«ەگەر ۇبت-نى اقىلى نەگىزدە تاپسىرۋدىڭ تاعى ءۇش ارەكەتىن ەسكەرەتىن بولساق, وندا 2023 جىلعى تالاپكەر تەستىلەۋدى بەس رەت تاپسىرا الادى. مينيسترلىك نەگىزگى ەمتيحاننىڭ بارلىق جاڭالىقتارىن وقۋ جىلىنىڭ باسىندا, ياعني قىركۇيەكتە جاريالاۋ تۋرالى شەشىم قابىلدادى. بۇل بولاشاق تالاپكەرلەردىڭ نازارىن اۋدارىپ, ۇبت-عا جاقسى دايىندالۋعا كومەكتەسەدى دەپ ويلايمىز», دەدى قر ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
جالپى تەستىلەۋ فورماتىنا ەشقانداي وزگەرىستەر ەنگىزىلگەن جوق. پاندەر سانى دا وزگەرىسسىز قالادى. الايدا «قازاقستان تاريحى» جانە «وقۋ ساۋاتتىلىعى» پاندەرى بويىنشا تەست تاپسىرمالارىنىڭ سانىنا وزگەرىستەر ەنگىزىلدى. ەندى «قازاقستان تاريحىنىڭ» ءبىر نۇسقاسىندا 20 تەست تاپسىرماسى بولادى: ءبىر دۇرىس جاۋاپتى تاڭداۋمەن 10 تاپسىرما جانە كونتەكست نەگىزىندە 10 تاپسىرما. سونداي-اق بۇرىن تالاپكەرلەر «وقۋ ساۋاتتىلىعى» بويىنشا 20 سۇراققا جاۋاپ بەرسە, ەندى 3 ءماتىن بويىنشا 15 تەست تاپسىرماسى بەرىلەدى.
وسىلايشا, قازاقستان تاريحى بويىنشا – 20, وقۋ ساۋاتتىلىعى بويىنشا – 15, ماتەماتيكالىق ساۋاتتىلىق بويىنشا – 15 جانە ەكى بەيىندى ءپان بويىنشا 35 تاپسىرما بەرىلەدى. ەڭ جوعارعى ۇپاي سانى – 140. تەستىلەۋدىڭ جالپى ۋاقىتى 4 ساعاتتى (240 مينۋت) قۇرايدى. سونداي-اق ەرەكشە ءبىلىم بەرۋ قاجەتتىلىكتەرى بار بالالار ءۇشىن قوسىمشا 40 مينۋت ۋاقىت ساقتالادى.
ايتا كەتسەك, 2022-2023 وقۋ جىلىنان باستاپ ۇبت بەيىندىك پاندەر كومبيناتسيالارىنىڭ تىزبەسىنە «ينفورماتيكا» ءپانى ەنگىزىلدى. وسىعان بايلانىستى «ينفورماتيكا مۇعالىمدەرىن دايارلاۋ», «اقپاراتتىق تەحنولوگيالار», «اقپاراتتىق قاۋىپسىزدىك» ءبىلىم بەرۋ باعدارلامالارى توپتارىنا تۇسۋشىلەر ۇبت-نى «ماتەماتيكا-ينفورماتيكا» كومبيناتسياسى بويىنشا تاپسىرادى.
«قابىلدانعان شەشىمنىڭ ارقاسىندا تالاپكەرلەر ءوز بىلىمدەرىن جان-جاقتى كورسەتە الادى دەپ ۇمىتتەنەمىز. ال ۇبت-عا دايىندالۋ ءۇشىن تەگىن ونلاين تەستىلەۋ قولجەتىمدى بولىپ قالا بەرەدى, سونداي-اق جاقىن ارادا تەگىن ونلاين ساباقتار دا باستالادى. بيىل شەكتى بالدار وزگەرىسسىز قالادى. اكادەميالىق ادالدىقتى قامتاماسىز ەتۋ ماقساتىندا «1 كومپيۋتەر – 2 كامەرا – 1 تەستىلەنۋشى» قاعيداسى قاتاڭ ساقتالادى. كومپيۋتەرلىك ەكرانداردا تەستىلەۋدىڭ وزىندە كالكۋلياتور, پەريودتىق كەستە جانە تۇزداردىڭ ەرىگىشتىگى قولجەتىمدى بولادى», دەپ اتاپ ءوتتى رۋسلان ەمەلباەۆ.
