جارىستىڭ باستالۋىنا بىرنەشە كۇن قالعاندا تۇماندى البيون ەلىنە جەتكەن قازاقستاننىڭ ۇلتتىق قۇراماسى بىردەن دايىندىققا كىرىستى. سول كەزدە باق وكىلدەرىنە بەرگەن سۇحباتىندا كوماندامىزدىڭ ەڭ تاجىريبەلى ويىنشىسى ميحايل كۋكۋشكين: ء«دال قازىر قاي ەلدىڭ ورەندەرى كەلەسى كەزەڭگە شىعاتىنىن ءدوپ باسىپ ايتۋ قيىن. بارلىق كوماندانىڭ ساپىندا وتە مىقتى جانە تاجىريبەلى تەننيسشىلەر بار. ولار جەكەلەگەن باسەكەلەرمەن قاتار, جۇپتىق سايىستاردا دا جاقسى ويىن كورسەتە الادى. ال ءبىزدىڭ ءبىر ارتىقشىلىعىمىز – دەۆيس كۋبوگىندا ءجيى باق سىناي ءجۇرىپ, مول تاجىريبە جينادىق. اتالعان دودادا نەبىر ازۋلى قۇرامالاردى جولىمىزدان ىعىستىرىپ, كوماندالىق رۋحىمىزدىڭ مىقتى ەكەنىن سان مارتە دالەلدەدىك. بۇل جولى دا جانكۇيەرلەرىمىزدى جەرگە قاراتپاۋعا بارىنشا كۇش سالامىز», دەدى.
كەشە 8 مىڭ كورەرمەندى سىيدىرا الاتىن Emirates Arena كەشەنىندە قازاقستان قۇراماسى تۇساۋكەسەر كەزدەسۋىن نيدەرلاندتىڭ تەننيسشىلەرىمەن وتكىزدى. ەرتەڭ اقش-پەن ايقاسامىز. 18 قىركۇيەكتە ۇلىبريتانيامەن كۇش سىناسامىز. ال وزگە باسەكەلەر يتاليانىڭ بولونيا, يسپانيانىڭ ۆالەنسيا جانە گەرمانيانىڭ گامبۋرگ قالالارىندا وتۋدە. ءار توپتىڭ ۇزدىك ەكى كومانداسى پلەي-وففقا جولداما الادى. شەشۋشى باسەكەلەر 23-27 قاراشا كۇندەرى پيرەنەي تۇبەگىندەگى مالاگا قالاسىندا ۇيىمداستىرىلادى. سول تۋرنيردە دەۆيس كۋبوگىنىڭ جەڭىمپازى انىقتالادى.
