مەملەكەتىمىزدىڭ باسشىسى بۇگىن ەلىمىز ءۇشىن تاريحي كۇن ەكەنىن اتاپ ءوتتى.
«ريم پاپاسى فرانتسيسك قازاقستانعا العاش رەت اپوستولدىق ساپارمەن كەلدى. بيىل قازاقستان مەن ۆاتيكان اراسىندا ديپلوماتيالىق قاتىناس ورناعانىنا 30 جىل تولدى. ءسىزدىڭ ساپارىڭىز وسى مەرەيلى مەجەگە تۇسپا-تۇس كەلىپ وتىر. ءبىز بۇل ساپارعا ايرىقشا ءمان بەرەمىز. سەبەبى بۇگىنگى كەزدەسۋ ءبىزدىڭ ءتۇرلى سالاداعى ىنتىماقتاستىعىمىزدى جاڭا دەڭگەيگە كوتەرەدى», دەدى پرەزيدەنت.
قاسىم-جومارت توقاەۆ ادامزاتتىڭ يگىلىگى جولىنداعى پونتيفيكتىڭ قاجىرلى جانە تاباندى كۇش-جىگەرىن قولدادى.
ء«سىز قازاقستانعا ادامزات تاريحىنداعى بەتبۇرىس كەزەڭىندە كەلدىڭىز. ءتۇرلى مادەنيەتتەر مەن دىندەر وكىلدەرىنىڭ بەيبىتشىلىك, الەۋمەتتىك ۇيلەسىمدىلىك جانە ءوزارا قولداۋ كورسەتۋ جولىندا ادامداردى بىرىكتىرۋ ءۇشىن دانالىق پەن كۇش-قۋات كورسەتەتىن ۋاقىتى جەتتى دەپ ويلايمىن», دەدى مەملەكەت باسشىسى.
قازاقستان پرەزيدەنتى تاۋەلسىزدىكتىڭ 30 جىلىندا ەلىمىز «بىرلىگىمىز – ارالۋاندىقتا» قاعيداتىنا نەگىزدەلگەن وزىندىك ەتنوسارالىق جانە دىنارالىق كەلىسىم مودەلىن قالىپتاستىرعانىن اتاپ ءوتتى.
«بۇگىندە ورتالىق ازيا ەلدەرى اراسىندا كاتوليك قاۋىمىنىڭ ەڭ كوپ وكىلى قازاقستاندا تۇرادى. حريستياندار باسقا دىندارلارمەن بىرگە توزىمدىلىك پەن ءوزارا قۇرمەت ۇستەمدىك ەتەتىن ادىلەتتى قازاقستاندى قۇرۋعا زور ۇلەس قوسىپ كەلەدى», دەدى پرەزيدەنت.
قاسىم-جومارت توقاەۆ الەمدىك جانە ءداستۇرلى دىندەر كوشباسشىلارىنىڭ سەزدەرىن وتكىزۋ قازاقستاننىڭ الەمدەگى كەلىسىم مەن ديالوگتى قامتاماسىز ەتۋگە باعىتتالعان كۇش-جىگەرىنىڭ ءبىر كورىنىسى ەكەنىنە نازار اۋداردى.
«سەزد العاش رەت 2003 جىلى شاقىرىلعان ۋاقىتتان بەرى ادامداردىڭ ارالۋاندىعىنا قاراماستان ولاردى جاقىنداستىرۋدىڭ جاقسى ۇلگىسىنە اينالدى. تەك ديالوگ, ادامداردىڭ باۋىرمالدىعى مەن سىيلاستىعى عانا بىرگە بەيبىت ءومىر سۇرۋگە جانە تولەرانتتىققا جول اشاتىنىنا كامىل سەنەمىن. وسى رەتتە مەن قاسيەتتى تاقتىڭ سەزد جۇمىسىنا ولشەۋسىز ۇلەس قوسىپ, كەڭ قولداۋ كورسەتكەنىن جوعارى باعالايمىن», دەدى مەملەكەت باسشىسى.
پرەزيدەنت ءسوزىن قورىتىندىلاي كەلە, سەزگە كاتوليك شىركەۋى باسشىسىنىڭ قاتىسۋى شارانىڭ تابىستى وتۋىنە ىقپال ەتىپ, بۇكىل الەمدەگى كاتوليكتەردىڭ جۇرەگىنە قۋانىش پەن شاتتىق ۇيالاتاتىنىنا سەنىم ءبىلدىردى.
