26 جاستاعى الماتى قالاسىندا تۋىپ-وسكەن ءالي بوزبالا شاعىنان تانىمال باپكەر ساعاتبەك مۇساحانوۆتىڭ قول استىندا جاتتىقتى. اۋەسقويلار اراسىندا ءتۇرلى جارىستارعا قاتىسىپ, جەڭىس تۇعىرىنا كوتەرىلدى. ەرەسەكتەر اراسىندا ەل بىرىنشىلىگىنىڭ قولا جۇلدەگەرى, بىرقاتار حالىقارالىق ءتۋرنيردىڭ جەڭىمپازى اتاندى. ەلىمىزدىڭ ەڭبەك سىڭىرگەن جاتتىقتىرۋشىسى داستان سادۋاقاسوۆتىڭ جەتەكشىلىگىمەن ستۋدەنتتەر اراسىندا الەم جانە ازيا چەمپيوناتتارىنا قاتىسىپ, جەڭىس تۇعىرىنىڭ ەڭ بيىك ساتىلارىنا كوتەرىلدى. 2016 جىلى احمەدوۆ كاسىپقوي رينگتە كۇش سىناسۋعا بەل بۋدى. سول ارالىقتا 18 كەزدەسۋ وتكىزىپ, 17-سىندە جەڭىسكە جەتتى. 14 باسەكەنى مەرزىمىنەن بۇرىن اياقتادى. وسىدان ەكى جىل بۇرىن ءاليدىڭ IBF نۇسقاسى بويىنشا ەكىنشى ورتا سالماقتا الەم چەمپيونى اتانۋعا تاماشا مۇمكىندىگى بولدى. بىراق ول ەكۆادورلىق كارلوس گانگوراعا ەسە جىبەردى.
لاس-ۆەگاستا ءالي احمەدوۆ گابريەل روسادومەن كۇش سىناسادى. 36 جاستاعى اقش بوكسشىسى 42 كەزدەسۋدىڭ 26-سىندا جەڭىسكە جەتىپ, 15 قارسىلاسىن ەسىنەن تاندىردى. 14 جەكپە-جەكتە جەڭىلىس تاپتى. ءبىر باسەكە تەڭ اياقتالسا, تاعى بىرەۋىنىڭ ناتيجەسى ەسەپكە الىنبادى. 2013 جىلى روسادو ءبىزدىڭ گەننادي گولوۆكينمەن جۇدىرىقتاسىپ, جەتىنشى راۋندتا تەحنيكالىق نوكاۋتپەن ۇتىلدى.
