«فەستيۆال ماقساتى – تۋريستەردى, سەزگە قاتىسۋشىلاردى ۇلى دالانىڭ مۇراگەرى – قازاق حالقىنىڭ باي مادەنيەتىمەن تانىستىرۋ. ءىس-شارالاردا ءداستۇرلى باعىتتاعى ونەر يەلەرى, ەتنو-فولكلورلىق ۇجىمدار جانە باسقا دا تانىمال قازىرگى زامانعى ەتنوستىق باعىتتاعى ارتىستەر ءوز ونەرلەرىن ورتاعا سالادى», دەدى نۇر-سۇلتان قالالىق مادەنيەت باسقارماسى باسشىسىنىڭ ورىنباسارى نۇران قامزين.
ءىس-شارا «بايتەرەك» مونۋمەنتىنىڭ جانىندا ورنالاسقان ەتنواۋىل اۋماعىندا وتەدى. وندا سەگىز قاناتتى كيىزۇيلەر تىگىلىپ, التىباقاندار ورناتىلادى. قولونەر شەبەرلەرىنىڭ بۇيىمدارى قويىلاتىن «شەبەرلەر اۋىلى», شاعىن ساۋلەت نىساندارى جانە ت.ب. الاڭدار قۇرىلادى.
ەتنواۋىلدا تۇرعىندار جانە قالا قوناقتارى ءداستۇرلى قولونەر تۇرلەرىمەن – ءتورت كيىزۇيدە وتاندىق قولونەر شەبەرلەرىنىڭ كورمە-جارمەڭكەسى, زاماناۋي ۇلتتىق ناقىشتاعى كيىم, زەرگەرلىك ونەر, كىلەم جانە كەستە بۇيىمدارى قويىلعان جارمەڭكەنى تاماشالاي الادى. سونىمەن قاتار 3 كيىزۇيدە ى.دۇكەن ۇلى اتىنداعى حالىق مۋزىكالىق اسپاپتار مۋزەيىنىڭ مۋزىكالىق اسپاپتارى قويىلادى. سونىمەن قاتار «اڭشى ۇيىندە» حالىق كاسىبىنىڭ تۇرلەرى ۇسىنىلادى. وندا ماماندار حالىققا قىران بۇركىت پەن اڭشى يتتەرىن قالاي ۇستاۋ كەرەكتىگى مەن ەپتىلىگىن كورسەتەدى.
« ۇلى دالا سازى» ەتنوفەستيۆالى 12-16 قىركۇيەك ارالىعىندا وتەدى. ەتنواۋىل ساعات 10:00-19:00 ارالىعىندا اشىق بولادى. كەلۋشىلەر كوشپەندى حالىقتىڭ مادەنيەتىمەن, تۇرمىسىمەن تانىسادى, سونداي-اق شەبەرلىك سىنىپتارىنا, ۇلتتىق ويىندارعا قاتىسا الادى. كۇن سايىن كەشكىلىك كونتسەرت ۇيىمداستىرىلادى. بۇل ءىس-شارالار 18:00-دە باستالىپ, 20:00-گە دەيىن جالعاسادى.
