چەليابى «تراكتورىنىڭ» دا جارىس كەستەسىندەگى جاعدايى اسا ءماز ەمەس ەدى. ءوز جانكۇيەرلەرىنىڭ كوز الدىندا قالايدا ۇپاي الۋدى كوزدەگەن اندرەي سكابەلكانىڭ شاكىرتتەرى بۇل جولى مۇزايدىندا بارىن سالدى. ءبىرىنشى كەزەڭنىڭ 6-مينۋتىندا ليندەن ۆەي العاشقى گولدى سالسا, 15-مينۋتتا كيريلل ساۆيتسكي نىسانانى ءدال كوزدەدى. ەكى رەتىندە دە ولار نيكيتا ميحايليستەن ادەمى پاس الدى. ۇزىلىسكە دەيىن قوناقتار ەسەپ ايىرماشىلىعىن قىسقارتىپ ۇلگەردى. بۇل گولدىڭ اۆتورى – تەەمۋ پۋلككينەن. ودان كەيىن ەكى كوماندانىڭ ويىنشىلارى ۇزاق ۋاقىت بويى دامىلسىز شابۋىلداعانىمەن, تابلوداعى ەسەپ وزگەرگەن جوق. تەك باسەكەنىڭ اياقتالۋىنا ءبىر مينۋتتاي عانا ۋاقىت قالعاندا تاعى دا سول ۆەي مەرگەندىك تانىتىپ, ماتچتىڭ سوڭعى نۇكتەسىن قويدى. ەسەپ – 3:1.
كەلەسى ەكى كەزدەسۋىن «بارىس» 15 جانە 16 قىركۇيەكتە ومبىنىڭ «اۆانگاردىمەن» وتكىزەدى. ال 18 جانە 20 قىركۇيەكتە نوۆوسيبيرسكىنىڭ «سيبير» كلۋبىمەن كۇش سىناسادى. اتالعان ويىنداردىڭ بارلىعى دا نۇر-سۇلتاندا وتەدى.
