«قازىرگىدەي قيىن كەزەڭدە ءدىن ليدەرلەرىنىڭ ءبىر ۇستەلدە كەزدەسۋى وتە ماڭىزدى. بۇل بۇكىل ادامزاتقا ورتاق پىكىرگە كەلىپ, كەز-كەلگەن ماسەلە بويىنشا شەشىم تابۋعا بولاتىندىعىن كورسەتەدى. مەنىڭ ويىمشا, سەزدىڭ باستى ميسسياسى مەن ەرەكشەلىگى ناق وسىندا», دەدى قاسىم-جومارت توقاەۆ.
ايتا كەتەيىك, بۇگىن ەلورداداعى تاۋەلسىزدىك سارايىندا قر پرەزيدەنتى قاسىم-جومارت توقاەۆتىڭ قاتىسۋىمەن الەمدىك جانە ءداستۇرلى دىندەر كوشباسشىلارىنىڭ VII سەزى وتۋدە.
VII سەزدىڭ باستى تاقىرىبى - پاندەميادان كەيىنگى كەزەڭدە ادامزاتتىڭ رۋحاني جانە الەۋمەتتىك دامۋىنداعى الەمدىك جانە ءداستۇرلى دىندەر كوشباسشىلارىنىڭ ءرولى.
ءدىني فورۋمنىڭ ەرەكشەلىگى - جوعارعى يمام ءال-ازحار شەيح احمەد ات-تايەبتىڭ, ءيزرايلدىڭ اشكەنازي ءراۆۆينى داۆيد لاۋدىڭ, ريم پاپاسى فرانتسيسكتىڭ قازاقستانعا رەسمي ساپارلارى.
ريم پاپاسىنىڭ سەزگە رەسمي ساپارى بارىسىندا ريم-كاتوليك شىركەۋىنىڭ لاتىن سالتىنداعى نەگىزگى ليتۋرگيالىق قىزمەت - اۋقىمدى ءدىني مەسسا وتەدى. مەسساعا ءتۇرلى ءدىن مەن كونفەسسيا وكىلدەرى قاتىسادى دەپ كۇتىلۋدە.
