19 جاستاعى يسپانيا وكىلىنىڭ بۇل تابىسىنا تامسانباۋ مۇمكىن ەمەس. بۇعان دەيىن دە بىرقاتار اسا ءىرى حالىقارالىق تۋرنيردە تابىستى ونەر كورسەتكەن ول اقش-تىڭ اشىق بىرىنشىلىگىندە دە الدىنا جان سالمادى. ءسويتىپ, الكاراستىڭ ەسىمى الەمنىڭ ءبىرىنشى راكەتكاسى اتاعىن يەلەنگەن ەڭ جاس ويىنشى رەتىندە تەننيس تاريحىندا قالدى. ەكىنشى ورىنعا كاسپەر رۋد كوتەرىلدى. 23 جاستاعى نورۆەگيالىق ويىنشى ءۇشىن دە بۇل بۇرىن-سوڭدى باعىنباعان بەلەس ەدى. ۇزدىك ۇشتىكتى اتاعى جەر جارعان يسپانيالىق رافاەل نادال تۇيىندەسە, رەسەيلىك دميتري مەدۆەدەۆ ءتورتىنشى ورىنعا سىرعىپ ءتۇستى. ودان كەيىنگى ساتىلارعا گەرمانيالىق الەكساندر زۆەرەۆ, گرەكيالىق ستەفانوس تسيتسيپاس, سەربيالىق نوۆاك دجوكوۆيچ, ۇلىبريتانيالىق كەمەرون نورري, رەسەيلىك اندرەي رۋبلەۆ جانە پولشالىق حۋبەرت حۋركاچ جايعاستى. قازاقستان ويىنشىلارى اراسىندا اتر رەيتينگىندە ەڭ ۇزدىك كورسەتكىش الەكساندر بۋبليككە تيەسىلى. ول 44-ورىندى يەلەندى.
ايەلدەر اراسىندا 21 جاستاعى پولياك قىزى يگا شۆيونتەك الدىنا جان سالار ەمەس. US Open تۋرنيرىندە ول الەمنىڭ ءبىرىنشى راكەتكاسىنا ساي ونەر كورسەتتى. شۆيونتەكتەن فينالدا ۇتىلعان مىسىرلىق ونس جابەر ەكىنشى ورىنعا كوتەرىلدى. سونداي-اق توپ-10 تەننيسشىنىڭ قاتارىندا انەتت كونتاۆەيت (ەستونيا), پاۋلا بادوسا (يسپانيا), دجەسسيكا پەگۋلا (اقش), ماريا ساككاري (گرەكيا), ارينا سوبولەنكو (بەلارۋس), كوكو گاۋفف (اقش), سيمونا حالەپ (رۋمىنيا) جانە كارولين گارسيا (فرانتسيا) بار. ۇزدىكتەر تىزىمىندە ەلەنا رىباكينا 25-ورىندا تۇرسا, يۋليا پۋتينتسەۆا 36-ساتىعا جايعاستى.
