وسى ۋاقىتقا دەيىن اتالعان اۋىل تۇرعىندارى 1973 جىلى سالىنعان ەسكى عيماراتتا ەم-دوم قابىلداسا, ەندى جارقىراعان جاڭا مەكەمەدە مەديتسينالىق كومەك كورسەتىلمەك. تۇرعىنداردى قۋانىشتى ساتىمەن اقسۋ اۋدانىنىڭ اكىمى ەسىم بازارحانوۆ پەن اۋداننىڭ باس دارىگەرى سالتانات مىقتىباەۆا قۇتتىقتادى.
مەديتسينالىق ورتالىقتى «قىدىرالى» شارۋا قوجالىعىنىڭ جەتەكشىسى تولەگەن ماقاشەۆ سالىپ بەردى. جاڭا الەۋمەتتىك نىساننىڭ لەنتاسى قيىلعان سوڭ اۋدان باسشىسى مەن جەرگىلىكتى تۇرعىندار مەديتسينالىق پۋنكتىڭ ءىشىن ارالاپ كوردى. مۇندا فەلدشەرلىك كابينەت, ەكپە بولمەسى ورنالاسقان. كابينەتتەردىڭ ءبارى دە تولىقتاي جابدىقتالىپ, اۋىلداعى 400 تۇرعىننىڭ بارلىعىنا قاجەتتى مەديتسينالىق كومەك كورسەتۋگە ءازىر.
«ەندى مۇندا كۇندەلىكتى دەنساۋلىعىنا شاعىمدانعان جاندارعا كومەك كورسەتىلەدى. قانداي دا شۇعىل جاعداي ورىن الىپ جاتسا دا, كۇندىز-ءتۇنى قىزمەت كورسەتۋگە دايىنبىز», دەيدى اۋىل العىسىنا بولەنگەن مەدبيكە اقمارال نۇرالينوۆا.
اۋىلداعى مەديتسينالىق پۋنكتىڭ اشىلۋى تۇرعىندار جۇزىنە قۋانىش ۇيالاتتى. اسىرەسە دەنساۋلىعىنا ءجيى شاعىمداناتىن قارتتار ءۇشىن بۇل ۇلكەن يگى ءىس. ەندى ولار كەز كەلگەن ماسەلە بويىنشا الىسقا بارماي-اق, جەرگىلىكتى ماماندارعا جۇگىنە الادى.
ايتا كەتۋ كەرەك, مەملەكەت قولداۋى اياسىندا تاراس اۋىلىندا 2018 جىلى جاڭا مەكتەپ پايدانالۋعا بەرىلسە, بىلتىر اۋىلدىڭ كىرمە جولى جاسالعان.
جەتىسۋ وبلىسى
