الەمنىڭ ءار تۇكپىرىنەن كەلگەن مارتەبەلى مەيماندار ەلىمىزدەگى بىرەگەي ونەر ورداسىنىڭ كلاسسيكالىق كوركەم ساۋلەتىن كورىپ, ەرەكشە اسەر الدى. الدىمەن ساحناعا كوتەرىلگەن قازاقستاننىڭ ەڭبەك سىڭىرگەن قايراتكەرى نۇربولات ارزاماس پەن حالىقارالىق بايقاۋلاردىڭ لاۋرەاتى جاقسىكەلدى ماياساروۆ ۇلتتىق ناقىشقا باي ءداستۇرلى اندەردى شىرقاپ, حالقىمىزدىڭ ونەرىن پاش ەتتى. ال دارىندى سكريپكاشى, پ.ي.چايكوۆسكي اتىنداعى حالىقارالىق بايقاۋدىڭ لاۋرەاتى اقبيكە العي دجون ءۋيليامستىڭ «شيندلەر ءتىزىمى» كينوفيلمىنەن الىنعان «جوعالعان جۇماق» شىعارماسىن ورىنداپ, تىڭدارمانداردى تولقىتتى. ايتا كەتەيىك, تانىمال كومپوزيتور حولوكوست كەزىندە مىڭنان استام پولشالىق ەۆرەيلەردى ولىمنەن قۇتقارعان وسكار شيندلەر جايلى وسى فيلمگە مۋزىكا جازعانى ءۇشىن «وسكار» مەن «گرەممي» سىيلىعىن قاتار العان.
سونداي-اق قازاقستاننىڭ ەڭبەك سىڭىرگەن قايراتكەرلەرى, سوليستەر ازامات جىلتىركوزوۆ پەن بيبىگۇل جانۇزاق تەاتردىڭ حورى جانە سيمفونيالىق وركەسترىمەن بىرگە احمەت جۇبانوۆ پەن لاتيف ءحاميديدىڭ «اباي» وپەراسىنان «تويباستاردى» ورىنداپ كەشتىڭ كورىگىن قىزدىرسا, قازاقستاننىڭ ەڭبەك سىڭىرگەن قايراتكەرى ءجاميلا جارقىمباەۆا دج.كاچچينيدىڭ مۋزىكانتتاردىڭ ماڭگىلىك شابىتىنا اينالعان Ave Maria شىعارماسىن ۇسىندى. حالىقارالىق بايقاۋلاردىڭ لاۋرەاتى ەلەنا گانجا «بيكەش توعايدا سەرۋەن قۇردى» اتتى پولياكتىڭ حالىق ءانىن تامىلجىتىپ شىرقاپ, جۇرتشىلىقتى جىلى اسەرگە بولەدى.
سونىمەن قاتار اتالعان تەاتردىڭ باس حورمەيستەرى, قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆتىڭ جەتەكشىلىگىمەن «استانا وپەرا» حورى پ.ي.چايكوۆسكيدىڭ «ەۆگەني ونەگين» وپەراسىنان «شارۋالار حورىن» تارتۋ ەتسە, ال «استانا وپەرا» بالالار حورى احمەت جۇبانوۆتىڭ «اق كوگەرشىن» تۋىندىسىن ناقىشىنا كەلتىرە ورىنداپ, بەيبىتشىلىكتى دارىپتەگەن ءاننىڭ بايراعىن بيىككە كوتەردى. سونداي-اق دومبىراشىلار ءانسامبلىنىڭ «كۇي شاشۋ» ءپوپۋرريى, م.ابدۋدىڭ Aqrab El Nas-ىن ۇسىنعان «استانا سازى» ءانسامبلى مەن وركەسترىنىڭ شىعارمالارى دا شىنايىلىعىمەن ءتانتى ەتسە, «استانا بالەت» تەاترىنىڭ «ارۋلار شەرۋى» مەن رەسپۋبليكالىق اكادەميالىق كورەي تەاترىنىڭ «سامبۋك» حورەوگرافيالىق كومپوزيتسياسى دا كورەرمەندەردى بەيجاي قالدىرمادى. اسىرەسە «ماڭگىلىك ەل», «ادەمى-اۋ», «كونتراست», «ۆايناح», كورەي تەاترى سەكىلدى بەس بي ءانسامبلى بىرىگىپ قويعان «بىرلىگىمىز – ارالۋاندىقتا» حورەوگرافيالىق كومپوزيتسيا – وسى كونتسەرتتىڭ نەگىزگى سيمۆولىنا اينالدى.
اسەم سازدى كەش سوڭىندا ساحناعا قازاق ونەرىن الەمگە تانىتىپ جۇرگەن دارىندى ءانشى ديماش قۇدايبەرگەن شىعىپ, ول مۋزىكاسىن ءوزى جازعان The story of one sky اتتى ءانىن كەڭ تىنىستى كوركەم داۋىسىمەن شىرقاپ, كونتسەرتكە كەلگەن قاۋىمنىڭ ىستىق ىقىلاسىنا بولەندى. قىسقاسى, مازمۇندى باعدارلاماعا تولى مۋزىكالىق كەش مارتەبەلى قوناقتاردىڭ الدىندا قازاقتىڭ عانا ەمەس, ەلىمىزدە تۇرىپ جاتقان بارلىق حالىقتىڭ ونەرىن اسقاقتاتتى.
