جەرلەسىمىز حالىقارالىق ءتۋرنيردىڭ جارتىلاي فينالىندا الەمنىڭ 65-راكەتكاسى رۋمىنيالىق اننا بوگدانمەن كەزدەسىپ, ەكى سەتكە جالعاسقان ماتچتا 6:1, 6:1 ەسەبىمەن باسىم ءتۇستى. ە.رىباكينا فينالدا WTA رەيتينگىندە 82-ورىندا تۇرعان 26 جاستاعى چەحيالىق كاتەرينا سينياكوۆامەن شەبەرلىك بايقاسادى. ەكى تەننيسشى بۇعان دەيىن كورتتا ءبىر-بىرىمەن التى مارتە كەزدەسىپ, ونىڭ تورتەۋىندە رىباكينا باسىمدىق تانىتقان. ال ەكى ماتچتا چەحيالىق تەننيسشى جەڭىسكە جەتتى. ەڭ سوڭعى رەت ەكى تەننيسشى وسى جىلدىڭ مامىر ايىندا مادريدتە ويناپ, كاتەرينا سينياكوۆا جاراقاتىنا بايلانىستى ماتچتى جالعاستىرۋدان باس تارتقان بولاتىن.
ايتا كەتەيىك, بۇل – ەلەنا رىباكينانىڭ جەكەلەي سىنداعى ونىنشى فينالى. ول بۇعان دەيىن Wimbledon-2022 جارىسىندا توپ جارعان بولسا, ونىڭ الدىندا 2019 جىلى رۋمىنياداعى, 2020 جىلى اۋسترالياداعى تۋرنيرلەردە باس جۇلدەنى ولجالاعان. سونداي-اق التى رەت WTA ساناتىنداعى جارىستىڭ ءفيناليسى اتانعان.
