ونەر • 13 قىركۇيەك، 2022

اۋەزدى اۋەن اۋەلەدى

76 رەت كورسەتىلدى

جۋىردا ەلوردالىق كورەرمەن اۋەزدى اۋەن تىڭداپ، كۇندەلىكتى قوڭىر تىر­شىلىك­تەن سەرگىپ ءبىر دەمالدى دەرسىز. بۇل مادەني دەمالىستى ەركەعالي راحماديەۆ اتىن­داعى مەملەكەتتىك اكادەميالىق فيلار­مونيا­نىڭ سيمفونيالىق وركەسترى ۇسىن­عان Sympho vibe كونتسەرتى سىيلادى.

Sympho vibe سازدى كەشى اتالعان ۇجىم­نىڭ كونتسەرتتىك ماۋسىمىنىڭ ەرەكشە اشىلۋى بولدى. ويتكەنى باعدارلامادا كلاسسيكا مەن دجاز، اكادەميزم مەن جالىندى بي ىرعاقتارىنىڭ توعىسىندا تۋعان جاۋھارلار، ياعني دجوردج گەرشۆيننىڭ «بليۋز ستي­لىندەگى راپسوديا» جانە «پاريجدەگى امە­ريكالىق»، لەوناردو بەرنستايننىڭ جانە ەل­مەرا بەرنستايننىڭ «ۆەستسايد تاريحى» ميۋ­زيكلىندەگى «مام­بو» جانە «The Magnificent Seven»، ار­تۋرو ماركەستىڭ № 2 دانسونى، وركەس­ترمەن ۆالتورناعا ارنالعان ۆيللانەللا (ۆالتورنا – ك.دۇي­سەمباەۆ) جانە قۋات شىلدەباەۆتىڭ «كاراكەمەر» شىعارمالارى بار.

كونتسەرتتىڭ كوپتەگەن شىعارماسى تانىمال فيلمدەردەن-اق بەلگىلى. جاندى، اسەرلى جانە ءتۇرلى اۋەندەر مادەني كەشتى عاجايىپ كۇيگە بولەدى. لەوناردو بەرنستايننىڭ «ۆەست­سايد تاريحى» شىعارماسىنىڭ ءوزى ءبىر تاريح. ايتا كەتەيىك، ميۋزيكل ەكرانعا شىققاننان كەيىن 11 نوميناتسيا بويىنشا ون وسكاردى جەڭىپ الدى.

«بليۋز ستيلىندەگى راپسوديا» دا – دجوردج گەرش­­ۆيننىڭ تانىمال تۋىندىلا­رىنىڭ ءبىرى. عاسىر بۇرىن ورىندالعان راپسوديا بىردەن ايتۋلى جەتىستىككە جەتىپ، كوم­پوزيتوردىڭ شوق جۇلدىزىنا اينالدى. سىنشىلار گەرشۆيننىڭ كلاسسيكالىق مۋزىكا مەن دجاز قاعيداتتارىن بىرىكتىرۋدەگى دارىندىلىعىن ەرەكشە ايتادى. وسى ۋاقىتتان باستاپ «راپسوديا ۆ ستيلە بليۋز» شىعارماسىن اكادەميالىق جانە دجاز ۇجىمدارى ورىندايدى.

ال ارتۋرو ماركەستىڭ № 2 دانسونى «Proms-2007» فەستيۆالىندە عاجاپ اسەر تۋعىز­عان ەدى. كەيىن وسى كومپوزيتسياعا قىسقا­مەتراجدى كوركەم فيلم ءتۇسىرىلىپ، ول دا كينو­سۇيەر قاۋىمدى ءتانتى ەتتى. مەك­سيكالىق كومپو­زيتوردىڭ شىعارماسى لا­تىن امەري­كاسىندا ءھام بۇكىل الەمگە تانىلىپ، ءتىپتى اۆتوردىڭ قۇرمەتىنە حا­لىقارالىق مۋزىكا فەستيۆالى اشىلدى.

ايتا كەتەيىك، تىڭدارمانعا وسىنداي جۇلدىزدى شىعارمالاردى ۇسىنعان كەشتىڭ كوركەمدىك جەتەكشىسى – بەرىك باتىرحان، باس ديريجەرى – ەرنار نۇرتازين.

سوڭعى جاڭالىقتار

QazaqGaz ديرەكتورلار كەڭەسىنىڭ قۇرامى وزگەردى

قازاقستان • 02 جەلتوقسان، 2022

ۇقساس جاڭالىقتار