كەزدەسۋ بارىسىندا اۋىل تۇرعىندارى مەن شارۋا قوجالىقتارىنىڭ باسشىلارى جەردىڭ قۇنارسىزدانۋى, قۇدىق تاپشىلىعى, سۋبسيديانىڭ تومەن دەڭگەيى, ديزەل وتىنى باعاسىنىڭ قىمباتتاۋى سەكىلدى ماسەلەلەردى كوتەردى.
Amanat-تىڭ اتقارۋشى حاتشىسى قۇرامىنا پارتيانىڭ دەپۋتاتتارى, باس پروكۋراتۋرانىڭ, اۋىل شارۋاشىلىعى مينيسترلىگىنىڭ وكىلدەرى, زاڭگەرلەر, قوعام قايراتكەرلەرى كىرەتىن كوميسسيا مۇشەلەرى اۋىل تۇرعىندارىنىڭ ماسەلەلەرىن ءبىلۋ ءۇشىن ەلىمىزدىڭ بارلىق وڭىرىندە كەزدەسۋلەر وتكىزىپ جاتقانىن اتاپ ءوتتى.
«مەملەكەت باسشىسى قاسىم-جومارت توقاەۆتىڭ تاپسىرماسى بويىنشا, پايدالانىلماي جاتقان جانە جەكە مەنشىككە زاڭسىز بەرىلگەن اۋىل شارۋاشىلىعى جەرلەرىن مەملەكەت مەنشىگىنە قايتارۋ جونىندە جۇمىس جۇرگىزىلۋدە. «جەر اماناتى» كوميسسياسىنىڭ مىندەتى – اۋىل تۇرعىندارى ءۇشىن جايىلىمعا تەڭ قولجەتىمدىلىكتى قامتاماسىز ەتۋ. ءۇش ايدىڭ ىشىندە پارتيانىڭ ارالاسۋىمەن 10 وڭىردە 1,6 ملن گەكتاردان استام جەر قايتارىلدى. ونىڭ ىشىندە قاراعاندى وبلىسىندا 1 ملن گەكتار جايىلىم مەملەكەت مەنشىگىنە ءوتتى. ءبىز بۇل ءىستى توقتاتپايمىز. وسى باعىتتاعى تۇراقتى جۇمىستى جالعاستىرامىز», دەدى اسحات ورالوۆ.
جايىلىم تاپشىلىعى جەر سالاسىنداعى جالعىز ماسەلە ەمەس ەكەنىن اتاپ وتكەن ماجىلىستەگى Amanat فراكتسياسىنىڭ مۇشەسى ەرلان سايروۆ كەزدەسۋلەردىڭ قورىتىندىسى بويىنشا زاڭناماعا ءتيىستى وزگەرىستەر ەنگىزىلەتىنىن ايتتى.
جەرگىلىكتى تۇرعىن نۇربول ارىنباەۆتىڭ ايتۋىنشا, اۋىل تۇرعىندارى «جەر اماناتى» كوميسسياسىنا ۇلكەن ءۇمىت ارتادى. «مال سانى ءوسىپ جاتىر. ال جەم-ءشوپ بازاسى جەتىسپەيدى. اسىرەسە شاعىن شارۋاشىلىقتارعا قيىن. جاڭا جايىلىمدار, مەملەكەت تاراپىنان قولجەتىمدى سۋبسيديالار قاجەت», دەپ اتاپ ءوتتى ول.
اۋدان تۇرعىندارىنىڭ باسىم بولىگى ەت جانە ءسۇت شارۋاشىلىعىمەن اينالىساتىنىن العا تارتقان شارۋا ەلدوس مايلىباەۆ: «جايىلىم تاپشىلىعى ءار اۋىلدا سەزىلەدى. كوميسسيا جۇمىسىنىڭ وسى وبلىستاعى ناقتى ناتيجەسىن كورىپ وتىرمىز. بۇل – قۋانارلىق جاعداي. پارتيالىقتارمەن كەزدەسۋدە وزگە دە تۇيتكىلدى ماسەلەلەردى اتاپ وتتىك. ول ماسەلەلەر دە ءوز شەشىمىن تابۋى ءتيىس», دەدى.
بەلگىلى زاڭگەر باقىتجان بازاربەك كوميسسيا مۇشەلەرى جايىلىمداردىڭ ءادىل بولىنۋىنە قول جەتكىزۋدى جالعاستىراتىنىن اتاپ ءوتتى. «وكىنىشكە قاراي, جەرگىلىكتى تۇرعىندار بارلىق جايىلىمنان شەتتەتىلدى. اۋىل تۇرعىندارى مۇنداي كوميسسيانى كۇتىپ وتىرعانىن كورىپ وتىرمىز. ءبارىن تەكسەرىپ, قازىردە كەيبىر وليگارحتاردىڭ جەرىن مەملەكەتكە قايتارىپ جاتىرمىز. تاعى دا قايتالاپ ايتامىن: زاڭ الدىندا ءبارى تەڭ», دەدى ول.
سونداي-اق كەزدەسۋلەر اياسىندا پارتيانىڭ قاراعاندى وبلىستىق فيليالىندا «جەر اماناتى» كوميسسياسىنىڭ مۇشەلەرى ازاماتتاردى قابىلدادى.
ايتا كەتۋ كەرەك, پارتيانىڭ جەر ماسەلەلەرىن نەعۇرلىم جەدەل شەشۋ ءۇشىن اشىلعان «جەدەل جەلى» تەلەفونىنا 1,5 مىڭنان استام ءوتىنىش كەلىپ تۇسكەن. ونىڭ بارلىعى وڭىرلىك كوميسسيالاردىڭ قاراۋىنا بەرىلدى.