بۇدان كەيىن ريم پاپاسى فرانتسيسك جيىنعا قاتىسۋشىلار الدىندا ءسوز سويلەدى. ول ەجەلگى قازاق جەرىنە جاساعان اپوستولدىق ساپارىنا كوڭىلى تولاتىنىن جەتكىزدى. پونتيفيكتىڭ ايتۋىنشا, ول مۇندا ديالوگ پەن بىرلىك ىزدەۋ ماقساتىمەن بەيبىتشىلىكتىڭ ەلشىسى رەتىندە كەلگەن.
«سىزدەردە «بەرەكە باسى – بىرلىكتە» دەگەن ماتەل بار. بۇل بارلىق جەردە, اسىرەسە وسى جەردە ماڭىزدى ۇعىم ەكەنى ءسوزسىز. ەلدە 150-گە جۋىق ەتنيكالىق توپ پەن سەكسەننەن استام ءتىل بار. ءارتۇرلى تاريحى, مادەني جانە ءدىني داستۇرلەرى بار بۇل حالىقتار بىرلەسە, ادام ايتسا نانعىسىز ىنتىماقتاستىق ورناتقان. سونداي-اق قازاقستاندى كوپۇلتتى, مۋلتيمادەنيەتتى, كوپكونفەسسيالى بىرەگەي مەكەنگە اينالدىردى جانە بۇل مەملەكەتتىڭ كەزدەسۋلەر ەلى دەگەن ەرەكشە اتىنا ساي كەلەدى», دەدى پونتيفيك.
كاتوليك شىركەۋىنىڭ باسشىسى قاسىم-جومارت توقاەۆتىڭ قازاقستاندا ءولىم جازاسىن الىپ تاستاۋ جونىندەگى شەشىمىن قولدادى. ونىڭ پىكىرىنشە, بۇل ءاربىر تۇلعانىڭ ءۇمىت ەتۋگە قۇقىعى جولىنداعى ادام ءومىرىنىڭ قۇندىلىعىن راستايدى.
ريم پاپاسى قازىرگى گەوساياسي شيەلەنىس جاعدايىندا اسا قاجەت ديالوگقا قولداۋ كورسەتۋ ءۇشىن ديپلوماتيالىق كۇش-جىگەردى جانداندىرۋعا شاقىردى.
«ارازدىقتى شيەلەنىستىرمەۋدى ۇيرەنەتىن, بلوكتاردىڭ ءبىر-بىرىنە قارسىلىعىن كۇشەيتۋدى توقتاتاتىن ۋاقىت جەتتى. بىزگە حالىقارالىق دەڭگەيدە حالىقتار اراسىنداعى ءوزارا تۇسىنىستىك پەن ديالوگقا ىقپال ەتە الاتىن جانە «حەلسينكي رۋحىن» قايتا جانداندىراتىن, مۋلتيلاتەراليزمدى نىعايتۋعا ۇمتىلاتىن, وسكەلەڭ ۇرپاق ءۇشىن تۇراقتى ءارى بەيبىت الەم قۇراتىن كوشباسشىلار كەرەك. بۇل ءۇشىن بارىمەن تۇسىنىستىك, توزىمدىلىك جانە ديالوگ قاجەت. قايتالاپ ايتامىن, بارىمەن!», دەدى ريم پاپاسى فرانتسيسك.
پونتيفيك قارۋسىزدانۋ, يادرولىق قارۋدى تاراتپاۋ, ەكونوميكانى كومىرتەگىنەن ارىلتۋ جانە ەنەرگيانىڭ بالامالى كوزدەرىنە ينۆەستيتسيا قۇيۋ جونىندەگى قازاقستاننىڭ كۇش-جىگەرىن جوعارى باعالادى.
«دىنارالىق ديالوگ ورناتۋ ىسىمەن قاتار مۇنىڭ ءبارى ادامزاتتىڭ ورتاق بولاشاعى ءۇشىن ەگىلگەن ءۇمىت ءدانى. قاسيەتتى تاق وسى جولدا سىزدەردى قولدايدى», دەدى ريم پاپاسى.
كاتوليك شىركەۋىنىڭ باسشىسى ءسوزىنىڭ سوڭىندا قاسىم-جومارت توقاەۆقا كورسەتكەن قوناقجايلىعى ءۇشىن ريزاشىلىعىن ءبىلدىرىپ, ەلىمىزگە بەيبىتشىلىك پەن بىرلىك تىلەدى.
جيىن سوڭىندا قازاقستان پرەزيدەنتى پونتيفيككە جىلى لەبىزى مەن ەلىمىزگە دەگەن قۇرمەتى, سونداي-اق مازمۇندى ءسوزى ءۇشىن العىس ايتتى.
