گەننادي گولوۆكين لاس-ۆەگاستاعى جەكپە-جەگى الدىندا Tengrinews تىلشىسىنە سۇحبات بەرگەن. ول مەكسيكالىق ساۋل «كانەلو» الۆارەسكە جاۋاپ بەرىپ, ءتورتىنشى جەكپە-جەك وتكىزىلۋى مۇمكىن ەكەنىن ايتقان.
«كانەلومەن» بولعان سوڭعى جەكپە-جەكتەن كەيىن ءتورت جىل وتكەنى ءمالىم. گولوۆكيننىڭ ايتۋىنشا, سول ۋاقىت ىشىندە ونىڭ كاسىبي مانسابى عانا ەمەس, بارشا الەم وزگەردى.
«وسى ءتورت جىل ىشىندە كوپ نارسە بولدى. الەمدە پاندەميا باستالىپ, كوبى اۋىرىپ, جاقىندارىنان ايىرىلدى. شىنىندا دا قيىن ۋاقىت بولدى. ءبىزدىڭ جەكپە-جەگىمىزدى جاريالاعان كەزدە «بۇنىڭ دا ۋاقىتى جەتكەن عوي, ءسىرا» دەپ ويلادىم», دەيدى سپورتشى.
وسى تۇستا, ساۋل الۆارەستىڭ ءوزى بۇل جەكپە-جەكتىڭ استارىندا «جەكە ماسەلە» جاتقانىن بىرنەشە رەت ايتقان ەدى. قازاقستاندىق بوكسشى وسى سوزگە قاتىستى ءوز پىكىرىن ءبىلدىردى.
«ونىڭ ءوزى ءۇشىن بۇل «جەكە ماسەلە» شىعار. سىرتتان كورىپ وتىرعانىمداي, بۇل DAZN-داعى سوڭعى جەكپە-جەك. ەندى, ءتورت جىلدان كەيىن, الۆارەستىڭ «مەن ونى نوكاۋتقا جىبەرەمىن», «مەن ونىڭ مانسابىن اياقتايمىن» دەگەن قۇرعاق اڭگىمەلەرى دە پايدا بولادى. ول مەنىڭ مانسابىمدى قالاي اياقتايدى؟ ول مەنىڭ مانسابىمدى باستايتىن نەمەسە اياقتايتىن كىم؟ مەنىڭ ويىمشا, بۇنىڭ بارلىعى ءوزىن جوعارىلاتۋ ءۇشىن ايتىلاتىن بوس ءسوز. وسىنداي مالىمدەمە جاساۋ ءۇشىن ونىڭ جاسى دا جاعدايى دا ءالى جەتپەگەن. ەگەر بۇل جەكە نارسە بولسا, ول بىردەن شەشىلەتىن ەدى», دەدى گولوۆكين.
سۇحبات بارىسىندا جۋرناليست سپورتشىدان «كانەلومەن» ءۇشىنشى جەكپە-جەككە نەگە كەلىسكەنىن سۇرادى.
«بارلىق بوكسشىلاردىڭ تريلوگيا وتكىزۋگە مۇمكىندىگى بولا بەرمەيدى. بۇل جەردە تەك ءبىر قاعيداتتى ءتۇسىنۋ كەرەك: نە بوكستا قالاسىڭ, نە بوكستان كەتەسىڭ. 40 جاسقا قاراعان شاعىمدا ءالى دە كۇش-جىگەرىمدى ساقتاپ, سۇرانىسقا يە بولعانىما قۋانىشتىمىن. شارشى الاڭعا تاعى شىعامىن دەپ شەشتىم», دەدى بوكسشى.
گەننادي گولوۆكين ءوز قارسىلاسىن, ونىڭ كۇرەسۋ ءستيلى مەن مىنەزىن جاقسى تانىپ ۇلگەرگەنىن ايتىپ, الداعى كەزدەسۋ قالاي وتەتىنىنە بولجام جاسادى.
ء«بىز ءبىر-ءبىرىمىزدى وتە جاقسى بىلەمىز. ەكەۋىمىز ءۇشىن دە بۇل وتە قيىن كۇرەس ەكەنىن تۇسىنەمىز. الدىڭعى ەكى جەكپە-جەك - بۇل تاريح. ولار كەرەمەت, كورنەكتى بولدى, مەنىڭ ويىمشا, ولاردىڭ ماعىناسىن تومەندەتۋگە بولمايدى. دەگەنمەن, تريلوگيا - بۇل مۇلدەم باسقا كۇرەس. بۇل ەستە قالارلىق ءسات بولادى دەپ ۇمىتتەنەمىن», دەدى ول.
جاقىندا «كانەلو» گولوۆكيندى ءتورتىنشى جەكپە-جەككە شاقىرۋى مۇمكىن دەگەن اقپارات تارادى. الايدا گولوۆكيننىڭ ءوزى الداعى تريلوگيا ول ءۇشىن DAZN-دە سوڭعى بولۋى مۇمكىن ەكەنىن جوققا شىعارمايدى.
«سەن سۇرانىسقا يە بولساڭ عانا بوكستا قالاسىڭ. مەنىڭ بوكستا ءالى دە ورىندالماعان جوسپارلارىم بار. ەگەر تريلوگيا بارىسىندا ەكەۋىمىز دە تەڭ ءتۇسىپ, جەڭىمپاز انىقتالماسا, ءتورتىنشى كەزدەسۋدى نەگە وتكىزبەسكە؟ بىراق بۇل مۇلدەم باسقا جاعدايلاردا بولادى. مەن بۇعان قاتىسقىم كەلەدى, ءيا. بىراق مەنىڭ ورتا سالماقتاعى ءۇش چەمپيوندىق بەلبەۋىم بار ەكەنىن ۇمىتپاڭىزدار», دەپ قورىتىندىلادى گ.گولوۆكين.
