جيىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين Smart Data Ukimet مەملەكەتتىك پلاتفورماسىن دامىتۋ اياسىندا الەۋمەتتىك قولداۋ شارالارىن پرواكتيۆتى تۇردە تاعايىنداۋ ءۇشىن «وتباسىنىڭ تسيفرلىق كارتاسى» اقپارات جۇيەسى ازىرلەنگەنىن حابارلادى.
ەلىمىزدىڭ بارلىق ازاماتتارى جۇيەدە 5,9 ملن وتباسىعا, ەكونوميكالىق, الەۋمەتتىك جانە تۇرعىن ءۇي جاعدايلارى, دەنساۋلىق كورسەتكىشتەرى مەن ءبىلىمى بويىنشا 5 ساناتقا بولىنگەن. وسى مالىمەتتەر نەگىزىندە قاجەتتى قولداۋ شارالارى انىقتالادى, سودان كەيىن ازاماتتارعا ولاردى قابىلداۋ تۋرالى SMS-حابارلاما جىبەرىلەدى.
پرەمەر-مينيستر جۇرگىزىلىپ جاتقان جۇمىستى قولداپ, مالىمەتتەردى ءتيىمدى تالداۋ جانە حالىققا مەملەكەتتىك قىزمەت كورسەتۋ ساپاسىن ارتتىرۋ ءۇشىن بىرىڭعاي پلاتفورما بازاسىندا مەملەكەتتىك ورگاندار مەن كۆازيمەملەكەتتىك كومپانيالاردىڭ اقپاراتتىق جۇيەلەرىنىڭ ينتەگراتسياسىن جانداندىرۋدى تاپسىردى.
جيىندا دەنساۋلىق ساقتاۋ مينيسترلىگىنىڭ جانە ۆەدومستۆوعا قاراستى جانە مەديتسينالىق ۇيىمدارىنىڭ بارلىق اقپاراتتىق جۇيەلەرىن بىرىكتىرەتىن eHealth ەلەكتروندىق دەنساۋلىق ساقتاۋ ارحيتەكتۋراسىن دامىتۋ ماسەلەلەرى زەردەلەندى. بۇل ازاماتتاردىڭ ۇلتتىق ەلەكتروندىق دەنساۋلىق پاسپورتىن تولىققاندى قالىپتاستىرۋعا ىقپال ەتىپ, ءاربىر ناقتى ادامنىڭ قاجەتتىلىگىنە باعدارلانعان مەديتسينالىق كومەكتىڭ ساپاسى مەن قولجەتىمدىلىگىن ارتتىرۋدى, سونداي-اق جالپى پاتسيەنتتەردىڭ دەنساۋلىق جاعدايىن ۇزدىكسىز باقىلاۋعا كوشۋدى قامتاماسىز ەتەدى.
وتىرىس بارىسىندا بەسىنشى بۋىنداعى 5G/IMT ۇيالى بايلانىس ستاندارتىن ەنگىزۋ ماسەلەسى قارالدى. جاقىن ارادا ءتيىستى راديوجيىلىكتەردى ءبولۋ بويىنشا اشىق اۋكتسيون وتكىزىلەدى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتتەرى بويىنشا, باسەكەلەستىك جاعدايلاردى قامتاماسىز ەتۋ ماقساتىندا وعان 100-گە جۋىق كومپانيا قاتىسا الادى.
