتاپ, ەت جيناپ كەلەدى. تاڭسىقتى كورمەك ءۇشىن ىزدەپ ەلگە بارعاندا قوي ورىستەن كەلىپ جاتىر ەكەن. ساۋلىقتى بولەكتەگەن ءۇي يەسى انالىقتىڭ جانىنان ءتورت قوزىسىن قاتار جىبەردى. «قوي سۇيەدى بالاسىن قوڭىرىم دەپ...» اۋىز ادەبيەتىندە ايتىلعانداي, انالىق قوي ءتورت تولىنە قاتار ەمىرەنەدى. قوزىلار بولسا تالاسا-تارماسا اناسىنىڭ ەمشەگىن سورعىلاۋعا كىرىستى. قوي يەسى: «مۇنداي جاعدايدا ساۋلىق ءسۇتى بىرىنە كوپ, بىرىنە ارتىق كەتۋى مۇمكىن. سوندىقتان قوزىلاردى ەكەۋدەن شىعارىپ, كەزەكپەن ەمىزۋدى قاجەت دەپ تاۋىپ وتىرمىز. ءارى بۇعان قوسىمشا ءسۇت بەرەمىز», – دەدى. تەمىر قۇسايىن. دەرەككوز: egemen.kz. فوتو: egemen.kz.