توعىز بالا مەكتەپ اسحاناسىندا ۋلانىپ قالدى

وقيعا 8 قىركۇيەك كۇنى شارباقتى اۋدانىنداعى №2 ورتا مەكتەبىندە ورىن الىپتى. بالالار كەلەسى كۇنى  جەرگىلىكتى ەمدەۋ مەكەمەسىنە قۇسۋ، ءىشتىڭ قۇرىسۋى مەن ءوتۋى بويىنشا شاعىمدانىپ، كەيبىرىندە دەنە قىزۋى 39 گرادۋسقا دەيىن كوتەرىلگەن. سانيتارلىق-ەپيدەميولوگيالىق قىزمەت ماماندارىنىڭ بولجامىنشا، وقۋشىلار مەكتەپ اسحاناسىندا ۋلانۋى مۇمكىن.

وقۋشىلاردىڭ تورتەۋى وبلىستىق بالالار اۋرۋحاناسىنا جەتكىزىلگەن. بارلىق بالالاردىڭ ىشىندە ءۇش قىزدىڭ ەكەۋى 2-سىنىپتا، بىرەۋى 9-سىنىپتا، ءبىر ۇل 4-سىنىپتا وقيدى، وزگەسى 6-سىنىپتا ءبىلىم الۋدا.

مەكتەپ اسحاناسىندا جوسپاردان تىس تەكسەرۋ جۇرگىزىلىپ، سانيتارلىق دارىگەرلەر بىرقاتار كەمشىلىكتى انىقتادى. ايتۋلارىنشا، توڭازىتقىش جابدىقتارى تەرمومەترمەن قامتاماسىز ەتىلمەگەن، تاماقتاردىڭ تاۋلىكتىك سىنامالارى دۇرىس ساقتالمايدى، تاعام تاسۋعا ارنالعان تاباقشالارى جارىلعان، ال تاماق ىشۋگە ارنالعان ىدىستارى ەسكى ءارى مۇجىلگەن. ءتىپتى اسپازداردا جۇمىسقا كىرىسۋگە دارىگەرلىك رۇقساتى قاعازى بولماي شىققان.

وبلىستىق دەنساۋلىق ساقتاۋ باسقارماسىنىڭ مالىمەتىنشە، اۋرۋحاناعا جاتقىزىلعان بالالاردىڭ بارلىعى بۇگىن شىعارىلىپ، ۇيلەرىنە جىبەرىلدى. جاعدايلارى قالىپتى دەپ تانىلعان.

اۋداندىق ءبىلىم بەرۋ ءبولىمىنىڭ مالىمەتىنشە، مەكتەپتەگى اسحانا قىزمەتىن «ابۋەۆ» جەكە كاسىپكەرلىگى ۇيىمداستىرادى. تەكسەرۋ ناتيجەسى بويىنشا جاۋاپتى تۇلعالارعا شارا قولدانىلاتىن بولادى.