ءىىم ەكسترەميزمگە قارسى ءىس-قيمىل دەپارتامەنتى باستىعىنىڭ ورىنباسارى, پوليتسيا پولكوۆنيگى دارحان رازۋەۆتىڭ ايتۋىنشا, سوڭعى ۋاقىتتا استانا مەن الماتى قالالارىندا, سونداي-اق ەلىمىزدىڭ كەيبىر وڭىرلەرىندە ءىرى ساۋدا-ويىن ساۋىق ورتالىقتارى, اۋەجايلار, مەكتەپتەر, سوت عيماراتتارى بەلگىسىز ادامدار تاراپىنان ءانونيمدى شابۋىلعا ۇشىراعان.
– قۇقىق قورعاۋ ورگاندارى كەز كەلگەن نىساندى مينالاۋ تۋرالى اقپارات كەلىپ تۇسكەن كەزدە ناقتى قاۋىپتىڭ قاتەرىن باعالاي وتىرىپ ارەكەت ەتەدى. بارلىق كەلىپ تۇسكەن قاۋىپ-قاتەرلەر بويىنشا شۇعىل قىزمەتتەر مىندەتتى تۇردە وقيعا ورنىنا بارادى, وبەكتىلەرگە ەگجەي-تەگجەي تەكسەرۋلەر جۇرگىزەدى, جارىلعىش قۇرىلعىلاردى ىزدەيدى جانە ونىڭ سالدارىن بولدىرماۋ ءۇشىن كەزەك كۇتتىرمەيتىن شارالاردى قابىلدايدى. قۇقىق قورعاۋ ورگاندارى قاۋىپتىلىك تۋىندايتىن ايماقتان ادامداردى ەۆاكۋاتسيالاۋعا مىندەتتى. بۇل ءوز كەزەگىندە ادامداردىڭ جوسپارلارىن بۇزادى جانە ءومىردىڭ ۇيرەنىشتى جاعدايىنا كەدەرگى كەلتىرەدى. بارلىق جاعدايدا جارىلعىش زات قويىلعانى تۋرالى اقپارات راستالماي جاتادى. قىلمىسكەردىڭ قىلمىس جاساۋ سەبەبى ءارتۇرلى بولۋى مۇمكىن: كەك الۋ, بۇزاقىلىق, وزىنە نازار اۋدارتۋ. ويلانباي جاساعان ارەكەتى ءۇشىن كامەلەت جاسىنا تولعان ادامعا قىلمىستىق جازا قاراستىرىلعانىن ەستەن شىعارماعان ءجون, – دەيدى دارحان رازۋەۆ.
ارينە, ەرىككەندەر كوپ ۇزاماي قولعا تۇسەدى. سەبەبى ىشكى ىستەر ورگاندارىنىڭ يەلىگىندە سوڭعى ۇلگىدەگى تەحنيكالىق قوندىرعىلار بار. «تەلەفون تەرروريزمى» فاكتىلەرىنە توسقاۋىل قويىلدى دەسەك تە, سوڭعى ۋاقىتتا ينتەرنەت جەلىلەرىنىڭ ەلەكتروندىق پوشتالارى ارقىلى جالعان حابارلامالار تاراتۋ جيىلەپ كەتكەن. وسىعان بايلانىستى ىشكى ىستەر مينيسترلىگى مۇددەلى مەملەكەتتىك ورگاندارمەن بىرلەسە وتىرىپ, ارنايى توپ قۇرعان. ماماندار توبىنىڭ قىزمەتى شەتەلدىك ارىپتەستەرمەن, سونداي-اق كومپانيالارمەن ءىر-مەكەنجايلاردى, اككاۋنتتاردى جانە ەلەكتروندىق مەكەنجايلارمەن بايلانىستى باسقا دا دەرەكتەردى انىقتاۋ بويىنشا ءوزارا ارەكەت ەتۋگە باعىتتالعان.
جالپى اتالعان قىلمىس بويىنشا بيىل 8 ايدا سوتقا 14 قىلمىستىق ءىس جولدانىپ, 13 ادامعا سوت ۇكىمى شىعارىلعان. ولاردىڭ جەتەۋى باس بوستاندىعىنان ايىرىلىپ, ءتورت ادام باس بوستاندىعىن شەكتەۋ جازاسىنا تارتىلعان. ءبىر ازاماتقا قاتىستى ءماجبۇرلى مەديتسينالىق شارا قابىلداندى.
ەلىمىزدە اتالعان قىلمىستى جاساعانى ءۇشىن بەس مىڭ ايلىق ەسەپتىك كورسەتكىش مولشەرىندە ايىپپۇل (بۇگىندە 15,9 ملن تەڭگە) سالۋ نەمەسە تۇزەتۋ جۇمىسىنا تارتۋ, سونداي-اق بەس جىلعا دەيىنگى مەرزىمدە باس بوستاندىعىنان شەكتەۋ نەمەسە ايىرۋ جازاسىنا تارتۋ كوزدەلگەنىن اتاپ وتكەن ءجون. قىلمىستىق جاۋاپكەرشىلىك 14 جاستان باستالادى. سوتتىڭ شەشىمىنە سايكەس, وسىنداي حابارلامانىڭ سالدارىنان كەلتىرىلگەن زالالدىڭ بارلىق شىعىنى وتەلەدى. مۇنداي ءىس-ارەكەتتى كامەلەتكە تولماعاندار جاساعان جاعدايدا شىعىنداردى وتەۋ ولاردىڭ اتا-انالارىنا نەمەسە زاڭدى وكىلدەرىنە جۇكتەلەدى.
