پرەزيدەنت «ازاماتتاردىڭ سۇرانىسىنا سايكەس ونداعان اباتتاندىرۋ جوبالارى جۇزەگە اسىرىلدى», دەپ ءوزىن-ءوزى باسقارۋدىڭ كەيبىر قادامدارىنا قاناعات ءبىلدىردى. وسىنداي جۇمىستاردىڭ شىعىنى اۋداندار مەن اۋىلدىق وكرۋگ بيۋدجەتتەرىنە ەنگىزىلسە, مۇنداي جوبالار جالعاسىن تابا بەرەر ەدى جانە جۇيەلى تۇردە جۇرگىزىلەر ەدى. سوندا اۋىلدارىمىز جايناپ, قانداستارىمىزدىڭ كوشى-قونىن ارتتىرۋعا ءوزىنىڭ ىقپالدى ۇلەسىن قوسا بەرەر ەدى. قوعامدىق كەڭەستەر مەن اۋىل بەلسەندىلەرىنىڭ وتىنىشتەرى ەسكەرىلىپ, اۋىلىشىلىك جولداردى جوندەۋ, كورنەكتى جەرلەردى اباتتاندىرۋ سەكىلدى جۇمىستاردىڭ شىعىنى بيۋدجەتكە ەنگىزىلگەننەن كەيىن ولاردىڭ ساپالى ورىندالۋىن باقىلاۋ وسى ۇيىمدارعا ارناۋلى تارتىپپەن جۇكتەلسە, نۇر ۇستىنە نۇر بولار ەدى.
جولداۋدا جاستاردىڭ جۇمىسشى ماماندىقتارىن الۋ ماسەلەسى دە ايتىلىپ, ۇكىمەتتىڭ وسى ماسەلەگە نازار اۋدارۋى تاپسىرىلدى. ايتپەسە جىل سايىن مەكتەپ بىتىرگەن مىڭداعان ءجاسوسپىرىم جۇمىسقا تۇرا الماي, ماماندىق الا الماي جۇمىسسىزدار قاتارىن تولتىرادى. پرەزيدەنت سول ماسەلەگە نازار اۋدارىپ, ولاردىڭ الدىن الا جوسپارلانىپ, شەشىلىپ وتىرعانى دۇرىس بولار ەدى دەگەن پىكىرىن دە وتە دۇرىس دەپ سانايمىن.
ينفوگرافيكانى جاساعان امانگەلدى قياس, «ەQ»
جولداۋدا حالىققا قۋانىشتى حابارلار دا جەتكىزىلدى. اسىرەسە 18 جاسقا دەيىنگى بالالاردىڭ ارقايسىنا ەسەپشوت اشىلىپ, وعان مەملەكەت تاراپىنان ارناۋلى جارنا سالىنىپ وتىراتىنى وتە ۇلكەن قۋانىش. دامىعان اراب ەلدەرىندە, مۇنايلى مەملەكەتتەردە مۇنداي تاجىريبە باياعىدان بار, سونى ءبىزدىڭ مەملەكەت كەشەۋىلدەتىپ كەلگەن ەدى, ەندى سول ىسكە اساتىن بولىپتى. بۇل اسىرەسە كوپبالالى وتباسىلار ءۇشىن ۇلكەن قۋانىش. ءارى بالا تۋدى ىنتالاندىرۋعا دا كومەكتەسەتىن ىقپالدى شەشىم. ەلىمىزدەگى حالىق سانىنىڭ ءوسۋى وزەكتى ماسەلەنىڭ ءبىرى ەكەنى داۋسىز, ەندى سول ەپتەپ شەشىلەتىن بولار دەگەن ءۇمىت وياندى.
ايەلدەردىڭ زەينەت جاسىنىڭ 61-گە دەيىن ازايتىلۋى دا «حالىق ۇنىنە قۇلاق اساتىن مەملەكەت» تۇجىرىمداماسىن اقتايتىن شەشىم بولىپ وتىر. قازىر جاسى 60-قا تايانعان ادامداردى ەشقانداي مەكەمە-ۇيىمدار, كاسىپورىندار جۇمىسقا العىسى كەلمەيدى. بۇرىننان ىستەپ كەلە جاتقانداردى ءتۇرلى سەبەپتەرمەن, سونىڭ ىشىندە ءىت تەحنولوگيانى ەركىن يگەرە الماعاندىعىن سەبەپ قىلىپ, جۇمىستان قىسقارتۋعا تىرىسادى. مىنە, وسى ادامداردىڭ جۇمىسسىز قينالىپ جۇرگەنى جۇرەكتى اۋىرتاتىن ەدى. ەندى تىم بولماسا ايەلدەر قاۋىمى 61-دە زەينەتكە ىلەگەتىن بولدى, وعان دا شۇكىر دەيمىز. دەگەنمەن وسى ماسەلەنى ءالى دە تەرەڭىرەك زەرتتەپ, جەڭىلدىكتى ۇلعايتا تۇسسە – ارتىق بولماس ەدى. جالپى, بيىلعى جولداۋ ەلىمىزگە, حالقىمىزعا جاقسى جاڭالىقتار اكەلدى دەپ سانايمىن.
جانات مۇحامەدجانوۆ,
«سولتۇستىك قازاقستان وبلىسى ازاماتتىق اليانسى» زتۇ جانە «قازاق ءتىلى» قوعامىنىڭ توراعاسى
