ۇلىبريتانيا سولتۇستىك يرلاندياعا تاسىمالدايتىن اۋىلشارۋاشىلىق ونىمدەرى مەن باسقا دا تاۋارلارىن شەكارادان ەركىن وتكىزۋ تۋرالى بىرجاقتى شەشىم قابىلدادى. بىرىككەن كورولدىك سونىمەن قاتار ەو باعدارلاماسىنىڭ جۇمىس توبىن, Brexit-ءتى ىسكە اسىرۋ جونىندەگى رەسمي فورۋم وكىلدەرىن وسى اپتادا جينالۋىن سۇراپ وتىر. The Guardian باسىلىمىنىڭ مالىمەتىنشە جيىندا ۇلىبريتانيانىڭ HorizonEurope فلاگماندىق عىلىمي قورىنان شىعارىلۋىن تالقىلاۋدى ۇسىنعان. ساراپشىلار «بۇل سولتۇستىك يرلاندياعا قاتىستى 16-باپقا قوسىمشا ارەكەتتەر جاريالاناتىنىنىڭ بەلگىسى نەمەسە ۇلىبريتانيانىڭ كەلىسسوزدەردى قايتا باستاۋعا رەسمي تۇردە دايىن ەكەندىگىن كورسەتەدى» دەگەن پىكىردە.
ال ەۋروكوميسسيانىڭ وكىلى ۇلىبريتانيانىڭ باسقوسۋ تۋرالى ۇسىنىسىن قاپەرگە العانىن, الايدا ناقتى جاۋاپ بەرە المايتىنىن مالىمدەدى. ەۋروپالىق وداق پەن يرلانديانىڭ كوشباسشىلارى پاتشايىمنىڭ قازاسى جانە ۇلىبريتانيا پرەمەر-ءمينيسترى ليز تراسس پەن اقش پرەزيدەنتى دجو بايدەن اراسىندا وسى اپتادا بولۋى ىقتيمال كەزدەسۋ ەكى ەل اراسىنداعى كەلىسپەۋشىلىكتەردى جويىپ, مامىلەگە كەلەدى دەپ ۇمىتتەنەدى. داۋنينگ-ستريت بۇل ماسەلەگە قاتىستى مالىمدەمە جاسامايدى, ويتكەنى ساياسي ءىس-شارالار پاتشايىمنىڭ 10 كۇندىك ازا تۇتۋ كەزەڭىندە توقتاتىلدى.
ۇلىبريتانيا سولتۇستىك يرلاندياداعى بىرجاقتى ارەكەتى بريۋسسەلمەن ۇزاققا سوزىلعان داۋدى شەشۋگە قاجەتتى قادام دەپ سانايدى. قازىر ۇلىبريتانيادان كەلىپ جاتقان اۋىلشارۋاشىلىق ونىمدەرى, سونىڭ ىشىندە شۇجىق, دايىن تاعامدار جانە ءسۇت ونىمدەرى سولتۇستىك يرلانديا دۇكەندەرىنە ەو ستاندارتتارىنا سايكەستىگىن تەكسەرۋسىز جەتكىزىلىپ جاتىر. ال بريۋسسەل بولسا « ۇلىبريتانيانىڭ بۇل ءىس-ارەكەتىن تولىق باعدارلاپ, باعالامايىنشا جاۋاپ بەرمەيدى», دەيدى ساراپشىلار.
