ۇلىبريتانيا, رەسەي, تۇركيا, ءۇندىستان, شۆەيتساريا, گەرمانيا, قىتاي, گرەكيا, ەگيپەت, يوردانيا, ازەربايجان, بانگلادەش, وزبەكستان, قازاقستان, بەلارۋس ەلدەرىنىڭ عالىم دوكتورلارى باس قوسقان كونفەرەنتسيا دەنساۋلىق ساقتاۋ مينيسترلىگىنىڭ ن.باتپەنوۆ اتىنداعى ۇلتتىق عىلىمي تراۆماتولوگيا جəنە ورتوپەديا ورتالىعىنىڭ, قازاقستاندىق تراۆماتولوگ-ورتوپەدتەر قاۋىمداستىعىنىڭ, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەت پەن تۇركىستان وبلىسىنىڭ قوعامدىق دەنساۋلىق باسقارماسىنىڭ ۇيىمداستىرۋىمەن وتۋدە. كونفەرەنتسيانىڭ اشىلۋىنا تۇركىستان وبلىسى اكىمنىڭ ورىنباسارى ارمان ءسابيتوۆ, قوعامدىق دەنساۋلىق باسقارماسىنىڭ باسشىسى مارات پاشيموۆ, قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى رەكتورىنىڭ وكىلى جەنگيز تومار قاتىستى. تراۆماتولوگيا جانە ورتوپەدياداعى اۋرۋلاردى ەمدەۋ ادىستەرىمەن جانە تاجىريبەسىمەن الماسۋدى ماقسات ەتكەن حالىقارالىق كونفەرەنتسيادا الەمنىڭ جەتەكشى كلينيكالارىنىڭ كورمەسى دە ۇيىمداستىرىلدى. بەس زالعا بولىنگەن سەلەكتسيالىق وتىرىستاردا سپيكەرلەر ءوز باياندامالارىن وقىپ, عىلىمي-زەرتتەۋ جۇمىستارىمەن, تراۆماتولوگيا جانە ورتوپەديا سالاسىنداعى جەتىستىكتەرىمەن ءبولىستى. اتاپ ايتقاندا, مەديتسينا ماماندارى «بۋىنداردىڭ ارتروپلاستيكاسى», «بۋىنداردىڭ ەمدىك-دياگنوستيكالىق ارتروسكوپياسى», «بالالار ورتوپەدياسى مەن تراۆماتولوگياسىنىڭ وزەكتى ماسەلەلەرى», «جامباس جانە ومىرتقا جاراقاتتارىن ەمدەۋدىڭ زاماناۋي تاسىلدەرى», «تراۆماتولوگيا جانە ورتوپەدياداعى يننوۆاتسيالىق تەحنولوگيالار» جانە «تابان حيرۋرگياسى» تاقىرىپتارىندا وي-پىكىرلەرىن ورتاعا سالدى.
ءىس-شارانىڭ ءبىرىنشى كۇنى تىرەك-قيمىل اۋرۋلارى سالاسىنداعى ەمدەۋدىڭ جاڭا ادىستەرى تۋرالى بارلىعى 128 بايانداما وقىلدى. سونىمەن قاتار كورنەكى وپەراتسيامەن ماستەر-كلاسستار وتكىزىلدى. 15 ەلدەن 1500-دەن استام قاتىسۋشى كەلگەن كونفەرەنتسيا گيبريدتى فورماتتا وتۋدە. سونداي-اق كونفەرەنتسيانىڭ ونلاين كورسەتىلىمىنە قاتىسۋشىلار دا از ەمەس. كونفەرەنتسيانىڭ ەكىنشى كۇنىنە «بايتەنوۆ وقۋلارىن» وتكىزۋ جوسپارلانعان. ونىڭ ءبىر ەرەكشەلىگى 40 جاستان اسپاعان, ياعني مەديتسينالىق جوعارى وقۋ ورىندارىنىڭ ستۋدەنتتەرى, ينتەرندەر, رەزيدەنتتەر, عىلىمي زەرتتەۋلەرگە بەلسەندى قاتىساتىن عىلىمي قىزمەتكەرلەر بايانداما جاسايدى.
ايتا كەتەلىك, ن.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعىندا ەلىمىزدىڭ جەتەكشى ورتوپەد-تراۆماتولوگتارى ومىرتقانى ترانسپەديكۋليارلىق بەكىتۋ سياقتى كۇردەلى وتا جاسايدى. رەنتگەن باقىلاۋىمەن جۇزەگە اساتىن وپەراتسيا حيرۋرگقا ءار قوزعالىستى ءدال باقىلاۋعا جانە جاقىن ورنالاسقان اناتوميالىق قۇرىلىمدارعا زاقىم كەلتىرمەۋگە مۇمكىندىك بەرەدى.
