مازمۇندى ساپار اياسىندا ءبىر توپ احمەتتانۋشى عالىمدار الدىمەن قوستاناي وبلىسىنىڭ اۋليەكول اۋدانىنداعى احمەت اتامىزدىڭ بيۋستىنە گۇل شوعىن قويىپ, ودان سوڭ ا.بايتۇرسىن ۇلى اتىنداعى قوستاناي مەملەكەتتىك ۋنيۆەرسيتەتىندە دوڭگەلەك ۇستەل وتكىزەدى. سودان كەيىنگى ءىس-شارا ارقالىق قالاسىنداعى ى.التىنسارين اتىنداعى پەداگوگيكالىق ينستيتۋتىنداعى ۇلت ۇستازىنا ارنالعان عىلىمي-تاجىريبەلىك كونفەرەنتسياعا ۇلاسادى.
بۇدان سوڭ ەكسپەديتسيا مۇشەلەرى تورعاي جەرىنە بەت الىپ, جولاي احاڭنىڭ رۋحاني سەرىگى مىرجاقىپ دۋلات ۇلىنىڭ جانگەلدين اۋدانى بيدايىق اۋىلىنداعى كەسەنەسىنە سوعىپ, ۇلت قايراتكەرىنىڭ رۋحىنا دۇعا باعىشتاسا, 16 قىركۇيەكتە احمەتتانۋشىلار تورعايداعى احاڭ مەن جاقاڭنىڭ ەسكەرتكىشىنە تاعزىم ەتىپ, الاشتىڭ قوس ارىسى اتىنداعى مۋزەيدى ارالاپ, اۋدان جۇرتشىلىعىمەن جۇزدەسەدى. سونداي-اق عالىمدار احمەت اتامىزدىڭ تۋعان اۋىلىنا دا ات باسىن تىرەپ, اتا-باباسىنىڭ زيراتىنا ءتاۋ ەتىپ, ەل ادامدارىمەن كەزدەسەدى.
«الدىمىزدا ۇزاق تا قاسيەتتى جول تۇر. احاڭنىڭ رۋحىمەن قاۋىشۋ, احاڭ رۋحىن جاڭعىرتۋ, ءىزى قالعان توپىراقتى باسىپ ءوتۋ بولەكشە قادام, ەرەكشە سەزىممەن ورىندالاتىن ءىس بولسا كەرەك. ەندى وسى ساپاردى ابىرويمەن ءجۇرىپ وتۋگە جازسىن!» – دەيدى ەكسپەديتسيا مۇشەسى, بەلگىلى عالىم بەكجان ءابدۋالي ۇلى.