ساراپشىلار پاتشايىم ءىى ەليزاۆەتانىڭ ولىمىنەن تۋىنداعان ساياسي ريتوريكانىڭ بولماۋى جەرلەۋ ءراسىمىنىڭ شەڭبەرىندە بايدەنمەن كەزدەسۋدىڭ رەتى قيىنعا سوعىپ, وسى اپتادا اقش-تا ليز تراسسپەن ىقتيمال ەكىجاقتى كەزدەسۋگە كەدەرگى كەلتىرۋى مۇمكىن ەكەنىن ايتادى. بريۋسسەلدەن ەۋرووداققا حات ەۋروپالىق كوميسسيا لوندوندى تاۋارلاردى سولتۇستىك يرلاندياعا تاسىمالداۋ كەزىندە كەدەندىك جانە تاۋەكەلدى باقىلاۋ تالاپتارىن ساقتامادى دەپ ايىپتاپ, ءتورت قۇقىق بۇزۋشىلىق ءىسىن باستاعاننان كەيىن ەكى اي وتكەن سوڭ كەلىپ وتىر. ول سونداي-اق ۇلىبريتانيانى الكوگولگە قاتىستى سالىق ەرەجەلەرىن ساقتامادى دەپ ايىپتادى. بريۋسسەلدىڭ ءتورت داۋلى ماسەلەسى وتكەن ايدا تۇسىرگەن ءۇش سوت پروتسەسىمەن جالعاستى. العاشقى سوت ءىسى 2021 جىلدىڭ ناۋرىز ايىندا باستالدى, بۇرىنعى Brexit ءمينيسترى لورد فروست ءبىرىنشى رەت اۋىلشارۋاشىلىق ونىمدەرى مەن باسقا دا تاۋارلارعا Brexit تەكسەرۋلەرىن بىرجاقتى توقتاتتى. «بريۋسسەل ەندى سوت ءىسىن ودان ءارى جالعاستىرادى دەپ كۇتىلۋدە, بىراق ول ۇلىبريتانيا سەكىلدى كەلىسسوزدەر ارقىلى شەشىم تابۋ ءۇشىن ەكى جاقتى كوزقاراستى ۇستانادى», دەيدى ساراپشىلار.
بۇعان دەيىن گەرمانيا مەن يرلانديا بىرلەسكەن مالىمدەمە جاساپ, ۇلىبريتانيانى Brexit كەلىسىمىنىڭ سولتۇستىك يرلانديا بولىگىنەن باس تارتۋعا تىرىسقانى ءۇشىن قاتتى سىنعا العان ەدى. ەكى ەلدىڭ سىرتقى ىستەر مينيسترلەرى اتىنان جاسالعان مالىمدەمەدە مۇنداي وزگەرىستەردىڭ «زاڭدى نەمەسە ساياسي نەگىزدەمەسى جوق» دەلىنگەن. نەگىزى ۇلىبريتانيا مەن ەو 2019 جىلى سولتۇستىك يرلانديانىڭ مارتەبەسى تۋرالى حاتتاماعا قول قويعان. سودان كەيىن تاراپتار سولتۇستىك يرلانديا مەن يرلانديا اراسىندا بۇرىنعىداي, ۇلىبريتانيادان ايىرماشىلىعى, كەدەندىك شەكارا بولمايدى دەپ كەلىستى. بىراق وسى جاعدايعا بايلانىستى كوپ ۇزاماي كەلىسپەۋشىلىكتەر
تۋىنداي باستادى. وتكەن جىلى ۇلىبريتانيانىڭ بۇرىنعى پرەمەر-ءمينيسترى بوريس دجونسون تاۋارلاردىڭ كەيبىر تۇرلەرىنە قاتىستى داۋلارعا قاتىستى كەلىسىمنىڭ ءبىر بولىگىن توقتاتامىز دەپ سەس كورسەتكەن ەدى. ماۋسىم ايىندا ۇلىبريتانيا سىرتقى ىستەر مينيسترلىگى كوپتەگەن تاۋارلاردىڭ ەو مەن سولتۇستىك يرلانديا اراسىنداعى شەكارادان قالىپتى كەدەندىك تالاپتارعا سايكەس ءوتۋىن تالاپ ەتەتىن حاتتاماعا تۇزەتۋلەر جوباسىن جاريالادى. ال ودان سوڭ ۇلىبريتانيانىڭ بۇرىنعى سىرتقى ىستەر ءمينيسترى ليز تراسس حاتتامانىڭ كەيبىر ەرەجەلەرىن تۇزەتۋ قاجەتتىگىن مالىمدەدى. وسىلايشا, داۋلى ماسەلەگە ءالى نۇكتە قويىلماي كەلەدى.
