وسىنداي اسا كۇردەلى دە قيىن كەزەڭدە قازاقستان استاناسىندا الەمدىك جانە ءداستۇرلى دىندەر كوشباسشىلارىنىڭ VII سەزىنىڭ ءوتۋى – ۇلكەن تاريحي وقيعا. قازاقستانعا العاش رەت مەملەكەتتىك ساپارمەن كەلگەن ۆاتيكاننىڭ جانە كاتوليك شىركەۋىنىڭ باسشىسى ريم پاپاسى فرانتسيسكتىڭ قازاق ەلىنە ارناعان ءسوزىن تىڭداۋ مارتەبەسى بۇيىردى. ريم پاپاسىنىڭ قازاقستاندى تىنىشتىق پەن بىرلىكتىڭ ۇلى ەلى دەپ اتاۋى, حالقىمىزدىڭ بارلىق دىندەرگە زور قۇرمەتپەن قارايتىندىعىن قازاقتىڭ قاسيەتتى دومبىراسىنىڭ قوس ىشەگىمەن ۇيلەستىرۋى ەرەكشە وي تاستادى.
راسىندا, دومبىرانىڭ قوس شەگىنىڭ ۇيلەسىمدىلىگىنە بار دۇنيە تىرشىلىگى, ادامي قارىم-قاتىناستىڭ بارلىق زاڭدىلىقتارى باعىنىپ تۇر ەمەس پە؟! «ادامزاتتىڭ ءبارىن ءسۇي باۋىرىم» دەپ اباي حاكىم ايتقان قاعيدا بۇكىل حالىقتىڭ باستى ۇستانىمىنا اينالمايىنشا, جەر ۇستىندە بەيبىتشىلىك ورناماسى انىق.
2003 جىلدىڭ 23-24 قىركۇيەگىندە استانادا وتكەن الەمدىك جانە ءداستۇرلى دىندەر ليدەرلەرىنىڭ ءى سەزىنەن بەرگى ۋاقىتتا دۇنيە تىنىسى القىنىپ, جۇرەك سوعىسى دا جيىلەپ, ادام بالاسىنىڭ جاراتقان بەرگەن تىرشىلىك ءۇشىن كۇرەسىنىڭ جانتالاسى كۇشەيمەسە, باسەڭسىمەگەن سىڭايلى. بۇعان بۇگىنگى الەم كۋا.
الەمدىك ماڭىزى بار ءتۇرلى دىندەر ليدەرلەرى فورۋمىنىڭ ۇلى دالا توسىندەگى قازاق جەرىندە جينالۋى جالپى ادامزات بالاسىنىڭ ءوزارا تۇسىنۋشىلىك جانە ءبىرىن-ءبىرى قۇرمەتتەۋ, ءبىرىنىڭ ءۋاجىن ءبىرى توزىمدىلىكپەن تىڭداي ءبىلۋى ارقىلى بەيبىت ءومىر ءسۇرۋ ءۇشىن ءبىر قادام بولسا دا ىلگەرى باسقاندىعىن بىلدىرسە كەرەك.
قازىر زامان باسقا, الەم باسقا. قازاق ەلىنىڭ دە بۇگىنگى ۇستانىمى باسقا. قازاق قوعامى ادىلدىك ىزدەپ, لايىقتى ءومىر ءسۇرۋدى اڭساپ وتىر. ءبىزدىڭ دۇنيەتانىمىمىز بەن كوزقاراسىمىزدى وزگەرتكەن – قاڭتار وقيعاسى. قاسىرەتتى قاڭتاردا ەل تىنىشتىقتىڭ باعاسىنا انىق كوز جەتكىزدى. ەلدى جايلاعان زاڭسىزدىق, جەمقورلىق, ادىلەتسىزدىك سياقتى كەلەڭسىزدىكتەر حالىقتى تيتىقتاتىپ, اشۋ-ىزاسىن تۋدىرعانى انىق. قازىر ەلىمىزدە ءادىل قوعام ورناتۋ, «حالىق ۇنىنە قۇلاق اساتىن مەملەكەت» قۇرۋ جانە جاڭا قازاقستاندى ورنىقتىرۋ جولىندا تىڭ باستامالار قولعا الىنۋدا.
ەلوردادا باستالعان الەمدىك دىندەر كوشباسشىلارىنىڭ VII سەزىندە پرەزيدەنت: ء«بىزدىڭ مۇددەمىز جانە نيەتىمىز – ءبىر. ءبارىمىز دە بەيبىت ءارى بەرەكەلى بولاشاققا قادام باسۋدى قالايمىز», دەدى. وسى ءبىراۋىز ءسوز بۇكىل قازاق ەلىنىڭ بەرىك ۇستانىمىن الەم جۇرتشىلىعى الدىندا بەكەمدەتە ءتۇستى.
جابال ەرعاليەۆ,
قازاقستاننىڭ ەڭبەك سىڭىرگەن قايراتكەرى, سەناتورلار كەڭەسىنىڭ مۇشەسى
